JOEL
'Aisamaira champun ñu 'apákëkama këñukin pia ñuikë bana
1
'Ënë banax ka Joel Petuel kakë uni aín bakë bëchikë Diosan ká 'ikën.2 Kamabi uni 'ain tukurikubu 'imainun axa ënë menu tsókë unikama mitsun kamina ënë bana 'upiokin kuati 'ain.
¿Mitsun kaina ësaia ñu 'ia isan?
¿Mitsun papan kara tsókë 'ixun a nëtëkaman ësaia ñu 'ia isakët? ka isama 'ikën.
3 Usa 'ain kamina mitsun bakë bëchikëkama 'a bana ñuixunti 'ain,
ñuixunkëxun ka atúnribi atun bëchikëkama ñuixunti 'ikën,
ñuixunkëxun ka atúnribi bakëntankëxa kanirukë aribi ñuixunti 'ikën.
4 Kamabi ñu ka champun piakëxa, usakin 'akëbë ukin ka bëtsían pikin ënkë akama këñukin bëtsi champu kamanribi piakëxa. Pikë 'aínbi ka amiribishi utëkënkin raírinënribi piakëxa, pianbi ka axa utëkënkë ainra kamabi ñu këñukin piakëxa.
5 ¡Axa paë́nkë unikama mitsux kamina bësukanti 'ain!
¡An uvas baka vino 'akë xëakë unikama mitsux kamina inkanti 'ain,
'ami mitsun 'ain baka xëakë uvakama ka champun këñúaxa!
6 Usa 'ain ka champu 'itsaira ax achúshi suntárukama kushiira 'ianan 'itsaira usaribi 'ianan,
paru 'inuánën xëtasa 'ianan paru 'inúanën xanun pakasa 'ixun nun mekama tsitsiruaxa.
7 Usai 'ikin ka unin uvas 'apákëkama 'anan,
nun higuera 'apákëkama këñukin piaxa,
usakin 'akin ka 'ain xo këñukin 'ain xaká pianan,
'ain pëñankamaribi uxubu kuaintanun 'ain xaká piaxa.
8 Achúshi xanux 'ain mërati an biti uni ñukë 'ain, inkin uni ñukëbëtan pañuti chupa pañuax inkë,
9 usaribiti ka sacerdote unikamax inia,
anuxun Dios rabiti xubunu ka añu ñubi 'aíma 'ianan,
a xëati uvas baka 'akë 'imainun a Dios 'inaínshiti ñukamaribi 'aíma 'ikën.
10 Naëkamanu ka añu ñubi koima,
mekamax ka uni 'ain 'aintsi ñukë 'ain masá nuitukë usaribi 'ikën.
Usa 'ain ka trigo 'apákë 'imainun uvas 'ianan,
olivos akamax ka ëski chushiaxa.
11 Axa naënu ñu mëi tëkë unikama 'imainun
axa uvas 'apákënu tëkë unikama mitsux kamina masá nuituti inkanti 'ain,
ami 'apákë ñukama ka kamaxi nëtë́axa,
'imainun ka anun biti 'urama 'aínbi trigo 'imainun cebada akamabi këñúaxa.
12 'Ianan ka uvas 'apákëkama 'imainun higuera 'apakëkamaribi chushiaxa.
Usai 'imainun ka kaxori, xëbin, manzana akama 'ianan,
kamabi naënu 'ikë i kamaribi chushi ëskiaxa.
¡Usai 'ia isi ka 'upiokin sinani kuëënkë a ëni kamabi unikama nitë́xëaxa!
13 Usa 'ain kamina sacerdotekama anuxun ñuina xarotinu tëkë,
'ain kushibu mitsux chupa xëni pañutankëx paëi masá sinani inkanti 'ain,
anuxun Dios rabiti xubunu ka
ñu bimikama 'imainun a Dios 'inaínshiti uvas baka vino 'akë abi 'aíma 'ikën.
14 Usa 'ain kamina kamabi unikama pima samákanun kati 'ain;
usai 'ixun kamina anuxun Dios rabiti xubunu uni aín tukurikubu 'imainun kamabi unikama a menu 'ikë timë́ti 'ikën,
anuxun ka Dios atun 'uchakëkama ñuixunti 'ikën.
15 ¡Bërí karanuna añu 'ati 'ain, anúan Dios kushiñuira an nun tënëtisamaira ñu 'atimaira 'imiti nëtë ka 'urama kuatsinia!
16 Nukaman ismainunbi ka nun bërunuxunbi a piti 'apákë ñukama champun këñukin piakëxa,
usa 'ain ka unikaman anuxun Dios rabi xubunuax kuëënkë akama nëtë́akëxa.
17 Usa 'ain ka ñu bëru 'apákëkama ax 'uí 'ibúkëbëma koima ëski chushiakëxa,
usa 'ain ka trigoribi 'ain bimi bisama 'inun nëtë́axa,
usa 'ain ka anu trigo bukunkëkama anuaxribi këñuaxa.
18 ¡Vacakama ka mankia!
Ñankáishibi ka vacakaman pasto bari 'ia,
'imainun ka oveja 'arakakëkama a piti 'aíma 'ain numin bamaia.
19 ¡Usa 'ain kananuna mixmi Dios 'ikë 'akinun mi ñukatin,
barin xanan ka anu uni 'ikëma menua 'ikë xubi 'imainun naënu 'ikë ikama chushimiaxa!
20 Usa 'ain ka ñuina raëkëmakamaxribi tëmërai banaia,
atúan xëakë xëxakamaribi ëskimainun,
ka tsin pastokamaribi nënkin xaroxa.