—Ka kuat, 'ën kana 'unan, ënë unix ka ënë ëmanu inúkëtibi nu isi aia, ax ka an Dios kikë bana ñuikë 'aish mënin sinánñu uni 'ikën. 10 Usa 'ain kananuna nun xubu tëkitsi manámi 'ikë anua ax nukúti mëníoxunti 'ain. 'Atankëxun kananuna anua 'uxti nanxuanan, achúshi mesa 'imainun anua tsóti sillaribi nanxuanan anun pë́kitia tiríoti aribi nanxunti 'ain. Usa 'ain ka nu isi aia anu ax 'itiñu 'iti 'ikën.

11 Usokian 'an ka achúshi nëtën Eliseo a xanua aín xubunu mëníoxunkë anu 'uxi bërúakëxa, 12 anuxun ka aín ñu mëëmikë uni Guehazí a kakëxa:

—Xubu 'ibun xanu sunamita a kamina 'ë kuënxunti 'ain, kixuan kakëx kuanxun ka an ñu mëëxunkë uni an xubu 'ibun xanu a kuëankëxa. Kuënkëx ka anua Eliseo 'ikë anu kuankëxa, kuankëbëtan ka Eliseonën an ñu mëëxunkë uni a kakëxa:

13 —Ënë xanu kamina an ka nu 'itsaira 'akinia usa 'ain kananuna añu karana nunribi 'axúnti 'ai kixun ñukáti 'ain; axa kuëënkëbëtan kananuna anun në́kin 'apu kanan suntárunën kushikamaribi nun kaxunti ka asábi 'iti 'ikën. Kixuan kakëbi ka xanu.

—'Ëx kana 'ën aintsikamabëbi asábi 'ain —kakëxa kabiani ka anuax chikikiankëxa.

14 Usai ki chikíkiania kuankëbëtan ka an ñu mëmikë uni kakëxa, —¿Usaía 'ia karanuna nunribi uisaxun a xanu 'akinti 'ain?

—'Ënribi kana uisakin karanuna 'akinti 'ai —'unanima kixun ka Guehazínën kakëxa—. A xanux ka tuáñuma 'imainun aín bënë kaniakëkë 'ikën.

15 —Xanu akamina ënua unun 'ë kuënxuntëkënti 'ain —kixun ka Eliseonën an ñu mëëxunkë uni kakëxa—.

Kakëx kuanxuan an ñu mëëmikë uni an kakëx kuanxi ka xanu ax anua Eliseo 'ikë aín xëkuënushi bërúakëxa. 16 Usai 'ia ka Eliseonën kakëxa:

—Bari itsi ukë anun kamina ënë 'uxë 'ikëbë achúshi tuáñu 'inuxun 'ain. Ësakian kakëxunbi ka xanuxun kakëxa:

—Usama ka mix Diosan uni 'ixun kamina an mi ñu 'axúnti ënë parántima 'ain.

17 'Aínbi ka Eliseonën kakësabi oi a xanu a bëtsi bari 'irukëbë tutankëx achúshi bëbu tuá aín 'uxë sënë́nkëbë bakë́ankëxa. 18 Usakian 'ain titan tuakëx ka a tuá kaniakëxa. Usai kani ka achúshi nëtën anua aín papa aín unikama ñu 'apákë bimikë naë anu kuankëxa, 19 kuanxbi ka 'ain maxkátan paëokëx munuma kuënkëni kiakëxa:

—¡Uisakaskin kara maxkátan 'ë paëoia! ¡'Ën maxkátan ka 'ë paëoia! Usai kia kuakin ka aín papan an ñu mëmikë uni achúshi kakëxa:

—Ënë tuá kamina aín titanubi buánti 'ain.

20 Usokian kakëxun ka an ñu mëëxunkë uni an aín titanu buánkëxa, buánxunkëxun ka aín titan bari xamarutamainun makaxun tsókiankëxa. Tsókinkëxi ka a tuá ñuakëxa. 21 Usai 'ia aín titan tuá anua an Dios kikë bana ñuikë 'uxkënu buánxun rakankëxa, rakanbëtsini chikíkin ka aín xëputi upíokin xëpúakëxa. 22 Xëpúxun ka aín bënë kamiakëxa, kamikëx aia ka ain bënë kakëxa:

—Abë kuanxun an Dios kikë bana ñuixunkë a uni istánun kamina an mi ñu mëëxunkë uni achúshi 'ëbëa kuanun xuanan achúshi burro 'ë inánti 'ain. Abë bana kuatsini kana amiribishi utëkënti 'ain. 23 —¿Uisa kupín kaina bëríbi abë banai kuankatsi kin? —kixun ka aín bënën kakëxa—. Bërí ka 'uxë ió 'ianan anun tantiti sábado nëtëma 'ikën. —'Ën kana uisai karana 'iti 'ai a 'unanin usa 'ain kamina 'ëmi 'itsaira sinántima 'ain kixun ka —aín xanun kakëxa. 24 Usokin aín bënë katankëxun ka xanun an ñu mëmikë uni burro mëníonun 'amiakëxa. 'Amikëxuan mëníokë ka kakëxa:

—Kananuna kuani usa 'ain kamina minpan rëkuë́nkiani nirakëtima 'ën mi kakëx mi nirakënun kuanshiti 'ain.

