Oseasnën Israel unikama Diosmi sinanatëkënun kixun ka ñuikë bana
14
Israel unikama Nukën 'Ibu Diosmi kamina sinanatëkënti 'ain,mitsúxmi 'uchakë a kupí kamina 'aisama kan.
2 Usa 'ain kamina Diosmi sinanatëkënkin ësokin mitsun a ñukáti 'ain:
“Nukaman 'uchakama kamina nu mëníoxunti 'ain,
mëníoxunkin kamina mix upí ixun nun
mi rabikëxun upíokin kuati 'ain.
3 Asiria unikamax ka nu ië́misama 'ikën,
usa aín caballokama anbi nu abáti kuania 'abákintisama 'ikën.
Usa 'ain kananuna mix kamina nun Dios 'ai kixun nunbi uniokë ñukama anëtëkëntima 'ain,
axa 'ibuñumakë unikaman ka 'ain,
Dios 'ixun min nuibakëxun 'unania.”
Diosan Israel unikama amiribishi upiti tsotia 'akinuxun 'aia kia ñuikë bana
4 Ësai ka Dios kia:
'Ën kana Israel unikama ñunshinakëkia atun 'akë ñukama mëníoxunti 'ain;
usokin 'akin kana 'ën nuibaisa 'ikëmabi atu nuibati 'ain,
'ëx atumi nishtankëxunbi kana atu nuibatëkëan.
5 'Ëx kana Israel kama nibitan 'ibúkin chabókë usaribi 'iti 'ain,
usa 'ain ka atux ro 'apákëxa uábukësa usaribi 'iti 'ikën.
Usai 'ika aín tapunkama Líbano menu 'ikë i aín tapun menu takáshkikë usaribi 'iti 'ikën;
6 usai 'ika aín pëñankama ax pëñanakëti
olivos pëñan upíirabu usaribi 'iti 'ikën,
'ianan ka aín sanu ax Líbano menu 'ikë kunxankama 'ain sanusaribi 'iti 'ikën.
7 Usai 'ika Israel kama amiribishi 'ën bërúankëx upitax bukui trigo 'apákëxa 'upitax kanikë usai 'ianan,
uvas 'apákëxa kanitankëx uábukësa 'ianan Líbano menu 'apáxun uvas baka bikësa usaribi 'iti 'ikën.
8 Usa 'ain ka Israel unikama kiti 'ikën: ¿Uisati karana a rabinuxun 'akë ñukama 'ën kuëënti 'ain?
¡'Ëx kana an 'ën unikama 'akianan bërúankë 'ain!
'Ëx kana pino kakë 'i paxaira 'ain pëchi usaribi 'ain,
usa 'ain ka atux 'ën 'akinkëx upiti tsóti 'ikën, kiax ka Dios kiakëxa.
Diosan anuishi sënë́nkin Oseas ká ñuikë bana
9 An ñu 'unánkë unikama 'imainun sinánñu unikama,
akaman ka ënë bana kuati 'ikën:
Kamabi ñu Diosan 'á ax ka upíokin 'á 'ikën,
usa 'ain ka an ñu 'upíshi akë unikaman ax kikësabiokin 'aia;
usa 'aínbi ka 'atima sinánñu unikama usakin ñu 'aiama Diosan 'atima oia.