—Ënu kamina mix bërúti 'ain, Diosan ka Betel ëmanu kuantanun 'ë xuti 'ikën. Ësokin kakëxunbi ka Eliseonën kakëxa:

—Ësokin kana Diosan kuamainun kanan minbimi sinántiokin mi kain, 'ën kana mishimi kuantanun ëniman. Ësai kanankiani ka a rabëtaxbi Betel ëmanu kuankëxa. 3 Kuanx bëbakëbë rikuatsinkin ka an Dios kikë bana ñuikë Betelnu 'ikë unikaman Eliseo kakankëxa:

—¿Min karamina an mi ñu 'unánmikë uni ka Diosan bërí bitsia kixun 'unaniman?

Kakëxun ka Eliseonën kana 'unanin kixun:

—Atu kakëxa, usa 'aínbi kamina mitsux añui uisaibi kitima 'ain. 4 Ësokin unikaman kaia ka Elíasnën Eliseo kakëxa:

—Ënushi kamina mix bërúti 'ain, Diosan ka Jericó kakë ëmanu 'ë xutia. Ësokin kakëxunbi ka Eliseonën kakëxa:

—Ësokin kana Diosan kuamainun kanan minbi mi sinántiokin mi kain, 'ën kana mishimi kuantanun mi ënima. Ësai kanankiani ka a rabëtaxbi Jericó ëmanuribi kuankëxa.

5 Kuanx anu bëbakëbë rikuatsinxun ka Jericó ëmanu 'ikë an bana ñuikë unikaman Eliseo kakëxa:

—¿Min karamina an mi ñu 'unánmikë unika bërí Diosan bitsia kixun 'unaniman?

Kakëxun ka Eliseonën kana 'unan kixun atu kakëxa:

—Usa 'aínbi kamina mitsux añui uisaibi kitima 'ain.

6 Usakin atu kakëbi ka Elíasnën katëkëankëxa:

—Ënubi kamina mix bërúti 'ain, 'ë ka Diosan Jordán kakë bakanu kuantanun xutia. Kakëxunbi ka Eliseonën katëkëankëxa:

—Ësokin kana Diosan kuamainun kanan minbi mi sinántiokin mi kain, 'Ën kana mishimi kuantanun mi ëniman. Ësai kanankiani ka a rabëtaxbi kuankëxa.

7 Kuania ka an Dios kikë bana ñuikë cincuenta uni Jericó ëmanua 'ikë atun nuibiankëxa, nuibiani kuankëbë ka Elías 'imainun Eliseo Jordán kakë baka kuëbí 'urama bëbai anu nirakëakëxa, nirakëmainun ka an bana ñuikë unikama axribi atu 'uramaira 'ima 'uri uisai kara a rabëtax 'ia iskatsikiax nirakëkankëxa. 8 Usai anu bëbaxun ka Elíasnën aín tari bikin tarankin anun baka rishkiakëxa, rishkikëxa baka panárabëti ë́ski me rakakëbë ka anun a rabëtax 'ukëmanan sikákëxa.

9 Usai anu sikátankëx kuankin ka Elíasnën Eliseo kakëxa:

—Añu karana mibë ënanaxun mi 'axúnti 'ai kamina 'ë kati 'ain. Kakëxun ka Eliseonën kakëxa:

—'Ëxribi an bana ñuikë uni misaribi 'i atun kushi 'inun kamina 'ë upíokin sinánxunti 'ain.

10 —Kakëxunbi ka Elíasnën kakëxa:

—Minmi 'ë ñukákë ax ka chamarama chaiira ñu 'ikën. Usa 'aínbi kamina Diosan mikëñun 'ë ënanamia iskin minmi 'ë ñukákë a biti 'ain. 'Aínbi kamina Diosan 'ëkëñun mi ënanamikëx 'ëx kuania iskima minmi 'ë ñukákë ñu a bitima 'ain.

11 Ësai kia a rabëtax kanankiani kuankëbëbi ka Diosanbi 'imikëx, bënëtishi achúshi caballonan nirinkë anu tsi rëkirukësa 'imainun caballonuribi tsi rëkirukësa ax mërakëxa, mërakëbëa Elías abë ënanani anu 'iruia ka suñúan kushiira mañákë anbi birubiankin naíkamë 'ëonu buánkëxa. 12 Usai 'ia isi ka Eliseo munuma kuënkëni kiakëxa: “¡Mix kamina 'ën papasa 'ianan Israelnën suntárukama kushiira usarabi 'ian!”

