3 Usa 'ain ka ësokin 'ë kakëxa: ¿Min sinánkëx kara ënë xokama amiribishi unitëkënti 'ik? Kixun kakëxun kana 'ën kakën: 'Ën 'Ibu minshi kamina unan. 4 Ësokin kakëxun ka Diosan 'ë kakëxa: 'Ën anë ñuikin kamina ënë xokama uni kakësokin kati 'ain: Xo ëskikëkaman kamina ësai ka Nukën 'Ibu kiaxa kuati 'ain.

5 Nukën 'Ibun ka ësokin mitsu kaia: 'Ën kana amiribishimi mitsux uni 'itëkënun mi uin 'inánti 'ain, usakin 'akëx kamina uni 'itëkënkanti 'ain. 6 Usakin 'imikëx kamina punuñu 'ianan, namitëkëni bëxitan maputi uni 'itëkënia anun tsóti suñu mi 'inánti aín, usokin 'akëx kamina amiribishi tsótëkënti 'ain. Usakin 'akëxun kamina mitsun, ax ka Nukën 'Ibu Dios 'ikë kixun 'unánti 'ain.

7 'Ën kana unin xokama a Diosan usakin kanun kakësabiokin kakën. Usakin xokama a kakinbi kana achúshi ñu munuma kushi banai 'ikësai 'ia kuakën, usai 'ikëbë ka xokama ax bëtsibë bëtsibë biranani timë́akëxa. 8 Usai timëtia atun punu iruanan, aín namikama 'ia aín bëxitan mapuia kana isakën. 'Aínbi ka anúan tsóti aín uinñuma pain 'iakëxa.

9 Usa 'ain ka Diosan 'ë kakëxa: 'Ën anën kamina suñu xo unikëkama kati 'ain: Ësai ka Dios kiaxa: Au bari urukë amiax umainun, amia bari kuabúkë amiaxribi umainun ain tsipúmiax umainun, aín rëbumiaxribi ka anuan ñua unikama uinti suñu uti 'ikën. 10 Usa 'ain kana 'ëx Diosan usai 'inun kakësabi oi 'iakën, usai 'ëx kikëbëshi utankëx ka anun uni tsóti suñu ax utankëx atunu 'iruakëxa, 'irukëbë ka uni 'ikësai nirukankëxa. Atux ka 'itsaira suntárukama iskësa 'iakëxa.

11 Usa 'ain ka Diosan 'ë kakëxa: Israel unikama ax ka ënë xokamasaribi 'ikën. Usa 'aish ka atux ësai ki nitsia: Nun xokamax ka 'itsaira paëia, usa 'ain kananuna nukamax uisa ñu upibi kainima nëtë́kësa 'ain. 12 Asábi ka usa 'ain kamina 'ën anë ñuikin atu kati 'ain: Ësai ka Dios kiaxa: 'Ën unikama anumi mitsux bamakësa 'aish bukukë me anua kana mitsu chikínti 'ain, usakin 'axun kana Israel unikaman menubi mitsu buántëkënti 'ain. 13 'Imainun kamina uisaran kara anuax tëmëranun maían 'ixun akësokin mitsu chikini anun 'ën unikama 'ixun, 'ëx kana Dios 'ai kixun 'unánti 'ain. 14 Usa 'ain kamina 'ën mitsu anun tsóti uin 'inánkë amiribishi tsótëkëkanti aín; usakin 'atankëxun kana mitsun menubi tsónun mitsu 'imiti 'ain. Usakin 'akëxun kamina 'ëx Dios 'ixun kana 'ëx kikësabiokin an kixun 'unánkanti 'ain. 'Ëx mitsun 'Ibu asérabi 'aish kana ësai kin.

