Diosan Ezequiel an bërúankë unisa 'ixun ain aíntsikama bërúanun ká bana
33
Nukën 'Ibu Diosan ka 'ë kakëxa: 2 “Min kamina min 'aintsikama ësakin kati 'ain: Uínsaran karana 'ën mitsubë 'akánanti bëtsi menu 'ikë uni xuti anun ka anu 'ikë unikaman achúshi uni an bërúanti uni bariti 'ikën. 3 Usokin 'akëxun ka an bërúanti anëkë unin an ka ami nishkë unikaman suntárunën atux anu 'ikë me 'urama obëtsinia iskin, aín aintsikama mëníokatanun aín manë banañu banoti 'ikën. 4 'Aínbi ka uin kara manë banañu banoia kuakinbi kuakëmasa oia ax ka ami nishkë unikaman ami bëbarukin 'akëx bamati 'ikë, ax ka aín 'uchabi 'iti 'ikën, 5 usa 'aínbi ka a uni manë banañu banoia kuakinbi kuakëmasa oxa; usa 'aish ka ax bamakëxbi aín 'uchabi 'ikën, an manë banañu banókë an banoia kuati bërúankax kuni ië́kë 'itsíanxa. 6 'Aínbi ka an bërúanti nankë uni an axa atumi nishkë unikaman suntáru bëbaia iskinbi, unia mëníokatanun aín manë banañu banokëma 'ain ka axa ami nishkë unikama atumi bëbarukin bëtsi unibi 'ati 'ikën, 'akëx bamakë ax ka aín 'uchabi 'iti 'ikën, 'aínbi kana an bërúankë uni a ñukë 'ain, uisa kupín kara a uni ñuaxa kixun ñukáti 'ain.7 'Ën kana an bërúankë unisa 'ixunmi Israel unikama bërúanun mi 'imian. Usa 'ixun kamina 'ën kakë banakama kuantankëxun min unikama ñuixunti 'ain. 8 'Ëx kana uni 'atima sinánñu achúshi ka bamati 'ikë kiax kiti 'ain; ax ka asábi 'ikën, usa 'aínbi kamina min abë banakin aín tsóti mëníokanun kati 'ain, usakin kakëxubi ka a unin min kakë bana kuatima 'ikën, usai 'ika a uni aín 'uchakë anunbi bamati 'ikën, usa 'aínbi kana 'ën mi a uni bamakëbëtan uisa kupí kara a uni bamaxa kixun mi ñukáti 'ain. 9 Usakin min 'ain ñu 'atima 'akëkama ënun kakëxunbi ënkinma ñu 'atima 'ai, 'uchai anunbi bamakë ax ka aín 'uchabi 'iti 'ikën, usaía ax 'ikë 'aínbi kamina mix ië́kë 'iti 'ain.
Diosan ka upiokin ñu 'aia kikë bana
10 Mi unin kamina Israel unikama ësokin kati 'ain: Mitsux kamina ësai kin: Nukamax kananuna ñu 'aisamaira 'ai 'itsaira 'uchan. Usa 'ain kananuna nux 'uchakë anunbi tëmërai chë́kibuti tsókësa 'ain. ¿Usai 'i karanuna nux 'upitax tsóti 'ain? 11 Usa 'aínbi kana 'ëx Dios 'aish atun tsóti ñui ësai kin, 'atima sinánñu unikama ñuti kana 'ëx kuëëniman usa 'ain ka atun 'akë ñu ëni upitax tsóti 'ikën. Israel unikama 'atima ñu 'aimi tsókankë akamina ënti 'ain. ¿Uisa 'aish kara usakin ñu 'ai ñukanti 'ik?
12 Mi unin kamina min 'aintsikama ësokin kati 'ain: Achúshi uni upíokin ñu 'akë 'uchaia ka an bërámabi 'akë ñu upí anbi ië́mitima 'ikën, 'imainun ka achúshi uni an ñu 'atima 'akë a ënti 'ikën, usa 'ain ka bëráma ax 'uchakin ñu 'atima 'akë a kupí bamakë 'itima 'ikën. Achúshi uni upíokin ñu 'akë 'uchaia ka an bëráma 'akë ñu upí anbi basi tsónun 'imitima 'ikën. 13 'Ën kana an ñu upí 'akë uni achúshi upitia tsónun kati 'ain, usakin kakëx upiti tsókima ka anbi kuëënkin ñu 'atima 'ati 'ikën, usakin 'akëbëtan kana an 'akë ñu upíkama a upíokin ka an ñu 'axa kixun sinántima 'ain, usa 'ain ka an ñu 'atima 'akë anunbi bamati 'ikën. 14 Usa 'ain kana 'ëx uni achúshi an ñu 'atima 'ai 'uchakë ax ka bamati 'ikë kiti 'ain, 'aínbi aín 'uchakë a ënkin ñu upí 'akin, 15 bëtsi uninua 'inantëkënuxun bikë ñu aribi 'inánkin mëkamakë aribi 'inánti 'ikën, usakin 'akin ñu 'atima 'akë akama ënika, 'ën bana kikësabiokin 'ai bamaima tsóti 'ikën. 16 Usakin ñu upí 'ai bërí upiti tsókëbëtan kana, an ñu 'atima 'ai 'uchakama achúshirabi sinántëkëntima 'ain. 17 Min aintsikamax ka ësai kiti 'ikën, 'ën kana ñu upíokin 'aima kiax kiti 'ikën; 'aínbi ka atúnbi ñu upíokin 'aima. 18 Uni upí an ñu upíokin 'akë 'ixunbi a ënkin ñu 'atima 'ai ka anunbi bamakë 'iti 'ikën. 19 'Imainun ka uni 'atima sinánñu an ñu 'atima 'akë a ënkin ñu upí 'akë anbi upitax tsónun 'imiti 'ikën. 20 Mitsux kamina 'ë ñui ësai kin: Diosan ka upíokin ñu 'aima kiax kikani. 'Aínbi kana Israel unikama mitsu achúshi achúshi 'ën, uisakin kaina ñu 'akan istankëxun usakinbi mitsu 'ati 'ain.”
