Diosan ka aín unikama timëtëkënti 'ikë kikë bana
36
16 Nukën 'Ibu Diosan ka ësokin 'ë kakëxa: 17 “Israel unikaman ka aín menu tsókin anuxun ñu 'aisama 'ati 'aímabi bëtsi ñukama 'akin atun me 'atimokëxa, usai 'ia atux tsókë ax ka 'ën iskëx ñu chuarukësa 'ianan, xanuxun aín nëtë sënë́nkëbëtan pëi machakë usaribi 'iakëxa. 18 Usa 'ain kana 'ëx atumi xuamati nishakën, atúan bëtsi unikama a menuxun 'akin, 'ë rabikinma unínbia 'akë ñukama rabikë akama kupín atumi nishakën, 19 nishkin kana atun ñu 'atima 'akë kupín 'atimokin bëtsi ëmakamanu kuani abístanun 'imiakën. 20 'Aínbi ka uinu 'ikë ëmanu kara bëbaia anuax anu 'ikë unikama 'ën anë ñui 'atimati banakankëxa: Usa 'ain ka ënë unikamax ka Diosan unibu 'ikë 'aíshbi ka atun menuax chikíaxa kiax atu isi kikankëxa. 21 Usa 'ain kana uinu kara Israel unikama bëbaia anuxua 'ën anë upíira 'ikëbi 'atimakin ñuikankëbë anun 'itsaira nishakën.22 Usa 'ain kamina ësokin Israel unibu kati 'ain: Ësai ka Nukën 'Ibu Dios kiaxa: 'Ën bërí 'ati ñukama ax ka Israel unikama mitsu kupín 'akëma 'iti 'ikën, ax ka 'ën anë ami upíira 'ikëbë bëtsi bëtsi ëmanu kuankin 'aisama ñu 'akin 'atima okan a kupín 'akë 'iti 'ikën. 23 'Ën kana bëtsi bëtsi ëmanu 'ikë unikama 'ën anë chaiira upí a ismiti 'ain, mitsun kamina atunuxun 'ën anë 'atima okankën; usakin 'akëbëtan ka bëríra 'ëx kana 'ain 'Ibu 'ai kixun 'unánkanti 'ikën. 'Ëx Dios 'aish kana, asérabi ësai kin.
24 'Ën kana a menu 'ikë ëmakamanua mitsu chikínti 'ain, chikínxun kana mitsun menubi timë́nun bëtëkënti 'ain. 25 Bëxun kana 'umpax upitan chukakësa 'itánun 'akin mitsun ñu 'atima 'akëkama a mëníoxuanan, unínbia 'axun rabikë ñukama rabikëxuan an mitsu tsaikë akamaribi mëníoxunti 'ain, 26 usakin 'akin kana 'ën mitsux 'atimati tsókë a mëníokanun 'imianan upíokin sinanimi tsónun 'imiti 'ain. 'Imikin kana mitsun nuitu iruarakë a ëmikin mitsun nuitu ñu bachusa 'aimi 'ën kakëxun 'ën bana kuanun 'imiti 'ain. 27 'Imianan kana 'ën Bëru Ñunshin mitsu 'inánkin 'ën bana a tantikama kikësaibimi 'inun mitsu 'imiti 'ain, 28 usa 'ain ka aín chaitiokëkama 'ën 'inan me anu tsókanti 'ikën, usai tsóti 'ën unikama atux 'imainun kana 'ëx atun Dios 'iti 'ain. 29 Usakin 'imikin kana amiribishi 'atima ñu 'ai 'uchatëkënun 'imikinma atun piti 'itsaira trigo 'inun 'imikin, panani tsónun 'imitëkëntima 'ain. 30 'Ianan kana axa bimikë ikama 'itsaira bimiñu 'imianan, mitsun 'apákë ñukama 'itsaira bimiñu 'i tuánun 'imiti 'ain, usakin 'akëbë kamina bëtsi bëtsi menu 'ikë unikaman ismainun panani 'i amiribishi rabintëkënkantima 'ain.
31 'Imainun ka uínsaran kara atux 'atimati tsóanan ñu 'atima 'ai, 'uchaxa akama sinania anun rabinkanti 'ikën, usai 'ikin ka 'atimai ñu 'ai 'uchai tsókë a sinánkanti 'ikën. 32 'Ëx Dios 'aish kana asérabi ësai kin: Israel unikama mitsun kamina 'unánti 'ain, 'ën kana mitsu usakin ñu 'axunti kupín 'aiman; usa 'ain kamina mitsunmi ñu 'atima 'akë anun rabini ñuumasara 'ikanti 'ain.
33 'Ëx Min 'Ibu 'aish kana ësai kin: Uínsaran karana 'ën mitsun 'uchakama mëníoxunti 'ain, anun kana amiribishimi mitsun ëmakamanu tsótëkënun 'imiti 'ain, 'imikëxun kamina axa mimi nishkë unikaman rurupa 'ikëbi 'atëkëni anu tsónun 'imiti 'ain. 34 'Imainun ka mekama anun inukian unin anu uni 'ikëma mesa iskë a, anu tëëkin ñu 'apákankë iskanti 'ikën. 35 Usakin mitsun 'akë isi ka ësai kikanti 'ikën: Ënë me anu uni 'ikëma mesa iskan ax ka bërí, Edén kakë menu naësa 'ia usaribi 'ikën; usa 'ain ka anu 'ikë ëmakama ami nishkë unikaman masókin rurupakan 'ikëbi bërí, amiribishi 'atëkëntankëx 'itsa uni anu tsotia kiax kikanti 'ikën. 36 Usa 'ain ka axa mitsu 'urama ëmakamanu tsókë unikama atun 'unánti 'ikën, 'ëx Dios 'ixun kana amiribishi axa ami nishkë unikaman atun ëma rurupa 'ikëbi 'amitëkëanan, me ëankama anua amiribishi ñu 'apátëkënun 'amian. 'Ëx Min 'Ibu 'aish kana ësai kin.
37 'Ëx Min 'Ibu 'aish kana ësai kian: Usa 'ixun kana 'ëx kikësabiokin bëtsi ñukamaribi 'axunti 'ain. 'Axunkin kana Israel unikama añu 'axúnun kara 'ë ñukatia a ñukama 'axunkin; aín unikamaxa 'aisamaira 'ia ñuina 'arakakëx 'ikësai, kaikamë 'ëonun 'imiti 'ain. 38 'Imainun ka axa ami nishkë unikaman atun ëma masó anua tsókë unikama ax 'aisamaira 'inun kaiti, ovejakama fiesta 'akin anuxun rëxun xaroti Jerusalénnu buánkin timë́kë usaribi 'iti 'ikën. Usakin 'akin ka 'ëx kana Dios 'ai kixun 'ë 'unánkanti 'ikën.”