Ezequielnëx an Israel unibu 'atimokin bërúankë unikama ñui kia bana
34
Nukën 'Ibu Diosan ka 'ë kaxa: 2 “Mix uni 'ixun kamina 'ë ñuikin an, Israel unikama bërúankëkama kati 'ain: Ësai ka Dios kiaxa: ¡An Israel unibu bërúankë unikama ax ka atuxi bërúankatia! Usa 'ain ka an bërúankë unikaman aín ñuina bërúankë usaribi 'ixun 'ën uni bërúanti 'ikën. 3 Mitsun kamina atun 'apu 'ixun an ñuina bërúankë unían aín ñuinanën xuma xëanan, aín rani bixun chupa 'axun pañukësa usakin 'anan, oveja xuairabu akama rëtëin, 'aínbi kamina mitsun ñuina 'arakakëkama upíokin bëruaima. 4 Mitsux kamina an ñuina bërúankë unia aín ñuina bërúankinbi 'insíanxa kushikëma akamaribi ronkima 'anan axa aín taëmi ñuax tatimakë a nëaxunkëma usa 'ianan, axa amami kiax nëtë́kë a barixun upioxun bëkima rishkikin 'atima okë usaribi 'ain. 5 Usaribiti ka Israel unikama 'ën ovejakamasa 'aish an bërúanti uni 'aíma 'ain abísakëxa, usai 'ia ka raëkëma ñuinakan ñuina pikësa usaribi 'inun ami nishkë unikaman 'akëxa. 6 Usakin 'akëx ka amami amami kuani aín bashikama 'imainun matá me kamanu kuani 'ianan, mekamanu kuani abisi nëtë́akëxa, usai 'iabi ka uínbi ami sinánkin 'akinuxun baritisama tankëxa.7 Usa 'ain kamina mitsux an ñuina bërúankë unisa 'ixun 'ën banakama 'upiokin kuati 'ain. 8 Usa 'aínbi kana 'ëx ñutimoi tsókë 'aish ësai kin: Axa pianankë bëtsi bëtsi ñuina raëkëman 'akësokin ka axa ami nishkë unikaman, 'ën ovejakamasa 'ikëbi an bërúanti uni 'aíma 'ain. Ñuina raëkëman ñuina bixun pikësa 'inun 'axa. Mitsux 'ën ñuina bërúanun nankësa 'ixunbi kamina 'ën unikama bëruaiman. An ñuina bërúankë unikamax ka atúxbi bërúankatia, usa 'aínbi ka 'ën ñuina kamasa 'ikëbi Israel unikama bëruaima. 9 Usa 'ain kamina, an ñuina bërúankë unisa 'ixun 'ën bana kuati 'ain, 10 'ëx Dios 'aish kana usai kin: Mitsux an ñuina bërúankë unikamasa 'ain kana 'ëx mitsumi nishkë unisa 'ain, usa 'ixun kana Israel unikama 'ën ñuinasa 'ikëbi bërúankëma a ñuikin mitsu kati 'ain; bërí kana bërúanxuma 'anun mitsu bikuanti 'ain, usa 'ain kana axa 'ën ovejakamasa 'ikë bitëkënti 'ain, mitsun pikinshi këñutima kupín, kiax ka Dios kiakëxa.
Dios ax ka an ñuina 'arakaxun upíokin bërúankë unisa 'ikë kikë bana
11 'Ëx Dios 'aish kana ësai kin: 'Ënbi kana 'ën ñuina 'akësaribi okin Israel unikama bërúanti 'ain. 12 An ñuina bërúankë uníxa aín ovejakama abisi nëtë́an ami sinánkësaribi oi kana 'ëx 'ën unikamaxa ovejasa 'ain ami sinánti 'ain; usai atumi 'ikin kana achúshi nëtë́an atumi nishkë unikaman nëtë tunankuatsinkësa usairibi 'ikin axa atumi nishkë unikaman bibiankin anu buan me anuabi atux timë́nun 'imitëkënti 'ain. 13 Usakin 'akin kana bëtsi unin ëmakamanuabi atu, timë́nun 'imikin aín menubi kuanun 'imiti 'ain. 'Imikin kana anua aín aintsi 'ibu 'ikë bashi mekama, 'imainun xëxákama 'imainun anua uni 'ikë me anubi atu buántëkënti 'ain. 14 Usakin 'akin kana anuaxa upíokin pi bukunun atun menua 'ikë aín bashikama anubi atu buánti 'ain. Anuxun ka upiti bukukin upíokin piti nëishokin 'axun piti 'ikën. 15 'Ënbi kana 'ën unikama an ñuina bërúankë unin 'akësokin bërúanti 'ain, 'imainun kana 'ënbi tantinun 'imiti 'ain. 'Ëx Dios 'aish kana ësai kin. 16 'Ënbi kana 'ën unikama ovejakama 'arakakë 'ikësaia amami amami kuani nëtë́këkama a bëtëkënti 'ain, bëkin kana axa 'insínkë akamaribi ronkin chupa sanin aín taëmi ñukë tëkërëkaxuanan, axa ñusmakëkamaribi kushinun bërúanti aín, 'anan kana xuabu 'imainun aín kushibu akamaribi bërúankin. 'Ën kamabi atu bërúanti 'ain.
