—Ka is anu nux mibë 'ikë xubu ax ka chukúmara anu 'itsax 'isama 'ikën. 2 Usa 'ain kamina nukama Jordán kakë baka kuëbí anu xubu achúshi 'ati i bitánun nukama xuti 'ain anu 'iti ka 'aíma 'ikë kixun ka kakankëxa. Kakëxun ka —Asábi ka kamina bitsi kuankanti 'ai —kixun Eliseonën atu kakëxa. 3 Kakëxunbi ka atu achúshinën kakëxa —mixribi karamina nubë kuantima 'ai kixun.

Kakëxun ka —Asábi ka kana mitsubë kuanti 'ai —kixun Eliseonën kakëxa.

4 Kabiani ka Eliseo atubë Jordán kakë baka kuëbí kuankëxa, kuanx anu bëbaxun ka anua i tëakankëxa. 5 Tëakëbëbi ka anúan achúshi unin i tëakëxbi manë ruë ax máchiki kianx bakanu pakëakëxa. Usai 'ikëbë ka uni ax kuënkëankëxa:

—¡Kuëënkëni ka Eliseonën kuanun ësai kiakëxa 'ënama ka manë ruë ënëx 'ikën! ¡Bëtsi uni ñukábëtsinkin 'ën bëkë ka manë ruë ax 'ikën! 6 Kia ka —¿Uinu kara nanë́ax? —Kixun an Dios kikë bana ñuikë uni Eliseonën kakëxa. Usakin ñukatia ka bëtsin ënu ka nanë́axa kixun tanxuankëxa. Tanxunkëxua Eliseonën i pëñan achúshi tëatankëxun anua nanë́kë anubi nikëbë ka manë ruë bakanu nanë́kë ax bëspúti uruakëxa. 7 Usai 'ikëbëtan ka Eliseonën ka bit kixun kakëxa. Kakëbëtan ka bëtsin manë ruë bëspúti uruia biakëxa.

8 Sirionu 'ikë 'apun ka Israel kamabë 'akanankë 'ixun aín suntárunën kushikama timë́xun, uinuira karanuna anu kuanx 'iti 'ati 'ain kixun ñukákëxa. 9 Usa 'ain ka Eliseonën ësokin Israelnu 'ikë 'apu kamiakëxa, a menu kamina kuankantima 'ain a menu ka sirio suntárukama nitsia usa 'ain. 10 Usa 'ain ka Israelnu 'ikë 'apun aín suntárukama a menu kuantanun an Dios kikë bana ñuikë unin kakësabiokin 'amo xuakëxa, usakin 'akin ka 'itsokin axa atumi nishkë Sirionu 'ikë suntárukaman 'ati 'ikëbi atu ië́miakëxa.

11 Usa 'ain ka Sirianu 'ikë 'apun atu anuxunbi 'akasmatankëx 'itsaira nishkin aín suntárunën kushikama kuënxun kakëxa:

—¡Uinu 'ikë mikama achúshinëx kaina an Israelnu 'ikë 'apu bana ñuixuni kuankë 'ai kamina 'ë kati 'ain! 12 Kixuan kakëxunbi ka atu achúshinën kakëxa: Nukama achúshinëxbi kananuna anu 'ikë 'apu bana ñuixuni kuaniman. 'Aínbi ka an Dios kikë bana ñuikë Eliseo Israel ëmanu 'ikë uni an kuni, kamabi minmi usakin 'akatsi kikë banakama Israel unikaman 'apu a ñuixunia anumi 'uxkë anuaxmi kikë bana abi ka an kuaxun ñuixunkësa 'itánun ñuixunia. 13 Usakian kakëxun ka aín suntárunën kushikaman Sirionu 'ikë 'apu kakëxa:

—Anu kuanxun kamina uinu kara, Eliseo 'ia isti 'ain 'ën kana suntárukama ñatamiti 'ain.

Usakian kakëx kuanxun isëtsinxun ka Dotán kakë ëmanu ka Eliseo 'ia kixun kakëxa, 14 usakian ñuixunkëxun ka Sirionu 'ikë 'apun axa caballonuax 'akanankë, 'imainun caballonën nirinkë anuax 'akánanti 'unanbu 'imainun menuax 'akanankë suntárukama 'itsaira xuakëxa xukëx kuanx ka imë́ Dotán kakë ëmanu bëbaxun atu bëararákëxa.

15 Usakin bëarakë a pëkarakëma 'aínshi ka Eliseonën ñu mëmikë uni niruakëxa, nirui ëman chikikinbi ka 'aisamaira suntáru 'imainun caballonuax 'akanankëkama 'imainun caballonën nirinkë anuax 'akanankë suntárukaman ëma bëararakë mërakëxa, mërabiani kuanxun ka Eliseo kakëxa:

—'Aisamaira unin ka nu bëarabuianxa, ¿a ñu karanuna bërí nun 'ati 'ain? 16 Kixuan kakëxun ka Eliseonën kakëxa:

—Kamina rakuë́tima 'ain, axa nubë 'ikë ax ka 'itsaira 'aish atubëa 'ikë abëtan sënë́nmaira 'ikën. 17 Ësokin katankëxun ka Eliseonën Dios ësokin abë banakin kakëxa: “'Ën kana ësokin mi ñukatin, 'Ën 'Ibu an 'ë ñu mëëxunkë uni kamina bërí min ismiti 'ain.” Kixun kakëxun ka Diosan Eliseo an ñu mëëxunkë uni ismiakëxa, ismikëxun ain bashikama anua Diosan suntárukaman tsi rëkirukësa 'ixun bëararakë isakëxa.

