Usokin 'atankëxi ka 'apu Sedequías Babilonianu 'ikë 'apubë banakë usakinbi 'aisama tankëxa.

4 Nueve baritia 'ikëbëa mapai rabë́ nëtë décimo 'uxë ax 'ikëbë ka Sedequías Nabocodonosor aín suntárukamabë Jerusalén 'anuxun bëararati kuanx anu bëbaxun atun ëma 'urama 'ikankëxa. Anuxun ka anun ëma kënëara kënë abi mañarakin anun 'irukianxun atu 'ati akama pain 'akëxa. 5 Usokin atu 'anuxun axa atumi nishkë unikaman ëma bëararakë 'ain ka Sedequkías mapai rabë́ 'imainun achúshi baritia sënë́mi 'apu 'ikë 'iakëxa. 6 Usai 'ikë 'ain ka rabë́ 'imainun rabë́ 'uxë 'irukëbë nueve nëtë 'ikë anun Babilonianu 'ikë suntárukamax basipain 'ikëbë anun a piti ñukama këñuakëxa, usai 'ikëbëa a piti ñu 'aimaira 'ain ka uni numin 'itsaira a ëmanuax 'ikankëxa. 7 Usa 'ain ka anun ëma kënëarakë anu kini achúshi atankëx anun abákankëxa, usa 'ain ka a ëmanuax a imë́ Babilonianu 'ikë suntárukaman bëararakë 'aínbi aín suntárukamabëbi 'apu Sedequías abánëakëxa. Abáti ka kënën bëara rabë́ okë xëkuë anun kuani 'apun xubu rapasu ñu 'apákë a ratanbiani kuankin bai bibiani Jordán kakë baka me sapan ami kikiani kuankëxa. 8 'Aínbi ka Babilonianu 'ikë suntárukaman 'apu Sedequías nuibianxun Jericónu 'ikë me sapan anua nukúkin ñatankin biakëxa. Bitsia ka kamaxunbi aín suntárukaman abati abískin ënkankëxa. 9 Usokin ñatanbiankin ka Babilonia suntárukaman 'apu Sedequías 'imainun aín bakë bëchikëkama Hamat kakë menua 'ikë ëma Riblá kakë anua Babilonianu 'ikë 'apu kuankë 'ain anu buánkëxa. Anuxun ka 'apu Nabucodonosornën Sedequías mix kamina tëmëramikë 'iti 'ai kixun kakëxa, 10 usakin 'akin ka an ismainunbia aín bëchikë bëbukama tëbískakin 'anun 'amiakëxa, 'amianan ka Judá menua 'ikë ain aintsi kamaribia 'anun 'amiakëxa. 11 'Amianan ka Sedequías aín bëru rabë́ ëchítancëxuan manë risin tëkërë kabiankin Babilonia menu anúan bamati nëtë 'itámainun sipuanuxun buánkëxa.

12 Nabucodonosornën ka an bërúankë 'ain suntárunën 'apu comandante Nebuzaradán Jerusalénnu xuakëxa, xukëx kuanx ka mapai achúshi 'uxë 'itankëx mapai achúshi nëtë 'ikë anun bëbakëxa, anun ka diecinueve baritia 'apu 'iakëxa, 13 an ka Babilonianu 'ikë suntárukaman anuxun Dios rabiti xubu, 'anan anua 'apu tsókë aín xubukama 'anan kamabi uni ñu 'unánkë a ëmanu 'ikë aín xubukamaribi nëënun 'amiakëxa, 14 usakin 'anan ka Babilonianuax kuankë suntárukama anun buinarakin Jerusalén kënëara kënë a rurupakëxa. 15 Usokin 'atankëxun ka Nebuzaradánën aín suntárukamabëtan an ñu 'ain mëkënanbi unioti 'unánkë unikama raíri 'imainun, axa Jerusalénnu bërúkë uni raíri 'imainun, axa Babilonianu 'ikë 'apumi 'inamëti anu kuankë akamakëñun unikama buánkëxa. 16 Usakin uanan ka uni ñuñumaira akamaishi naëoxun uvas 'apáxun mënioi 'inun axa ñuñumaira raírishi ënkankëxa.

