Diosmi kananuna sinanatëkënti 'ai kiax Israel unikama kia bana
6
Kamaxi Diosmi sinanatëkënti kamina ukanti 'ain.An ka 'atimo 'ixunbi nux ñu 'atima 'ai 'uchakëkama nu mëníoxunti 'ikën;
usokin 'atimo 'ixunbi mëníotëkënkin ka chuámarua tanun nu 'imiti 'ikën.
2 An ka bënë́kinshi nun ñu 'atima 'akëkama mëníokin nukama upí 'imiti 'ikën,
usakin 'akin ka nukama an iskëx upí tsónun 'imiti 'ikën.
3 ¡A mi kushikin kananuna Dios 'unántëkënti 'ain!
Usakin 'akëbë ka Dios nukamanu 'i 'utëkëni
barin urukin pë́kabëtsinkë usa 'ianan,
ka me chabóia mitakuatsinkëbë 'uí 'ibúkësa usaribiti 'uti 'ikën.
Diosan Israel unikama ami sinanakatsi kia ká ñuikë bana
4 Ësai ka Dios kia:
“¿Añu karana 'ën Israelkama mitsubëtan 'ati 'ain?
¿Judá añu karana 'ën mibëtan 'ati 'ain?
Mitsúnmi 'ë nuibakë ax ka
pëkarakuatsinkëbë kuénkuru 'ibúkë usa 'ianan,
nibí ñantámashi 'ibúkin me chabotankëx
pëkarakëbë nëtë́kë usashi 'ikën.
5 Usa 'ain kana 'ën kakëxua an Dios kikë bana ñuikë unikaman mitsu 'atimonun 'amia,
'ën bana an bana ñuikë unikama ñuikë a bananbia këñunun 'imian.
Usa 'ain ka 'ën 'upiokin 'akë ñukama ax kuni upí 'aish tirísaribi 'ikën.
6 Usa 'ain kana mitsunmi 'ë nuibati a kuëënin,
'ën kana mitsunmi ñuina rëtankëxun xaroxunti a kuëënima,
usa 'ain kamina ax ka Dios 'ikë kixun 'ë 'unánkanti 'ain,
usakin 'unánkin kamina 'ë ñuina rëtankëxun 'aímai këñutanun xaroxunkantima 'ain.”