25 Usakin kabiani kuantankëx ka a xanu Carmelo kakë aín bashi anua an Dios kikë bana ñuixunkë uni 'ikë anu nuküakëxa. Usaia kuania ka Eliseonën 'uranxunbi xanu a isakëxa, iskin ka an ñu mëëxunkë uni Guehazí a kakëxa:

—Ka kuat, sunamita xanu bënuñu an 'ain xubunu nu 'imikë aka aia. 26 Kamina abákianxun bikin uisa kara ax 'ikë ñukánan uisa kara aín tuá 'imainun aín bënë 'ikë ñukákin biti 'ain. Usakia kakëx abákiani kuanxun ka an ñu mëëxunkë uni an Eliseonën kakësabiokin bikin ñukákëxa, ñukákëxun ka xanun kamabi ka asábi 'ikë kixun kakëxa. 27 Usakin bibiankin buánxun ka anua Eliseo 'ikë Carmelo kakë anu bëbakiankëxa. Bëbakinkëxuinshi ka ain taë rabë́ 'ikúkin biakëxa, bitsia okin a 'urama ukin Guehazínën ëmikasiabi ka Eliseonën kakëxa:

—Kamina ënti 'ain ax ka 'itsaira masá nuitutia Diosan ka bëríbi usaía ënë ñu 'iti ñuikin 'ë kakëmapan 'ikën.

28 Ësai kia ka xanuxun kakëxa:

—'Ën 'Ibu, ¿'ën karana achúshi tuáñu 'iti mi ñukan? ¿'Ën karana 'ëmi paránxuma 'anun mi kakëma 'ain?

29 Usakin kakëxun ka Eliseonën Guehazí kakëxa:

—Mëníokakiani kamina 'ën tatsi bibiani xanu ënën xubunu kuanti 'ain. 'Aínbi kamina kuankin unibë mëranankin uisakinbi katima 'ain, 'imainun kamina uin kara uisa karamina 'ai mi kaia a unibi uisokinbi katima 'ain. Kaima kuantankëxun kamina tuá aín bëmánanu 'ën tsati nanti 'ain.

30 'Aínbi ka tuá aín titan Eliseo kakëxa:

—Ësokin kana Diosan kuamainun mi kain, mixmi 'ëbë kuankëbëma kana 'ëxribi ënuax kuanima. Ësokia kakëx ka Eliseo a xanubë kuankëxa. 31 Usai banamainun ka Guehazí ax pain rëkuë́nkiani kuanx xanu aín xubunu bëbakëxa bëbaxun ka tuákën bëmánanu Eliseonën tatsi buánkë a nankëxa, 'aínbi ka tuá ax uisaibi ka uinakëtia kixun istisari 'iama 'ikën; usokëxa uisaibi 'ikëbëtama ka Guehazí na aia mërakin Eliseo ësokin kakëxa:

—'Ën kana minmi usakin 'anun kakësabiokin tuá a 'an, 'aínbi ka shaikiananbi ubikëma 'ikën.

32 Usakian kakëx xubunu atsínkin Eliseonën iskëxbi ka tuá ñukë anua ax 'uxkë anu rakankë 'iakëxa. 33 Usa 'ain ka anu atsínkin anua 'uxkë a xëpúax Eliseo Diosbë banakëxa. Usa 'ain ka tuá ñukë a 'imainun Eliseo ashi anua 'uxkë 'ukëmëu anu 'iakëxa. 34 Usai Diosbë banatankëx anua ax 'uxkë anua tuá ñukë rakankë anu 'irukin ka 'ikúkin bëonakin tuá ñukë 'ain kuëbíbëtan sënën aín kuëbí nanan bëískin aín mëkënu aín mëkën nankin 'iküakëxa. Usakin 'akëx ka ñukë ax aín nami matsikë abira abi aín nami xanakëxa. 35 Usai 'ikëbë nirui ka Eliseo anua 'uxkë anuax kuaínbëkini niakëxa; usai 'itankëx ka amiribishi anua 'uxkë anu 'irutëkënkin tuá ñukë a 'ikútëkëankëxa. Usokin 'ikúkëx uinakëti mapai achúshi 'imainun rabë́ oi kushikin uin bitsi ka bëpëkiakëxa. 36 Usai 'ikëbëtan ka Eliseonën Guehazí kakë uni a kuënxun kakëxa:

—Xubu 'ibu sunamita xanu akamina kuënti 'ain.

Kixun kakëxua Guehazínën kuënkëx ka xanu ax anu uakëxa, ukë ka Eliseonën xanu a kakëxa:

—Min tuá ka baískiaxa kamina biti 'ain. 37 Usakin kakëx ka a 'uramoi a tanain rakabukin ka Eliseo asábi ka kakëxa. Usai 'itankëxun aín tuá mëinbiani ka anua Eliseo 'ikë anuax kuankëxa.