Joaquím aín suntárunën kushikama 'imainun unikama këñunbi Babilonianu 'ikë suntárukaman ñatanbiankin buan ñuikë bana
(2 Cr 36.9-10)
24
8 Joaquímnën ka dieciocho baritiañu 'ixun 'apu 'ikin pëuax rabë́ 'imainun achúshi 'uxëishi Jerusalénnu 'apu 'iakëxa. Aín titax ka Nehustá kakin anëkë 'aish Elnatán Jerusalénnu tsókë uni aín bakë bëchikë 'iakëxa. 9 'Aínbi ka an 'akë ñukamax Diosan iskëx 'aisama 'iakëxa, aín papa 'asaribiokian 'atima ñu 'akë ax.10 A nëtëkaman ka Nabucodonosor kakë uni ax Babilonia menu 'apu 'iakëxa, usa 'ixun ka aín suntárukaman Jerusalén 'anuxun bëarabuinnu xuakëxa. 11 Usakin xukëx kuanxuan aín suntárukaman 'akëbë ka, atun 'apu Nabucodonosor ax Jerusalénnu bëbakëxa.
12 Usakin 'akëx ka 'apu Joaquín Judá menua 'ikë ax, aín tita 'imainun aín suntárunën kushikama a 'imainun aín 'apukama abëbi Babilonianu 'ikë 'apu Nabucodonosor an aín menu buánuxun binun atuxi 'inámëakëxa. Ësai ka Nabucodonosor axa ocho baritia aín menu 'apu 'ixuan 'amikëx 'iakëxa.
13 Usakin 'anan ka 'apu Nabucodonosornën anua 'ikankë anuxun Dios rabiti xubunua 'ikë ñu upíbu a bianan anua 'apu 'ikë aín xubu anuaribi ñu upíirabu biakëxa, usakin ka 'anuxun 'aia kiaxa Dios kiásabiokin 'akëxa, 'anan ka kamabi ñu upíbu kuri akama Salomón Israel kaman 'apu an anuxun Dios rabiti xubunu nantia 'amia akamaribi masókin tukapakëxa. 14 Usakin pain 'atankëxun ka kamabi Jerusalén ëmanu tsókë unikama 'imainun, kamabi atun 'apukama 'imainun atun suntáru 'akánanti 'unáinrabu a 'imainun, kamabi ñu unioti unainrabu 'imainun an manë charóxun unioti 'unánkë a kamabia timëkëx ka diez mil uni sënë́nmikin ñatankë 'iakëxa. Usakin ka kamabi uni ñu 'unánbuira a buánan ñuñuira akamaribi buánkin uni ñuñuma kamaishi anubi 'inun ëbiankëxa. 15 Usakin 'anan ka 'apu Nabucodonosornën Joaquín 'imainun aín tita, aín xanukama aín suntárunën kushikama a 'imainun uni ñu 'unánkëirabu a ëmanua 'ikë atuishi buánkëxa. Usokin ka Jerusalén ëmanua bibiankin Babilonia aín me anu buánkëxa. 16 Babilonianu 'ikë 'apu Nabucodonosor an ka aín suntárukamabëtan, siete mil suntáru Judánu 'ikë axa 'akánanti 'unáinrabu a 'imainun; an bëtsi bëtsi ñu 'ati 'unánkëkama 'ianan manë unioti 'unánkë a unikama mil uankëxa.
17 Usokin 'atankëxun ka Babilonianu 'ikë 'apu an Matanías 'apu anëanan Joaquín aín piaka a chikíankëxa usoxun ka aín anë itsi Sedequías kakin anëkin nankëxa.
Sedequías Judá menu 'apu 'iá ñuikë bana
(2 Cr 36.11-16; Jer 52.1-3)
18 Sedequías an ka veintiún baritiañu 'ixun 'apu 'ikin pëuakëxa, pëua 'aish ka mapai rabë́ 'imainun achúshi baritia 'imi Jerusalénnu 'apu 'iakëxa. Aín titax ka Hamutal kakin anëkë 'iakëxa, ax ka bëtsi Jeremías Libná ëmanu tsókë uni aín 'ini bëchikë xanu 'iakëxa. 19 'Aínbi ka an 'akë ñukamax Diosan iskëx Joaquímnën 'asaribi okían 'akëx 'aisama 'iakëxa. 20 Usokin 'akëbë 'aisamaira atumi nishkin ka Diosan an 'inan me Jerusalén 'imainun Judánua atu chikíankëxa.