ESDRAS
'Apu Ciro Judíos unibu ka aín menubi kuantëkënti 'ikë kiá ñuikë bana
(2 Cr 36.22-23)
1
Anúan Ciro kakë uni Persia menu 'ikë ax 'apu 'ikin pëutabakë anun ka usai 'itia Dios kia bana 'ikëa Jeremías kiásabi oia a bana sënë́nkëbëtan, Ciro kakë an Diosanbi sinánmikëxun, banan kananbi kirikanu kuënëoxun ënë bana buámiakëxa:2 Persia menu 'ikë 'apu Ciro ax ësai kiakëxa: Nukën 'Ibu Dios naínu 'ikë, an ka 'apu 'ixun kamabi menu 'ikë unikama 'akinnun 'ë 'imiaxa, 'imainun ka 'ën achúshi anuxun a rabiti xubu Jerusalén Judá menua 'ikë anu 'aminun 'ë sinánmiaxa. 3 Usa 'ain kamina uikamax kara Diosan uni 'ikë akaman an 'akinmainun, kuantakëxun Jerusalén Judá menua 'ikë anu, anuxun Israel kaman Dios rabiti xubu 'ai kuanti 'ain, ax ka Jerusalénnu 'ikë unikaman Dios 'iti 'ikën.
4 Usa 'ain ka bëtsi menuax ubá 'aish atubë tsókë akaman uin kara 'akinsa tania an anua 'ikë anuxunbi kuania atu 'akinkin, manë uxua, kuri, atun ñukama, vaca 'imainun aín ñu akama 'inánan, anuxun Dios rabiti xubu Jerusalénnu 'ikë anua nanti ñukamararibi 'inánkanti 'ikën.
Israel unikama amiribishi Jerusalén ëmanu kuantëkëan ñuikë bana
5 Usa 'ain ka Judá 'imainun Benjamínën rëbúnkinën unikaman kushibu akama 'imainun sacerdotekama 'ianan, levita unikama Diosanbia sinánmikëxua 'apun bana ñuikë kuati Jerusalénnua 'ikë anuxun Nukën 'Ibu rabiti xubu birukin 'atëkëni kuanux kuëëni mëníokakankëxa. 6 Mëníokatia ka kamabi a 'urama 'ikë unikaman kuania atu 'akinkin manë uxua, kuri atun ñukama, vaca 'imainun atun ñu kupíirakëkama a 'inánan, bëtsi bëtsi ñu uin kara 'inántisa tania an aín ñu 'inánkëxa. 7 Usakian unikaman 'amainun ka 'apu Ciro an anuxun Dios rabiti xubu Jerusalénnu 'ikë anua Nabucodonosornën bibiankin buánxun anuxun atun dioskama rabiti xubunu nan ñukama a 'inánun 'inámiakëxa. 8 'Inánmikin ka Persia menu 'ikë 'apu Ciro an, kuríki bërúankë.
Mitrídates kakë uni an uiti 'itsa kara tupuanxa a Sesbasar kakë Judánu 'ikë 'apu a 'inánun 'inámiakëxa.
9 Ñukama tupunkë ax ka ënë ñukama 'iakëxa: treinta manë xampa kuribi 'a, mil xampa manë uxua 'akë, veintinueve manë paná kuënukë, 10 treinta xampa chukúmara kuribia 'akë, cuatrocientas diez xampa chamaratsubu manë uxuanën upíbu 'itánun rokin 'akë, a 'imainun mil bëtsi ñukama aribi 'iakëxa. 11 Usakian timë́xun kuri 'imainun manë uxua kuríki 'akë akama 'inánkëx ka cinco mil cuatrocientos ñu 'iakëxa. Usakin 'inánkëxun ka Sesbasar kakë an Babilonianuax Jerusalénnu kuantëkënkin raíri anuaxa kuan unikamabëtan buánkëxa.