2
Aín bashi Sión kakë anuxun ka manë banañu banokanti 'ikën,'anan ka Nukën 'Ibun kaisa bashi upíira anuxun uisai ñu 'ikëbëtan a banamiti aribi banamiti 'ikën.
Kamabi unikama Judá menu tsókë akamax ka bërëti 'ikën,
Nukën 'Ibun nëtë ka 'uramaxa usa 'ain:
2 a nëtëx ka imë́ 'ianan, bëánbëankibukë 'iti 'ikën,
'ianan ka a nëtë kuinan tupë́onkë nëtë 'iti 'ikën.
Suntárukama champu 'itsa ukësa kuatsini uá ñuikë bana
Suntáru kushibu 'imainun 'itsaira an ka aín bashikama tsitsiruti 'ikën,
usokin 'akin ka barin urukin pë́kabëtsinkë usaribiokin 'ati 'ikën.
Uinsaranbi ka usai 'ia ñu uínbi isáma 'ikën, usa 'ain ka uínsaranbi bërí 'ikë ësai ñu 'ia uínbi istëkëntima 'ikën.
3 A suntárukaman ka tsin ërë́nrukin bënë́kinshi,
kamabi ñu këñukësa okin 'aia;
usa 'ain ka tsi rëkirukiantankëx
'inúkëbë ñankáishi 'ikë usaribi 'iti 'ikën.
Atúxa kuankëmapain 'ain ka me upíira 'aish,
Edén kakë naësa 'iakëxa,
'aínbi ka atux kuankëbë anu uni 'ikëma mesa 'iti 'ikën.
¡'Aíma ka anuaxa abati 'iakëti ñu 'ikën!
4 Suntárukama ax ka champu 'itsa iskësa 'ianan,
caballonën nikë unikamaxa bënëtishi anun abákë usa 'ikën,
5 usa 'ain ka bashikamanu abákian taë banamikë ax anun 'akánanti caballonën nirinkë ñu ax bana kiankësari 'ia,
'ianan ka tsin rëkirukin në́nkëxa pëi chushirukë banakë usaribiti 'ia.
'Ianan ka suntáru kushiirabukama 'akanantishi 'aish sëtë́kë usaribi 'ikën.
6 Usa 'ain ka unikamax suntárukama bëbaia isi rakuë́ti
bërëi achúshi achúshi uni aín bëmánan bëpëki 'ikanti 'ikën.
7 Usa 'ain ka suntáru rakuëma kamax 'ikësaribiti
abákianx anun ëma kënëara anun rorukiani
puntëishi amo kima kuankësa usaribi kiani kuanti 'ikën.
8 Usai 'ika champukama 'ikësai suntárukama ax bëtsibë bëtsibë bëarananima 'iti 'ikën;
usai 'ika achúshi achúshitax anun kuankë anunbi kuanti 'ikën,
kuani ka atumi okin atun pia pukëbëbi
anuax raíribë ënananima sënë́nbi kuanti 'ikën.
9 Usai 'ika ëmami kikiani abákianx anun ëma kënëara anun rorukiani kuani,
xubukamanu atsínti 'ikën,
usai 'ika an ñu mëkamakë unikamax xubu 'ain xëkuë chukúmakama anun atsínkësaribi 'iti 'ikën.
10 Usa 'ain ka an 'imikëx me shaíkia,
'imainun ka naíribi shaíkiti 'ikën,
'ianan ka bari 'imainun 'uxë bë́ankiti 'ikën,
'imainun ka 'ispakamanribi pëkima nëtë́ti 'ikën.
11 Nukën 'Ibux ka aín suntárukama bëtanainuax
kaná banakësari banai kiti 'ikën.
Usa 'ain ka aín suntárukama 'aisamaira 'aish
uínbi tupunkin sënëoinsamaira 'ixunbi an kakësabiokin 'aia.
¡Usa 'ain ka anun Nukën 'Ibu 'uti nëtë ax chaiira ami rakuë́ti nëtë 'ikën!
Usa 'ikë ka uínbi tënëtima 'ikën.
