2 Achúshi nëtën ka sirio unikamax israel unikamabë 'akanankëxa, 'akanankëbë abatia ka achúshi xanun tuá xuma ñatankëxa, ñatanbiankin ka sirianu buánkëxa buánkë ka Naamánnën aín xanun ñu mëëminun 'inánkëxa. 3 A xanu xuntakunën ka a ñu mëëxunkë xanu kakëxa:

—Min bënën kara Samarianu 'ikë an Dios kikë bana uni ñuixunkë unin kara an nami chëkimikë aín 'insín pëxkunun 'akintima 'ikë ñukati kuantima 'ikën.

4 Ësakin kakëxua aín xanun kakëx ka Naamán usakian kakë bana aín 'apu ñuixuni kuankëxa. 5 Kuanxua ñuixunkëxun ka Sirianu 'ikë 'apun kakëxa:

—Asabi ka 'ën kana mi xutin usa 'ain kana achúshi kirika kuënëokë Israelnu 'ikë 'apu buámiti 'ain. Usokin kakëx ka Naamán kuankëxa. Kuankin ka treinta mil kuríki manë uxua 'akë bianan, seis mil kuríki kuri 'akë bianan mapai rabë́ chupa aribi anúan an bana ñuikë uni pëxkukëxun kupíoi kuanti akama biakëxa, 6 bibiani kuankin ka Israelnu 'ikë 'apu kuënëoxunkë kirika anua ësai kikë a biakëxa: bixun ka ësai kinun kuënëokë a Israelnu 'ikë 'apu buánxuankëxa: “Ënë kirika bikin kamina sinánti 'ain 'ën kana 'ën suntárukaman kushi Naamán an nami chëkimikë 'insín pëxkúnun xuti 'ain kixun 'unánti 'ain.”

7 Ësokin 'axuan 'inánkëx Samarianu bëbax ka anua 'apu 'ikë aín xubunu kuanxun 'Israelnën 'apu kirika kuënëokë buánkë a 'inánkëxa, 'inánkëxun istánkëx ka Israel unikaman 'apu aín chupa tukai nishi kiakëxa:

—¿'Ëx karana an uni tsónun 'imianan bamanun 'imikë a 'ain, 'apu 'itsían uni achúshi an nami chëkimikë 'insin 'ën pëxkunun 'ënu xunun karana 'ëx Dios 'ain? ¡'Ën sinánkëxun sapi ka nubë 'akánanti barikin ësokin 'aia usa 'ain kananuna upiti bërúankati 'ain! 8 Ësaia 'apu an buámikë kirika a istánkëx aín chupa tukai kikë 'unánkin ka an Dios kikë bana ñuixunkë uni Eliseonën, ësokin 'apu katánun kamiakëxa: “¿'Ëx Eliseo 'ixun kana ësokin mi kain uisoti kaina min chupa tukan? A unix ka 'ë isi uti 'ikën, uxun ka Israel menu ka an Dios kikë bana uni ñuixunkë 'ikë kixun 'unánti 'ikën.”

9 Usakian kamikëxun 'apun xukëx ka Naamán caballonën nikinkë anu 'irukiani kuanx, Eliseo anu 'ikë aín xubu xëkuënubi nirakëakëxa. 10 Usai anu kuankë 'aínbi ka Eliseonën ax kai chikikima an kati uni achúshi xuakëxa: “Xukëx kuanxun istankëxun ka a unin mapai achúshi 'imainun rabë́ oi kamina Jordán kakë bakanu nashiti 'ain, usaími 'ikëbë ka an nami chëkimikë min naminu 'ikë 'insin ax pëxkúti 'ikë kixun kakëxa.” 11 Ësokin kakëxbi ka Naamán 'aisamairai nishi ësai kikiani kuankëxa: —'Ën kana an bana ñuikë unia uisa kaina 'ai kai chikíkin 'ë bisa sinan, 'imainun kana 'ëa aín 'Ibu Dios ñukaxunkin aín mëkënan 'ën 'insínkë ramëkin an 'ën nami chëkimikë pëxkutisa sinánkë 'ian. 12 ¿Usa 'ain kara Damasconu 'ikë Abaná 'imainun Farfar a bakakamax Israel menu 'ikë bakakamasama upíbu 'iti 'it? ¿Uisa kupín karana ënu aima 'ën 'insínkë pëxkúnux anuax nashi kuankëma 'ain? Usai ki 'itsaira nishkiani ka anuax kuankëxa.

13 'Aínbi ka an ñu mëëxunkë unikaman a 'urama okin kakëxa:

—'Ën 'Ibu, an Dios kikë bana ñuikë unían, ñu tëira 'anun kakëxun kaina, ¿min 'akë 'itsían? Usa 'ain kamina an kakësabi oi nashi min 'insínkëkama pëxkúti 'ain. 14 Ësokian kakëx kuanx ka Naamán mapai achúshi 'imainun rabëti Jordán kakë bakanu an Dios kikë bana ñuikë unin kakësabi oi nashi nanëakëxa. Usaía 'ikëbëshi ka aín nami bërí kanikë unin nami iskësa upíira 'inun pëxküakëxa.