Usai kuania nëtëtia ka amiribishi Eliseonën Elías istëkëanma 'ikën.

Usa 'ain ka aín pañukë tari a bikin masá nuitukin Eliseonën rabë́okin tukakëxa.

13 Usokin 'atankëxun ka Elíasnëa nipabiankë aín tari a biakëxa, bibiani kuanx ka Jordán kakë baka kuëbí nirakëakëxa. 14 Nirakëkin tari tarankë anun baka rishki ka munuma kuënkëni kiakëxa: “¿Uinu kara Elíasnëa rabia Dios 'ik, an kara a 'axuansa okin 'ëribi 'axúntima 'ik?” Ësai kikin baka rishkikëbëishi ka amo rabë́bi baka bërúti nirakëakëxa, usai 'ikëbë ka Eliseo anun sikátëkëankëxa. 15 Usai 'ikiania baka sikátëkënkiani kuania isi ka an Dios kikë bana ñuixunkë Jericó ëmanu 'ikë unikamax kiakëxa: “¡Elíasnua 'ikë Diosan bëru ñunshin ax ka Eliseonu bërí 'ikë kiax kikankëxa!” Ësai kikiani kuani ka a bëtanain ami ñanati 'ikankëxa, 16 'ikin ka ësokin kakankëxa:

—Ka kuat, ënu kananuna an mi ñu 'axúnti cincuenta uni ain sinan kushibu 'ain. Usa 'ain kamina an mi ñu 'unánmikë uni a baritanun nukama xuti 'ain, Diosan bëru ñunshina atuma buánxun aín bashinu niananbi me sapanubu nia istánun. 'Aínbi ka Eliseonën ësai kiabi atu kakëxa:

—Usama ka uibi kamina mitsun a baritanun xutima 'ain.

17 Usa 'aínbi ka 'urainra ubíokin kakëxun na baritanun a cincuenta unikama xuakëxa, xukëxun ka rabë́ 'imainun achúshi nëtë 'imikin Elías barikankëxa, barikinbi ka Elías atun mërama 'ikën. 18 Usokin barikinbi mëraima ka anua bërúkë Jericó ëmanubi rikuatsinxun Eliseo kakëxa:

Usa 'ain kana 'ën mitsu a bari kuaxma 'inun kan.

19 Usa 'ain ka Jericónu 'ikë unikaman Eliseo kakëxa:

—Ka kuat, Jericó ëma ënëx ka upí ëma 'ikën, uisa kara min iskëx 'ikën, 'aínbi ka baka 'atima 'imainun menu 'apákëxbi ñu upiti koima. 20 Kakëxun ka Eliseonën:

—Achúshi tasun iókëñun kamina tashi 'ë bëxúnti 'ai kixun kakëxa. Kakëxun bëxunkëxun a tasun buani ka, 21 Eliseo anua xëxá 'umpax 'ikë anu tashi sakai ësai kiakëxa:

—Ësai ka Dios kiaxa: 'Ën kana ënë baka upí 'itánun mënion, usa 'ain ka uínsaranbi a xëai ñuina 'imainun uni achúshirabi bamatima 'ikën, 'imainun ka menu 'apákë ñu bimiñumama 'itima 'ikën. 22 Usokin 'akë anuinshi ka baka Eliseo kikësabi upí 'inun mëníokakë 'iakëxa.

23 Usokin 'abiani ka Eliseo anuax Betelnu kuankëxa.

Kuania bëbakiania isi ka anu 'ikë uni bënábunëx ami kuai pëukukankëxa. Pëukin ka munuma sharákin kakankëxa: ¡Ka 'iru maruñu! ¡Ka 'iru maruñu!

24 Ësokin kakëx kaxú bësui kuainakëkin iskin ka Eliseonën 'atima okin sinánxunkin Diosan anën kakëxa. Kakëbëshi ninuax chikíkin ka xaëón rabëtan cuarenta y dos uni këñukin piakëxa. 25 Usokin 'akëbë ka Eliseo Carmelo kakë aín bashinu kuantankëx anuaxëshi ka Samaria ëmanu kuantëkëankëxa.