5
Sacerdotekama mitsun kamina ënë bana kuati 'ain;'imainun ka Israel kamanribi bëmë́kin kuati 'ikën;
'imainun ka 'apun aintsikama upíokin kuati 'ikën:
'Ën kana mitsu tëmëramiti 'ain, mitsun kamina ami ñu 'iti nankë usa 'ixun Mispá anuxun unikama 'uchamiakën, 'anan kamina achúshi rika sarakaxun satëonkin tëkërëkakësa 'ixun aín bashi Tabor anuxun 'akën,
2 'anan kamina achúshi kini nëmionkin naëkësa 'ixun Sitim kakë me sapan anuxun unikama 'uchamiakën.
Usa 'ain kana 'ën mitsu tëmëramiti 'ain.
3 'Ën kana Efraín 'unán;
usa 'ain kana uisai kara Israel 'ia a 'ën 'unán.
Efraín ax ka aín nami bëtsi bëtsi uni 'akë xanusa 'ikën;
usa 'ixun ka Israel unikama 'itsaira ñu 'atima 'akin 'uchamiaxa.”
4 Bëtsi bëtsi ñua aín ëmanuxun 'akë anbi ka Israel unikama aín,
Diosmi sinanatëkënun 'imiman.
Usa 'ain ka an 'akë ñu 'atima abi tënëtisama tankin 'akë anbi ka aín 'Ibu Dios sinántisama oia.
5 Israel unikamaxa nux kananuna usaira 'ai kiax rabiakakë ax ka atuxi anunbi 'atimati 'ikën;
usa 'ain ka Israel aín ñu 'atima 'akë anunbi 'uchai 'atimati 'ikën,
¡usai 'ikëbë ka Judánu 'ikë unikama atu tani usaribiti 'iti 'ikën!
6 Achúshi nëtën ka atun ovejakama 'imainun vacakama
buánxun 'ë barikanti 'ikën,
usokin 'akinbi ka atun 'ë mërakantima 'ikën,
atunuax urakin kana 'ën ëankën.
7 Atux ka bëtsi bëtsi unibë 'ikë xanusa 'iaxa, usa 'ixun ka bëtsi
dioskama rabikin 'ë paránxa,
usa atux 'ain ka achúshi 'uxëinshi atun me 'atima okin masókë 'iti 'ikën.
Israel 'imainun Judánu 'ikë unikama Diosan 'atimoti ñuikë bana
8 ¡'Akanankëbëtan a banokë ñuina manchan Guibeánuxun banoti 'ain,
'anan kamina manë banoti aribi Ramá anuxun banoti 'ain!
¡'Anan kamina ñu 'ikëbë banati nankë aribi Bet-avénnuxun banamiti 'ain!
¡'Anan kamina anun bënëtishi mëníokati ñu aribi Benjamínën me kamanuxun bana oti 'ain!
9 'Ëx kana Israel ñakákamanua 'iásaribi 'inua asérabi ñu 'iti ñui kin:
Israel ax ka anúan 'ati nëtë 'ikëbëtan masókin tëmëramikëx masá nuituti 'ikën.
10 Ësai ka Nukën 'Ibu kia:
“Judánua 'ikë 'apukama ax ka a unisa 'ikën,
usa 'ixun ka bëtsi unikaman me anua sënë́nkë a 'inumikin bitsia.
¡'Aínbi kana 'ëx nishkin uisakin karana 'aisatani usakin 'ati 'ain!
11 Israelnën rëbúnkikama an ka bëtsi dioskama rabia usa 'ikë ka
uínbi atun bana tankin usa ka atux 'ikë kixun katima 'ikën.
12 Usa 'ain kana 'ëx an ñu pikin këñúkë bisasa Israel unikamanan
'ianan, kana an pikin pëuxun këñubiankin i pikë bisa usaribi 'ixun Judánu 'ikë unikama masóti 'ain.
13 Uínsaran kara Efraínën ain 'insínkë ismainun,
Judánu 'ikë unikaman atun naminu ñukë isia,
anun ka Efraín Asirianu 'ikë 'apu 'akinun kixun ñukáti kuanti 'ikën,
'aínbi ka atu ain ñukëkama mëníokati pëxkunun 'akintima 'ikën.
14 Achúshi paru 'inúanëan ñuina nuikë usaribi okin kana Efraín 'imainun Judá 'ati 'ain,
usokin 'atankëxun tukapabiani kana anuax kuanti 'ain,
usakin 'ën 'aia ka uínbi ië́mitima 'ikën.
15 Usakin 'atankëx kana anu 'ëx 'ikë anu,
atunbia sinanakin kana 'ucha kixun 'ë baritamainun kuanti 'ain.
Tëmërai bënë́kin ka atun 'ë bariti 'ikën.”