Diosan axa ami nishkë unikama tëmëramikëbëa aín unikamax upitax tsóti ñuikë bana
3
“Ësai ka Dios kiaxa: Uínsaran nëtën karana axa ami nishkë unikaman tëmëraminuxun 'ain menuuan 'ën unikama bëtëkëni anun ka Judá menu 'ikë 'imainun Jerusalén ëmanu tsóti 'ën unikama utëkënti 'ikën.
2 Usakin 'anan kana axa atumi nishkë bëtsi menu 'ikë unikama,
timëbiankin Josafat kakë me sapan anu uanti 'ain, anuxun kana uisakin karana 'aisatani usakin 'ën unikama Israel 'asaribiokin 'ati 'ain. (Josafat kikë bana ax ka Diosan uisa kara oisatania usakin 'ati kikë bana 'ikën.)
Atun ka 'ën uni Israelkama bëtsi bëtsi menu abístanun 'imianan,
'ën atu 'inánkë me 'inánankin bikankëxa.
3 Usakin 'akin ka ñuratsu amo rabë́bi kuënëoxun anun pain tantankëx, 'ën unikama 'inánankëxa,
usakin 'anan ka bëbu tuákama 'imainun xanu tuákamaribi marukankëxa,
usakin 'atankëxun ka atu marukia bikë kuríki anun
uvas baka paëokin 'akë a maruxun xëanan bëtsi bëtsi unin aín nami 'akë xanukamaribi aín nami 'axun kupíokëxa.
Dios ëmakama uisa kara okatsia usokin 'akatsi kia bana
4 ¿Añu kaina Tiro, Sidón ëmanu 'ikë 'ianan Filisteokaman menu 'ikë unikama mitsun 'ëbëtan kuëënin? ¿Mitsun kaina 'ë 'atima oti sinánkanin? ¿Añu kaina ënua bisatankanin? ¡'Ën kana bënë́kinshi uisokin karana 'aisatani usakin mitsu tëmëramiti 'ain! 5 Mitsun kamina 'ën manë uxua, 'imainun kuri akama mëkamakën, 'ianan kamina ñu kupikëirabu 'ianan upíirabu a mitsun dios anuxun rabiti xubukamanu buánkën. 6 'Ianan ka axa ami nishkë unikaman Judánu 'ikë unikama 'ura buánan Jerusalénnu tsókë unikama an ñu mëëmikin tëmëraminun griego unikama maruakëxa. 7 'Aínbi kana 'ën mitsun marua 'aísha anu 'ikaniabi atu chikínkin atux 'iásaribitimi mitsúxribi tëmëranun 'imiti 'ain. 8 Usakin 'anan kana atun bakë bëchikë bëbu 'imainun ini bëchikë xanukama Judíos unikama marunun 'amiti 'ain, 'amikëxun ka atun 'uraira menu tsókë sabeo unikama a marutëkënti 'ikën. 'Ëx Dios 'aish kana ësai kin.”
9 Ësai ka Dios kiaxa: kamabi ëmanu 'ikë unikama ka ësokin kati 'ikën:
¡Kamabi aín suntárukamaxa Diosan unikamabë 'akananux mëkëti mëníokanun ka kati 'ikën!
¡Axa 'akánanti rakuëma suntárukama a kamina kuënti 'ain!
¡Usakin 'akëx ka 'akánanti 'unairakama ax abi rëkuë́nkiani 'akanani kuanti 'ikën!
10 Kuakin ka atun manë sëbía chaxkë́ a manë xëtokin anun 'akánanti 'anan,
machitusa tëntuñukama aribi atun masínbu 'ati 'ikën,
usakin 'amainun ka ñuumara ka kixun iskëkama atux kiti 'ikën: “¡'Ëx kana kushi 'ain!”
11 Kamabi ëmanua 'ikë unikama a 'urama 'aísha atumi nishkëkama atux,
¡bënëtishi timë́kuatsini 'akanani 'uti 'ikën!
¡'Imainun ka uni upí sinánñu axa 'akánanti kuëënkëmakama atúnribi ka 'akánanti sinánti 'ikën!
12 Kamabi ëmanu 'ikë unikama a
'urama 'ikë atumia nishkë ax ka
mëníokakiani Josafat kakë me sapan anu kuanti 'ikën,
anuxun ka Diosan axa atumi nishkë a 'urama 'ikë unikama uisa kara oti 'ikë a istankëxun usokin 'ati 'ikën.
13 Atux ka 'atima ñuira 'akë unibu 'ikën,
usa 'ikë ka trigo bimi pëkë́kë tëakin
bikësaribi okin 'ati 'ikën;
usa 'ain ka anun biti nëtë 'ikëbëtan bikëxa trigo bimi nëtë́kë usaribi okin 'anan,
uvas bimi aín baka vino 'ati bitishi 'ikë chakakë usaribi okin 'akánti 'ikën.
14 'Itsaira unika anuxun uisakin kara 'ati 'ikë kixun sinánkë me sapan anu,
Diosan nëtë ka 'urama 'ikë usa ain.
15 A nëtë 'ikëbëtan ka bari, 'uxë 'imainun 'ispa
akaman pë́katima 'ikën.
16 Uínsaran kara Dios munuma banai kaná banakësari aín bashi Sión kakë anuax 'ianan
Jerusalénnua 'ia kuakania anun ka
naíkamë 'ëo 'imainun mekama shaíkiti 'ikën.
'Aínbi ka Diosan Israel unikama ami katamëtia 'akinti 'ikën.
Judá menu 'ikë unikama usai 'iti ñuikë bana
17 Mitsun kamina 'unánnuxun 'ain 'ëx kana Dios aín bashi Sión kakë anu 'i kixun.
Jerusalén ax ka achúshi ëma upíira upí 'iti 'ikën:
Usa 'ikë ka uínsaranbi bëtsi
menu 'ikë unikaman bitëkëntima 'ikën.
18 Usa 'ain ka a nëtë 'ikëbëtan Diosan
ñukama sënë́onkë 'ain,
a menu piti ñu 'imainun a xëati
ñukama 'itsaira 'aish aín bashikama 'imainun me sapankama anua 'umpax iskësaira 'iti 'ikën.
'Imainun ka Judá menu 'ikë xëxákama ax 'itsaira 'umpaxñu 'iti 'ikën.
'Imainun ka anuxun 'ë rabiti xubu anuax achúshi xëxá upíira chikíkin ka Sitim kakë me a chabóti 'ikën.
19 Usai 'ikëbë ka Egipto me ax rurupakin 'atima okë 'iti 'ikën,
'imainun ka Edom kakë axribi anu uni 'ikëma mesa 'iti 'ikën.
Atun ka Judánu 'ikë unikama ñu 'atima
'akëmabi 'akin aín menubi aín 'imi 'apamikin 'akëxa.
20-21 Usa 'ain kana 'ën an ñu 'atima 'akëma uni akama kana 'aima kikínma 'ati 'ain.
'Aínbi ka Judá 'imainun Jerusalén ax anu uni tsókë 'iti 'ikën,
'imainun kana 'ëx Dios 'aish aín bashi Sión kakë anu 'iti 'ain, kiax ka Dios kiakëxa.