Nukën 'Ibun unikamax ka amiribishi sinanatëkënti 'ikë kixun ñuikë bana
12 “'Ainbi ka —bërí asérabi Nukën 'Ibu ësai kiaxa—,
amiribishi kamina mitsun nuitunënbi 'ëmi asérabi sinanakanti 'ain.
¡Usai 'i kamina añubi piima 'ianan munuma kuënkëni bënëti inkanti 'ain!”
13 ¡Amiribishi kamina mitsun 'Ibu Diosmi sinanatëkënti 'ain,
usai 'ikin kamina mitsun nuitu mëníokati 'ain,
chupa mëníokë usamaira 'ikën!
Usa 'aish ka Nukën 'Ibu ax munu ñu 'ai bënëtishi nishkëma 'ianan nuibanankë 'ikën,
usa 'ain ka 'itsaira ax nuibanania,
usa 'ixun ka 'atima oisa tankinbi tënëkin uni nuibatia.
14 Usa 'ain ka Diosan mitsu 'atima otima 'ikën,
'akinma ka sinanatia okin 'akinkin mitsu:
ñu bimikama 'imainun uvas chakaxun aín baka bikë 'ianan a 'inaínshiti ñukama Dios 'inánti 'ikën.
15 ¡Manë banañu aín bashi Sión kakë anuxun banokëbëa timëtia kamina!
Ëmanu 'ikë unikama pikëmëti samákanun kati 'ain;
16 sacerdotekama mitsun kamina Diosan kaisa unikama timëtankëxun mëníokanun kati 'ain;
kanan kamina uni kaniakëkëkama 'imainun tuákama bërí kanikë 'ianan,
tuá aín titan xuma ënkëma akamabi timëti 'ain.
¡Usai 'imainun ka bëría xanu bikëkama axribi anua 'uxkë anuax unikamabë timë́ti chikínkanti 'ikën!
17 Sacerdotekama an Diosan ñu mëëti 'akë mitsuxribi kamina utankëx Dios ñukáti inti 'ain.
Usai ini ka anuxun Dios rabiti xubu a bëtanaia 'ikë anuxun ñuina xaroti 'akë anu sëtëtax ësai kikanti 'ikën:
“Nukën 'Ibu Dios min unikama kamina atun 'akë ñu 'atimakama mëníoxunti 'ain;
'anan kamina ñuumara ka atux 'ikë kiax numi uinu 'ikë uníxbi kuainun 'imitima 'ain, nux kananuna min kaískë unikama 'ai usa 'ain;
'ianan kamina bëtsi ëmanu 'ikë unikaman atun kuëënkësokin 'amainun
an bëtsi ñu rabikë unikaman numi kuaikin:
¿Uinu kara mitsun Dios 'ik? kixun nu kanun 'imitima 'ain.
18 Usa 'ain ka Diosan ax nuibanan irakë 'ixun atun 'akë ñukama sinánkinma 'ain unikama nuibakin ismiakëxa. Usokin aín unikama,
19 'ai ka kiakëxa:
'Ënbi kana trigo bimi 'imainun uvas baka 'akë vino 'imainun xëni akama kuëëntanun 'inánti 'ain;
usokëxa numin 'ianan, shimatëkënima 'ikëbëtan kana;
an bëtsi dioskama rabikë unikama mitsumi kuaitëkënun 'imitima 'ain.
20 Usa 'ain kana aín tsipumiaxa champu 'itsa ukësa kuatsini mitsunu ukë suntárukama
anu uni 'ikëma menua kuantanun xuti 'ain.
Usokin 'akin kana anpan rëkuë́n kuatsinkëkama a parúmpapa bamakë kakë anua bakamikinun 'imiti 'ain,
'imianan kana axa tsiankuatsini ukë akamaribi parúmpapa mediterráneo kakë anu këñunun 'imiti 'ain,
usokin 'akëx ka aín namikama chë́ki pisiti 'ikën.
¡'Ën kana unin iskëma ñu chaiirabu usokin 'ati 'ain!”
