Israel unikamax Nukën 'Ibumi 'ucha ñuikë bana
4
Israel unikaman kaësai ka Nukën 'Ibu kia kuati 'ikën.
An ka ënë menu tsókë unikama nishanankë a uisokin kara 'ati 'ikë sinánxa,
ënë menu ka uni nuibanani tsókë 'aíma 'ianan,
bëtsi uni mëëkaskin uisai kara Diosan bana kia abi 'unanima.
2 Usa 'ain ka atunu këmëishi banati 'imainun bëtsi paránti 'ianan,
bëtsi 'ati 'imainun mëkamati 'ianan,
aín xanuma 'ikëbi bëtsi xanu 'anan bënë́kinshi ñu 'atima 'ati 'itsaira 'ikën,
'ianan ka bëtsin 'akëbë 'akëbëtan uni 'ati ashi anu 'itsaira 'ikën.
3 Usa 'ain ka ënë menu uni ñukë 'ain pañukë chupa a pañuax masá nuituti
nitë́xëkë usa 'ixun añu ñubi kuëënima;
usa 'ain ka anu tsókë unikama kushiñuma 'ikën; usai 'imainun ka raëkëma ñuina 'imainun, manan nikë ñukama bamamainun parúmpapanu 'ikë tsatsakama axribi bamaia.
Dios sacerdote unikaman ka ñu 'atima 'aia kiax kia bana
4 Ësai ka Dios kia:
“¡Uínbi ka usakin kamina ñu 'atima 'ai kixun bëtsi uni katima 'ikën!
'Ëx nishkë ax ka sacerdote mimi 'ëx nishkë 'ikën.
5 Mix kamina nëtëinra 'ianan imë́ ñu 'atima 'ai pakëti 'ain,
usai 'ikëbë ka mibë an Dios kikë bana ñuikë
uníxribi pakëti 'ikën,
'imainun kana min titaribi 'ën këñunun 'imiti 'ain.
6 'Ën unikaman ka añu ñubi 'unánkëma 'iaxa,
usa 'aish ka 'atima okin masókë 'iaxa.
Usa 'ain kamina sacerdotekama mitsúxribi ñu 'unánkëma 'iakën,
usa 'ain kana 'ënribi anuxun 'ë rabiti xubunu mikamax 'iti kuëëniman.
Min kamina Dios 'ixun 'ën 'unánmikë banakama manua,
usa 'ain kana 'ëxribi min rëbúnkin kamami manúti 'ain.
7 Sacerdotekama 'itsakëbë ka uníxribi 'itsaira 'ëmi 'uchakëxa;
usa 'ain kana atúan biti ñu 'inankima ñuumasara 'inun 'imiti 'ain.
8 'Ën unikaman aín 'ucha mëníokakin 'inainshikë ñukama a marui kamina mitsux tsotin;
usakin 'akin kamina 'ën unikamaxa abi 'uchanun 'imin.
9 Usa 'ain kana 'ën unikama 'akësaribi okin sacerdote unikama upiti atux tsótima kupín 'atima oti 'ain.
10 Usa 'ain ka atun Dios rabiti ënkë 'ixun piti 'ikë,
'aínbi ka puchákin pitima 'ikën;
'ianan ka xanun nami 'akinbi bëchikantima 'ikën.
Israel unikaman bëtsi ñukama rabia ñuikë bana
11 Ësaribiti ka Dios kiakëxa: Bëtsi bëtsi unin aín nami 'akë xanubë nikin,
uvas baka paëokin 'akë xëai paëini nikin ka upíokin ñu 'ati a ëanxa.
12 Usa 'ain ka 'ën unikama atun rabinuxun nitsínkë ikama abë banakin ñukatia;
'ianan ka aín tsatikama anun uisai kara 'iti 'ikë kixun anun tanti aribi 'aia.
Usa 'ain ka 'ën unikama xanun nami 'ati kuëëinra 'ixun,
bëtsi ñu 'atishi kuëënia:
Usa 'ixun ka aín Dios 'ikëbi aín nami mëakakë xanukaman abë 'ikë uni 'akësokin 'ë manuakëxa.
13 Usa 'ain ka aín bashi manan kuaruxun aín rëbu anuxun sanuira ro a xaronan
'aímai këñutanun ñuinaribi xaroia,
'imainun ka i roble kakë pëñanakëkë 'ianan álamos kakë i 'imainun muxañu ikama aín tupën tëmúxun ñuina xaroia.
Usa 'ain ka mitsun ini bëchikëkaman bëtsi bëtsi uni aín nami 'amia,
'imainun ka mitsun bakë bëchikënën xanu min piakakamaribi atun bënë ëanx bëtsi unibë 'ia.
14 'Aínbi kana 'ën mitsun ini bëchikë xanukama uni aín nami 'atima oíma 'ianan mitsun bëchikënën,
bëtsi uni aín nami 'amia tëmëramiti 'ain,
mitsúxbi kamina bëtsi bëtsi uni aín nami 'akë xanubë 'in;
'ikin kamina a rabikësokin atubë timë́xun ñuina xarokanin.
¡Usokin 'ai kamina achúshi ëmanu 'ikë unikaman sinánkimaishi ñu 'akë usaribi 'ikanin!
15 Israel unikama mitsux kamina bëtsi bëtsi ñuira 'akë 'ain,
'aínbi ka Judánu 'ikë unikama atun kuni usakin 'ai 'uchatima 'ikën.
¡Usa 'ain kamina Guilgalnu kuankantima 'ain, 'ianan kamina Bet-avén anuribi kuarutima 'ain,
'ianan kamina sinanatëkëntima oi 'ën anë ñui banatima 'ain!
16 Israel unikamax bana kuati 'unánma unibu 'ikën,
usa 'aish ka burro xanu bërí kanikë bisama usaribi 'ikën,
usa 'ikë, ¿kara Diosan pasto 'apákë upíira anua carnero kamara 'akësokin bërúanti 'ik?
17-18 Usa 'ain ka Israelkama axribi unínbia 'akë ñukama rabitinu atsínxun rabia.
¡Usa 'ain ka kamabi uni axa bëtsi 'atima onux timë́ax bëtsibë paë́nkë unikama usaribiti 'ia!
Usai 'i amiribi amiribi ñunshinakëkin xanun nami 'ai ka
anun rabinima upiti tsótisa 'ashi 'atimati tsótishi kuëënia.
19 ¡Usakin atun ñu 'akë ax ka suñu bëkikin nuámikësa 'iti 'ikën,
usa 'aish ka atun ñu rabikë anubi katë́kë 'iti 'ikën!