15 Nukën 'Ibu Diosan ka ësokin 'ë kakëxa: 16 I tukakë aín paná bixun kamina anu kuënëoti 'ain: Judá 'imainun abëa 'ikë Israel unikama'. Usakin 'atankëxun kamina bëtsi i tukakë aín panáribi bitankëxun anu kuënëoti 'ain: José a Efraínsa 'inun 'anan kamina, Israel unikama raíri aribi anu kuënëoti 'ain. 17 Usakin 'akinshi kamina achúshisaishi 'itánun bëtsimi bikin min mëkënan tuinti 'ain. 18 Uínsaran kara min aintsikaman uisai kikë kara ax 'ikë kixun mi ñukati 'ikën: Anun kamina uisai kikë kara ax 'ikë kixun ñuixunti 'ain', 19 ñuixunkin kamina ësakin kati 'ain: Ësai ka Dios kiaxa: 'Ën kana Josénan 'ikëbia an bikëx Efraínën mëkënu 'ikë i tukakë a biti 'ain, 'imainun kana bëtsi ñaká abëa 'ikë Israel unikama atunanribi biti 'ain, bitankëxun kana a ikama Judánu 'ikë i akëñun achúshishi 'itanun 'ën mëkënu timëti 'ain, kixun kamina kati 'ain. 20 Usa 'ain kamina mi tuinkë 'i rabë́ anumi kuënëokë a atun istisabi 'itanun min mëkënu tuinti 'ain.

21 Usakin 'atankëxun kamina atu kati 'ain: Ësai ka Dios kiaxa: 'Ënbi kana Israel unikama anua 'ikë ëma kamanuabi bëtëkënti 'ain; bëkin kana me kamanuabi timëbëtsinkin atun menubi bëtëkënti 'ain. 22 Usakin 'akin kana atúxa achúshi ëmaishi ënë menu 'ia, Israel me kamanu tsótibi achúshi 'apuñushi 'inun 'imiti 'ain. Usai tsóti ka amiribishi rabë́ ëma 'inun 'itëkëni ënanantëkëni, rabë́ 'apuñu 'itëkëntima 'ikën. 23 Usai 'ika amiribishi ñu 'atima 'atëkënkin bëtsi dioskama rabitëkëanan bëtsi ñukama 'airibi 'uchatëkëntima 'ikën. 'Ën kana 'ën kuëënkëma 'atima ñukama 'ai 'ëmi 'uchakëkama a tërënxunti 'ain. Usa 'ain kana atúxa 'ën uni 'imainun 'ëx atun Dios 'iti 'ain.

24 'Ën uni David aín rëbúnki achúshinëx ka 'apu 'ianan, an atu bërúankë uni achúshishi 'iti 'ikën, usa 'ixun ka an Diosan bana kikësabiokin 'ati 'ikën. 25 Usokin 'ai ka 'ën uni Jacob 'inan me anua aín chaitiokëkamaxribi anu tsóa me anuribi tsókanti 'ikën. A menu ka xënibua 'aínbi atu 'imainun atun bakë bëchikëkamaribi 'imainun atun rëbúnkikamaribi tsóti 'ikën; usai 'imainun ka 'ën uni David aín rëbúnkinëx xënibua 'aínbi atun 'apu 'iti 'ikën.

26 Usa 'ain kana atubëtan achúshi ñu 'upitax atux bukuti a kupí 'ati 'ain. Ax ka xënibua 'aínbia 'iti achúshi ñu 'ën mëníokin 'akë 'iti 'ikën. Usakin 'akin kana aín 'aintsikama 'uakamë 'ëonun 'imianan, xënibua 'aínbia atu nëbëtsi anuxun 'ë rabiti xubu upíira 'anun 'amiti 'ain. 27 Usai 'ëx atubë 'i atun Dios 'imainun, ka atúxribi 'ën unikama 'iti 'ikën. 28 Uínsaran kara anuxun 'ë rabiti xubu upíira ax xënibua 'aínbi atu nëbëtsi 'itiokin 'akë 'iti 'ikën, anun ka bëtsi menu 'ikë unikaman 'unánti 'ikën, 'ën kana Israel unikama 'ën ñu upíira 'akësokin kaisakën kixun.