Diosan 'ain bana kuakëma 'ikëbi 'ain unikama nuiba ñuikë bana
11
'Ën kana Israelkama 'ën uni 'ikë tuá xura 'akësokin nuibakën;usa 'ixun kana atu Egipto menuax chikitia 'ën bëchikë ka ax 'ikë kixun kakën:
2 'aínbi ka usakin kuënkëxi,
'atiaira 'ëmi 'urakankëxa.
Usai 'ikin ka 'ën unikaman këmëkinshia rabikë dioskama a ñuina xaroxuankëxa,
usakin 'anan ka sanuira ro aribi ñu tankin 'akëkama a xaroxuankëxa.
3 Usakin 'aiabi kana 'ën Efraínnu 'ikë unikama uisai
kara tsóti 'ikë a 'unánmiakën;
'aínbi ka atun 'ën kana usakin 'akini kixun 'unánma 'ikën.
4 'Ën kana atu 'itsaira nuibakin ënua 'utëkënun atu 'akiankën;
usakin kana tuá xura 'akësokin 'anan,
atun piti 'inánima 'ikinma bërúankën,
5 'aínbi ka atux 'ëmi katamëisama tankankëxa.
Usai 'i ka Egipto menu kuantëkënti 'ikën,
anuxun ka Asiria menu 'ikë unikama atu tëmëramikin ñu mëëmiti 'ikën.
6 Usokin 'akëbëtan ka atumi nishkë unikama aín ëmakamanua 'ain manë xëtokën 'akin,
anúan ëma kënëara aín xëpútikama 'atima okin masóti 'ikën,
usakin 'akëx ka atun ñu 'atima 'ati sinánkë anunbi 'atimati 'ikën.
7 'Ën unikama ka bëtsi ñuishi 'ai 'ë 'ura 'ia;
usa 'ixun ka bëtsi dioskamaishi nuikin 'ë ënkanxa;
usa 'ixun kamina ax isa 'ësamaira kushi 'ikë kixun sinánkanin, 'aínbi ka an mitsu 'akintima 'ikën.
8 “¿Uisa 'ixun karana 'ën Efraín ënti 'ain?
¿Uisa 'aish karana 'ëx Israel unikamami manuti 'ain?
¿Admá kakë ëma 'ásaribiokin karana mi masókin 'ati 'ain,
'anan karana mi Seboím 'asaribiokin 'ati 'ain?
¡'Ën mitsumi 'itsaira sinánkë an ka
'itsaira mitsu nuibanun 'ë 'imia!
9 Usa 'ain kana 'ëx nishkësokinshi 'atima 'ain:
usakin 'akin kana Efraín amiribishi 'atima okin këñutima 'ain,
'ëx kana Dios 'ain, usa 'aish kana 'ëx unima 'ain,
'ëx kana upíira 'aish mi nëbëtsi 'ain,
usa 'aish kana mitsu këñui ukëma 'ain.”