17 'Ëx Dios 'aish kana ësai kin: Mitsux 'ën ovejakamasa 'ixun kamina 'ën bana kuati 'ain. Usa 'ain kana uin kara carnerosa 'ixun ñu upíokin 'akë a 'imainun an cabrasa 'ixun ñu 'atima 'akë mitsunu 'ikë unikama usokin anun 'ati nëtë 'ikëbëtan amo bukunati 'ain. 18 Mitsu raírinën kamina Israel unibu mitsun 'aintsi 'ikëbi 'atimokin ovejakaman aín upíbushi pasto pianan axa tikikë a aín taën amákin chakapakësa okin 'anan. 'Umpax upí xëakinbia aín taën, chubëopakë usaribi okin 'ain. 19 'Imainun ka mitsun 'aintsi Israel unibu raírinën mitsunmi pikin chakapakë pasto pianan, 'umpax mitsunmi xëakin chubëopakë aribi xëati 'ikën. 20 Usa 'ain kana 'ëx Dios 'aish ësai kin: 'Ën kana mitsúxmi oveja xuábukamasa 'ikë uisakin karana 'ati 'ai kixun isanan oveja chumínbukëkama akamaribi uisa karana oti 'ai usokin 'ati 'ain. 21 Mitsun kamina mitsun aintsi axa ñuumasara 'ikë, bëtsin aín manchatan 'akëxa ñuina abákësa usaribiti abátanun abámikan. 22 'Aínbi kana 'ën ovejakamasa 'ikë 'ën unikama bërúanti 'ain. Bërúankin kana mëkamakinshima këñuia usa 'ain bërúanti 'ain. 'Ën kana 'ën unikama oveja raírikama 'akësokinma aín aintsikaman 'atima oia bërúanti 'ain. 23 'Ën kana 'ën uni David axa utëkënun bëti 'ain, a kana axëshi 'apu 'ixuan 'ën unikama bërúanun 'imiti 'ain, 'imikëxun ka an ñuina bërúankë unisa 'ixun 'ën unikama bërúanti 'ikën. Ax ka an atu bërúankë unisa 'iti 'ikën. 24 'Ëx Dios 'aish kana atun Dios 'iti 'ain, 'imainun ka 'ën uni David atun 'apu 'iti 'ikën. 'Ëx Dios 'aish kana ësai kin.
25 'Ën kana 'ën unikamabëtan achúshi ñu 'ati 'ain, usakin 'akëbë ka atux upitax tsóti 'ikën. Usai 'ikëbëtan kana raëkëma ñuinakama a menuax nëtënun 'imiti 'ain, usakin 'imikëbë ka 'ën 'arakakë ñuinanëxa aín pastonu bukukë usaribiti uinu kara tsotia anu upiti 'uxi bukuti 'ikën. 26 'Ën kana 'ën unikama ñuina 'arakakë 'ikësa 'ikë 'ën bashi upí kakë anu bukunun 'imikin upíokin sinánxunti 'ain, 'akin kana anun 'iti nëtë 'ikëbëa 'uñe atunu 'ibúnun upíokin sinánxunti 'ain. 27 Usai 'ikëbë ka axa bimikë ikamax 'itsaira 'inun bimiti 'ikën, 'imainun ka menu 'apákë ñukamax 'itsaira 'inun tuati 'ikën, usakin 'akëbë ka atux aín menubi a pi upiti tsókanti 'ikën. Uínsaran karana 'ën unikama an tëmëramikë unikamanua chikinin anun ka 'ëx kana atun Dios 'ai kixun 'unánkanti 'ikën. 28 Usa 'ain ka bëtsi ëmanu 'ikë unikaman atu 'ibuatëkëntima 'ikën, 'imainun ka raëkëma ñuinakamanribi atu pitëkëntima 'ikën. Usa 'ain ka uínbi rakuëokëma upitax tsókanti 'ikën. 29 Usa 'ain kana 'ën atun menuaxa 'apákëx 'itsaira ñu biminun 'imiti 'ain, usakin 'imikëbë a piti ñu 'itsa 'ain numin 'i tëmëratëkëntima 'ikën, 'imainun ka bëtsi menu 'ikë unikama atumi kuai banatëkëntima 'ikën. 30 Usa 'ain ka atun 'unánti 'ikën, 'ëx atun Dios 'aish kana atubë 'ai kixun, 'imainun ka Israel unikamax 'ën uni 'ikën. 'Ëx Dios 'aish kana ësai kin. 31 Mitsux kamina 'ën 'arakakë ñuinakamasa 'ain, usa 'aish kamina 'ën 'arakakë ñuinakama 'ën menu 'ikësa 'ain. 'Ëx Dios 'aish kana ësai kin. 'Ëx kana atun 'Ibu 'ain.”