15 Usai 'i pëxkukiani ka abëa kuankë unikamabë an bana ñuikë Eliseo isi anu kuankëxa. Kuanx anu bëbakin ka Naamánnën kakëxa:

—¡Bërí kana 'ën upíokin 'unanin kamabi menu ka Dios 'aíma 'ikën, 'aínbi ka Israel menushi achúshi Dios 'ikën! Usa 'ain kamina an mi ñu 'axúnti uni ënën mi ñu 'inaishikaskëxun 'ëmi pëxkukë kupí bishiti 'ain. 16 'Aínbi ka Eliseonën kakëxa:

—A 'ën rabikë Dios an ismainunbi kana 'ën mi kain, usa 'ain kana min 'inánkaskë ñu a bitima 'ain. Usakin Naamánnën karaishikëxunbi ka Eliseonën kana min ñu bitsima kixun kakëxa. 17 Usakin kakëxunbi kuëëniama ka Naamánnën katëkëankëxa:

—Min kamina 'ën 'inaishikë ñu bisamatanin, usa 'ain kana mi ñukatin 'ë karamina caballo rabë́nu 'arutibëtan sënën Israel me ënua me chukúma 'ë 'inántima 'ain; an mi ñu mëëxunti uni ënën ka amiribishi ñuina 'aímai këñutanun bëtsi dioskama, xaroxuntëkënkima Dios ashi ñuina xaronxunti 'ikën. 18 Usa 'aínbi kana Dios achúshi ñu 'atima 'ën 'akë ashia 'ë mëníoxunun ñukatin: 'ën nëtënuxuan 'ën 'apun anuxun bëtsi dios Rimón kakë rabikë xubunu a rabi kuankin buánkëx abë kuankëbëa 'apu rantinpuruni 'ikëbë 'ëxribi rantipurunkin rabikë a ka Diosan 'ë mëníoxunti 'ikën. 19 Ësokin kakëxun ka Eliseonën kakëxa:

—Kamina upitax kuankin me chukúma buánti 'ain. Usakian kakëx ka Naamán anuax kuankëxa.

Kuania 'urikikiani kuankëbëtan ka 20 Guehazí an Dios kikë bana ñuikë uni, Eliseo ñu mëëxunkë an sinánkëxa:

“'Ën ñu mëëxunkë uni Eliseonën ka Naamán sirio uni an ñu bëxun 'inánkaskëxunbi añu ñubi bisamatanxa. Usa 'ain kana Diosan ismainunbi 'ishtuinshi nuibiani kuanxun, añu karana anua biti 'ai isikuanti 'ain.”

21 Kixun sinánbiani ka Guehazí Naamán kuankëbë a kaxú kuankëxa; kuania kaxú bësukin iskinbi mërai ka, caballonën nirinkë anuax 'ibúkin ñukákëxa:

—¿Uisa ñu 'atima kara inuax? 22 —Uisa ñubi ka 'ikëma 'ikë —kixun ka Guehazínën kakëxa—. 'Aínbi ka 'ën a ñu mëëxunkë uni an ësokin mi kanun 'ë xuaxa, an Dios kikë bana ñuixunkë uni bëna rabë́ ka bëríbi Efraín menu 'ikë bashi anuax uax bëbaxa, kixun mi kanun ka 'ë xuaxa, usa 'ain mi tres mil kuríki manë uxua 'akë 'imainun rabë́ ñusuti chupa a rabë́ 'inánun buánminun ka kiaxa.

23 Kixuan kakëxun ka Naamánnën kakëxa:

—Usama ka mi 'inámainun kamina seis mil kuríki manë uxua 'akë ënë timakima min biti 'ain. Kixun kakin ka Naamánën ñusuti rabë́nu 'arukin chupa ió rabë́ aribi 'aruakëxa, 'arutankëxun ka aín uni rabë́ an Guehazín buánxuntanun kixun xuakëxa.

24 Xukëbë abë kuanx aín xubunu bëbakin ka Guehazínën kuríki 'imainun chupa a bitankëxun an buánkë uni rabë́ a xuakëxa, xutankëxun ka aín xubunu kuríki 'imainun chupa a unëakëxa.

25 Usokin 'atankëx ka an ñu mëëxunkë uni Eliseonu kuankëxa kuankë ka ñukákëxa:

—¿Uinuax kaina mix aín Guehazí? —Kixuan ñukákëxun ka 'ëx kana uinubi kuankëma 'ai —kixun Guehazínën kakëxa. 26 Kakëxunbi ka Eliseonën munuma banakin kakëxa:

—Min kamina 'ë paránima 'ën kana Naamán axa mi kuania bitsi aín caballonën nirinkënuax 'ibútia isan, 'ën sinanëinshi kana anu mibë 'ian. Usa 'aínbi ka bërí anun kuríki bianan a pañuti chupa bianan anun ñu 'apákë naë maruanan, anu uvas 'apákë naë bianan oveja, 'imainun vaca aín bënëkama bianan an ñu mëëxunti uni bianan xanuribi an ñu 'axúnti biti nëtëma 'ikën kixun ka kakëxa. 27 Usa 'ain ka an nami chëkimikë 'insin Naamánnu 'ikë ax minuribi 'iruti 'ikë 'ianan ka min rënbunki kamanuribi uínsaranbi nëtë́tima oi 'iruti 'ikën. Usakian kakëx Eliseobë ënanakiani kuanishi ka Guehazí an nami chëkimikë 'insin aín naminu matsi uxua iskësaira 'itánun 'iruakëxa.