21 Kamabi mex ka rakuë́tima
'itsaira kuëënti 'ikën, Diosan ka chaiirabu ñu 'ati 'ikën.
22 'Imainun ka raëkëma ñuinakama axribi menu ñu kótëkënkëbë rakuë́tima 'ikën,
pastokamax ka amiribishi paxaira 'itánun 'irutëkënti 'ikën,
'ianan ka ikamaxribi 'aisamaira aín bimi 'iti 'ikën, 'imainun ka higo
uvas akamaxribi 'aisamaira aín bimi 'inun bimiti 'ikën.
23 ¡Axa Jerusalén kakë 'ikëbi Sión kakëribi ëmanu tsókë unikama mitsux kamina kuëënkanti 'ain,
usai 'i kamina Diosmiribi sinani kuëënkanti 'ain!
An ka bëráma 'asabiokin anúan 'ibúti nëtë 'ikëbëtan 'uñe 'ibúmiaxa,
a 'uñe ka mitañu 'ianan anun ñu 'apákëxa pëkëtia biti 'uxë anun 'asaribiokin 'ibúmikë 'iti 'ikën.
24 Usa 'ain ka 'itsaira bimikë trigo biti 'ianan,
uvas baka vino 'akë 'imainun 'itsaira xëniribi 'iti 'ikën.
25 “Ësai ka Dios kiaxa 'ën kana a
baritiakaman mitsun ñu 'apákë utabakin
champun pía a pain amiribishi 'inántankëxun,
kana amiribishi utëkëkin champun pitëkëan akamaribi inánti 'ain, 'inanxunbi kana utëkënkia champun pía a 'inanxunbi kana anuishi sënë́nkian champun pía aribi 'inántëkënti 'ain.
'Ën kana suntárukaman ñu masókë usaribi okin 'anun mitsunu xuakën.
26 Mitsun kamina 'itsaira ñuñu 'ixun
puchákin pikin mitsun 'Ibu Dios 'ikë 'ë rabikanti 'ain,
'ën kana mitsu ñu chaiirabu 'axunin.
Usa 'ain ka 'ën unikamax katë́kë bërútëkëntima 'ikën,
27 'imainun kamina Israel unikama mitsun 'unánti 'ain,
'ëx mitsun Dios 'aish mitsubë 'ain,
'ëx kana mitsun Dios a 'ain, usa 'ain ka bëtsi 'ësaribi 'aíma 'ikën.
¡Usa 'ain ka 'ën unikama uínsaranbi rabinkë bërútima 'ikën!
Dios aín Bëru Ñunshin aín unikama 'inánkatsi kia bana
28 Usakin ënë ñukama pain 'atankëxun kana 'ën
Bëru Ñunshin kamabi uninu xuti 'ain:
Usa 'ain ka mitsun bakë bëchikë bëbukama 'imainun ini bëchikë xanukama atun 'ën bana ñuiti 'ikën,
'amainun ka uni xënikaman namákin isti 'ikën,
'imainun ka uni bënábu atúnribi namákësa okin isti 'ikën.
29 'Imainun kana an mitsu ñu mëëxunkë uni
'imainun xanukama atunurubi 'ën bëru ñunshin a nëtëkaman xuti 'ain;
30 Usokin 'akin kana 'ën kushi ismikin
ñu chaiirabu 'akin imi tsi
rëkirukë 'imainun nëtë kuin tëxëkirukë akama 'imiti 'ain.
31 Usa 'ain ka bari pë́kaima bënamainun
'uxën pëkakë axribi imi 'iti 'ikën,
usai ka Diosan nëtë chaiira ax ami rakuë́ti 'iti 'ikën.”
32 'Aínbi ka kamabi unikama an Nukën 'Ibun anë rabikë
atun bamatinuax ië́ti tanti 'ikën,
usa 'ain ka aín bashi Sión kakë Jerusalénnu 'ikë anu ka anua atux ië́ti 'iti 'ikën.
Nukën 'Ibu usai ka 'iti 'ikë kiax kiásabi oi.
Usa 'ain ka an kaískë unikamax bamanuxbi tsókëpan 'iti 'ikën.