17 Usonan ka Babilonianën suntárukaman anuxun Dios rabiti xubunu 'ikë manë panshian 'akë ñukama tukapakëxa: 'anan ka ami xubu 'ati nitsínkë akëñun ami birukin 'akë aín tapunkëñunbi chaiira 'inúa ami 'umpax nanti 'akë akamabi tukapakëxa, 'anan ka kamabi manë panshian raíri Babilonia ëmanu buánkëxa. 18 Buanan ka amia chimapu bikë manë xampa, chukúmabu a 'imainun anun ñu mëëti 'akë manë pará, 'imainun manë sani kuënukësa okin 'akë a 'ianan, manë xampakama, cuchara chabu a 'imainun, anun Dios rabikin xëati, manë panshian 'akë, anuxun Dios rabiti xubunu nankë akama buánkëxa. 19 Nebuzaradán an ka 'ain suntárukabëtan kamabi ñu kuri 'akë 'imainun manë uxua 'akë akamabi buánkëxa: buánkin ka ami piti chabukama, a tiríotikama, tasunkama, ami chimapu bikëkama, anu lamparín nantikama, cuchara chabukama 'ianan a 'inainshikë vino baka ami xëati chukúmabu okin 'akë akamabi biakëxa. 20 Salomónnën manë panshian anuxun Dios rabiti xubunu 'amia ñukama ax ka 'iakëxa, ami xubu puruti 'irakanti rabë́ ax ka anu 'umpax nanti chaiira vaca bënëkama tankin manë panshian, mapai rabë́ 'imainun rabë́ tankin 'akë a manámi 'iakëxa, ax ka uiti 'ëñëira kara kixun uínbi 'unántisama 'iakëxa. 21 Usa 'ain ka ami xubu 'ati nitsínkë rabë́ ax 'ain chaxkë́ ocho metro inumikin 'akë 'iakëxa, 'imainun ka mapai achúshi metro 'imainun rabë́ metrosa inúmikë aín naxba 'iakëxa, 'ianan 'ukëmëu naxabañu 'iakëxa, 'imainun ka manë panshian 'akë ax siete centímetro aín rastun 'akë 'iakëxa. 22 Usa 'ain ka ami birukin 'akë achúshi achúshinëx rabë́ metro 'akë a manámi inumikin 'akë anu manë panshianën 'akë 'iakëxa, usa 'ain ka xaban xabanbu 'inun buinarakin manë panshianën rokin kaxori bimi tankin, upí 'itánun 'akë 'iakëxa. Usa 'aish ka 'irakankë rabë́ ax Babilonio unikaman rurupaisama 'aish sënë́nbi 'itánun 'á 'iakëxa. 23 Usa 'aish ka xaban xaban 'itanuan 'akënua kaxori tankin 'akë ax cien kaxori bimi tankin 'akë 'iakëxa, 'imainun ka noventa 'imainun seis kaxori bimi tankin 'akë ax unin kuainkin istisabi okin ëman 'akë 'iakëxa.

24 Nebuzaradán comandante suntárunën 'apu an ka Seraías sacerdotekaman kushi a 'ianan, sacerdote Sofonías Seraíasnën kakësabiokin ñu 'akë 'imainun rabë́ 'imainun achúshi uni an anuxun Dios rabiti xubu 'ain xëkuë bërúankë akama ñatankin biakëxa. 25 Bianan ka a ëmanua suntárunën kushi an nikinkë a bianan mapai achúshi 'imainun rabë́ uni abëa 'apu nikë 'imainun an suntáruti uni bikë akama 'imainun sesenta uni ñu 'unanbu akamaribi a ëmanua biakëxa. 26-27 Usokin bitankëxun ka suntárunën kushi Nebuzaradán an atu aín suntárunën kushikamabëtan, kamabi uni ñatankë a Riblá kakë ëma Hamat menu 'ikë anu 'apu 'ain anu buánkëxa. Anuxun ka 'apu Nabucodonosornën 'ain suntárukaman atu këñunun 'amiakëxa.

'Amianan ka raíri unikama Judá menua bëkë a atun menu buánkëxa. 28 'Apu Nabucodonosornën axa 'apu 'ikë mapai achúshi 'imainun rabë́ baritia 'ain ñatanbiankin Judá menu 'ikë unikama uanun amia: ax ka tres mil 'imainun veintitrés uni 'iakëxa; 29 buan 'ixun ka dieciocho baritia 'apu 'ikin ochocientos treinta 'imainun rabë́ unikamaribi Jerusalénnua buánkëxa; 30 usakin 'á 'ain ka veintitrés baritia 'apu Nabucodonosor 'ikëbëtan Nebuzaradán anribi setecientos cuarenta 'imainun cinco Judánu 'ikë unikamaribi buántëkëankëxa, usa 'ain ka akamabi tupúnkëx cuatro mil seiscientos uni ñatanbiankin buánkë Babilonia menu 'iakëxa.

31 Usa 'ain ka Joaquín kakë 'apu Judá menua 'ikë a bitankëxun Babilonianu 'ikë 'apun treinta 'imainun siete baritia sipuakëxa, sipuakë 'ikëbi ka mapai rabë́ 'imainun rabë́ 'uxë 'ikë 'aia veinticinco nëtë 'ikë, anun 'apu 'ikin pëukin achúshi uni Evil-merodac, kakë an nuibakin an bëtsi 'apun sipua 'ikëbi Joaquín chikíankëxa, 32 usakin 'anuxun ka upiti abë banakin ñatanbiankin buánkë bëtsi menu 'ikë 'apukama 'akësamaira okin Babilonianu 'ikë 'apun abëa 'inun 'imikin nuibakëxa. 33 Usakin 'akëxun ka Joaquínnën sipunuxun pañukë chupa a pëanan bëtsi chupa pañuakëxa, pañutankëxun ka 'apubëtan aín ñuti nëtë 'itamainun 'apun xubunuxun piakëxa. 34 Usakin 'aia ka Joaquín aín ñuti nëtë 'itámainun Babilonianu 'ikë Evil-merodac an nëtë kamabi anúan aín kuëënkë ñu maruti kuríki 'inánkëxa.