Babilonia ëma 'ikë unikaman Jerusalén ëmabia ñuia bana
21 Mapai rabë́ 'imainun rabë́ baritia anun nukama bibiakin nun menua uankan inúkë 'aia mapai rabë́ 'uxë ax mapai achúshi nëtë 'ikë 'ain ka achúshi uni axa Jerusalénnuax abákë an ka nun ëma ka axa numi nishkë unikaman 'ibuaxa kixun 'ë ñuixuankëxa. 22 Axa abati ukë uni ax bëbatisama pan 'ain ka a imë́ Diosan 'ë banañuma 'inun 'imiakëxa; usa 'ain ka uni axa pëkarakëma 'aínshi ukëbëtan, Diosan bananun 'imikëxun kana 'ëx banañuma 'ikë a ëankën.
Ëmanu 'ikë unikama 'ucha ñuikë bana
23 Nukën 'Ibu Diosan ka 'ë kakëxa: 24 “Axa ami nishkë unikaman rurupakin 'atimokë Israel ëmakamanu tsókë unikama ax ka ësai ki nitsia: 'Abraham ax ka achúshi unishi 'iakëxa, usa 'ixunbi ka an ënë me 'ibuakëxa; usa 'aínbi kananuna nuxira 'itsa 'ixun ënë me 'ibuati 'ain kiax ka atux kikania.
25 Usa 'ain kamina ësokin atu kati 'ain: Ësai ka Dios kiaxa: Mitsun kamina nami aín imikëñun diosmabi ñukama rabikin pin, 'ianan kamina uni 'ain. ¿Usakin 'akinbi kaina mitsux ismina me 'ibu 'inuxun 'ai kixun sinánkanin? 26 Mitsun kamina bënë́kinshi anun uni 'ati sinánkin anun 'akánanti a tuinin, kamabi unin ka bëtsi unin xanu 'aia, ¿usakin 'aínbi kaina mitsux ismina ënë men 'ibu 'inuxun 'ai kixun sinánkanin?
27 Ësakinribi kamina kati 'ain: Ësai ka Dios kiaxa: 'Ëx kana axa xënibua 'aínbi tsókë a 'ain usa 'ain kana ësai kin, axa ëmakama masókë anu 'ikë unikama atúxribi ka ami nishkë unikaman 'akë 'iti 'ikën, 'imainun kana axa ninu unëax 'ikëkama a raëkëma ñuinakama pinun 'amiti 'ain, 'imainun ka axa mapara kini uisabi oisama 'imainun kininu 'ikë akamaribi 'insinan bamati 'ikën. 28 Usakin 'akin kana a mekama anu uni 'ikëmasa 'itánun 'imiti 'ain, 'imianan kana usokin 'akëxa nux kananuna kushiira 'ai kiax rabiakakë a nëtë́nun 'imiti 'ain. Usokin 'akëx ka Israel menu 'ikë bashikama ax anu uni 'ikëma mesa 'iti 'ikën; usakin 'akë 'ain ka uinu 'ikë uníxbi anun inútima 'ikën. 29 Uínsaran karana 'ën atun me anu uni 'ikëma mesa atux 'uchakë kupin masónun 'amin anun ka asérabi kana 'ëx Dios 'ai kixun 'unánti 'ikën. 30 Min aintsi 'ibukamax ka mi ñui ëma kënëara xëpúti rapasu nitsax kianan xubu xëkuë kamanu nitsax bëtsibë bëtsibë kánani ësai kikania: An aín bana ñuiti Diosan xukë uni ñuixunkëxun usai Dios kikë bana kuati kamina rikuatsinkanti 'ain. 31 Usakin min kakëx ka 'ën unikama utankëx atux 'ikësabi min bana kuati mi bëtánain tsóbukanti 'ikën. 'Aínbi ka atun mix kikë bana tankin usakinbi 'atima 'ikën. Usa 'ixun ka mix kikë banakama a tania, 'aínbi ka a banakama uníxa xanu ñui katakësokinshi 'aia, usai 'ianan ka atun 'itsaira kuríkishi kuëënia. 32 Atun ka mix kikë bana a uníxa xanumi kantakin aín arpa mëkësokinshi 'aia. 'Aínbi ka atun mix kikë banakama a kuakinbi mix kikësabiokin 'akanima.
33 Usa 'aínbi ka atunu a ñukama 'iti 'ikën, 'ikëbëtan ka asérabi ka an Dios kikë bana ñuikë achúshi uni atunu 'iaxa kixun 'unánkanti 'ikën.”