Diosan ka Israel unikama tëmëramiti 'ikë kixun ñuia bana
13
4 Ësai ka Dios kia:'Ëx kana mitsun 'Ibu 'ianan Dios 'ain, usa 'aish kana
anunmi Egipto menu 'ikankë anubi anu 'iakën:
Usa 'ain kamina bëtsi dios ax 'iisa min Dios 'ikë kakin unántima 'ain,
'ëx ishi kana an mi ië́miti a 'ain.
5 'Ën kana anu uni 'ikëma menuabi mitsu bërúankën.
6 “Usa 'aínbi kamina mitsux piti 'itsairañu 'ikin tani nukamax kananuna usa ira 'ai kixun sinani
'ëmi manúkankën.
7 Usa 'ain kana 'ëx achúshi paru 'inúansa atunan 'ianan,
'inu cha aín rani tunanën tsaka tsaka axa ñu binux unë́kësa usaribiokin 'ën atu 'ati 'ain.
8 Usakin 'ai kana xaëón aín xanuxa aín
tuákama nëtë́miax anun rabanan në́kë usai 'ikin,
'ën aín shikan tukapati 'ain.
Usakin 'akin kana paru 'inúanën 'akësokin 'akin anuxunbi pikin këñuti 'ain;
'anan kana raëkëma ñuinanën 'akësa okinribi anuxunbi 'ati 'ain.
9 Usa 'ain kana Israel unikama 'ën këñuti 'ain,
usakin 'aiabi ka uínbi usakin kamina 'atima 'ai kixun 'ë katima 'ikën.
10 Usa 'ain kara ¿uinu bërí min 'apu,
an ëmakamanua mi ië́miti ax 'ik? 'Aíma ka.
¿Uinu kara mitsún kushibu 'imainun 'apukama anëxunti ñuká 'apu ax 'ik?
11 'Ën kana mimi nishkinbi mitsux mi 'apuñu 'inun 'imiakën,
'imitankëxunbi kana mimi nishkin mi 'apu bikuankën.
12 Israel unikaman 'akë 'atima ñukama ka kuënëokë 'ikën;
'imainun ka atun 'uchakama axribi anubia 'iti kirikanu kuënëokë bëruaxa.
13 Xanu aín tuákën paëokëx upiti
bakënkë, 'aínbi túa bana kuakëma usarabi
ka Israel unikama 'ikën,
14 ¿Usa 'aish kaina anu uni ñukë maínti kini anuax ië́kanti 'ain?
¿Bamati anuax kaina ië́kë 'iti 'ain?
Bamati, ¡min kushibëbi uxun kamina ënë ëma këñuti 'ain!”
15 Israel unikamaxa ñu uábuti 'ikësai mëníokakëbëbi ka suñu amiaxa bari urukë amiax bëkiti 'ikën,
usai 'ika suñu kushiira anu uni 'ikëma memiax bëkiti 'ikën;
usai 'ikëbë ka anua rakákë anuax 'umpax ëskimainun xëxá upikamaribi ëski 'aíma 'iti 'ikën.
Usai 'ikëbëtan ka axa ami nishkë unikaman atun ñu upíbu akama bikin 'ibuati 'ikën.
16 Israelkama ka aín Diosmi 'atimati banakë kupí 'atima okë 'iti 'ikën.
Usa 'ain ka anu 'ikë unikamax 'akanankin manë xëtokën 'akëx bamati 'ikën,
'imainun ka aín bakë bëchikëkamax bixun memi shipënkakin rëkë 'iti 'ikën,
'anan ka xanu tuñukama aribi paná rabë́ okin tukakë 'iti 'ikën.