18 Usa 'ain ka atu 'anux sirio suntárukama kuankëbëtan Eliseonën Dios ñukákin kakëxa: 'Ën kana ënë suntárukama mi bëxuñu 'iminun mi ñukatin. “Usakian Eliseonën ñukákëxun ka Diosan sirianu 'ikë suntárukama bëxuñu 'inun 'imiakëxa.” 19 Usai 'ia ka Eliseonën atu kakëxa:

—Anunmi ukankë bai ënëx ka a baima 'ikën 'imainun ka anu mi ukankë ënëx a mi 'anuxun barikë ëma ama 'ikën. Usa 'ain kamina 'ën ami barikankë uni anu mitsu buánun 'ë nuibëtsinkanti 'ain. Usakin kabiankin ka Samaria ëmanu atu uankëxa.

20 Atu uanx anu bëbakin ka Eliseonën ësokin Dios ñukákëxa: “Bërí kamina ënë unikaman bëru na iskanun bëpëkinun 'imiti 'ain.” Usakin ñukákëbë bëpëkikin iskinbi ka Samaria ëma nëbë́tsinshi bëbakë okankëxa. 21 Usai anu sirionën suntárukama bëbakë iskin ka Israel unikaman 'apun Eliseo ñukákëxa:

—¿Ënë unikama kamabi rëtënun 'ën suntárukama 'amiti kara uisa 'iti 'ik? 22 Kiabi ka Eliseonën kakëxa:

—Usama ka kamina rëtëmitima 'ain. Abë 'akanankin ñusmoxun bixun uni itsi 'ai kamina 'axëtima 'ain. Usakin 'akinma kamina pimianan xëamitankëxun atun 'apunua kuantanun xuti 'ain. 23 Usa 'ain ka achúshi fiesta chaiira 'akin atubëtan pianan xëakankëxa. Usakin 'atankëxua 'apun kamina kuankanti 'ai kixun xukëx ka atun 'apunubi kuankankëxa. Usakin 'akë anuxuinshi ka sirio unikaman Israel menuax atubë 'akanankë ëankëxa.

24 Usai 'ikë basikëbëtan ka, Ben-hadad Sirianu 'ikë 'apu an aín suntárukama timëakëxa, timëbiani atubë kuanxun ka Samaria kakë ëma 'ati sinánxun bëararákëxa. 25 Usakin 'an ka Samaria ëma xëkuë anun kuainti 'aíma 'inun upíokin xëpukë 'ain numin 'itsaira 'ikankëxa, usa 'ain ka a piti këñúkëbëtan achúshi burro maxká ochenta kuríki manë 'akë sënën aín kupí 'iakëxa, 'ianan ka ñumakuru pui achúshi litro chukúma 'inun bikë ax, mapai achúshi kuríki manë 'akë sënën kupíakëxa.

26 Achúshi nëtën ka Israelnu 'ikë 'apu anun ëma bëararakin kënëkë manámitan inutia mërakin kuënkëonkin achúshi xanun kakëxa:

—¡'Apu 'ixun kamina min 'ë 'akinti 'ain! 27 Kixuan kakëxun ka 'apun kakëxa:

—Diosan mi 'akiniama karana, ¿uisokin 'ën mi 'akinti kaina kuëënin? ¿'Ën karana trigo këñun mi, vino 'inánti 'ain? 28 ¿Uisai kaina 'ian? Kixuan kakëxun ka xanun kakëxa:

—Ënë xanun ka ësokin 'ë kaxa, min tuá kamina bërí nun piti bëti 'ain, imë́ishi kananuna 'ënanribi piti 'ain. 29 Usakin kakëxun kananuna 'ën tuá, upíokin ronxun nëishokin 'axun pian. Usakin 'onxun kana a pëkarakëbëtan aín tuaribia a piti 'ati bënun kan, 'aínbi ka an aín tuá unëaxa. 30 Ësokian a xanun kakëxun kuati 'itsaira nishkin ka, 'apun aín chupa tukakëxa. Tukakian anun ëma bëararakin kënëkë manámixun, bëtsi chupa pañuia ka anu 'ikë unin iskankëxa. 31 Usakin 'ai ka 'apu munuma kuënkëni kiakëxa: “¡Diosan ka Eliseo Safatnën bakë bëchikë a ënë nëtënbi aín maxká tëbískaiama 'aisamaira okin 'ë tëmëramiti 'ikën!” 32 Usai 'imainun ka Eliseo aín xubunu uni aín tukurikukamabë timë́ax bukukë 'iakëxa. Anu bukumainun ka 'apun aín uni achúshi xuakëxa. Xukëx kuanxa aín xubunu bëbakëma pain 'ain ka, Eliseonën aín tukurikubukama a kakë 'iakëxa:

—'Apun ka an uni 'akë 'ixunbi 'ë isa 'anun kixun uni xuaxa. Usa 'ain kamina, atúxa bëbakëbëtan xubu xëputi xëpukin 'aimakin kushiokin tuinti 'ain, usa 'ain kana atu kaxú aia nikuatsinia aín 'apu kuati 'ain. 33 Kixun atu kaia sënë́nkë 'aímabi ka, anua Eliseo 'ikë xubunu bëbakin Eliseo kakëxa:

—Diosanbi ka ësainu nux 'inun nu 'imiaxa, ¿añu karanuna nua 'akinun kixun kainkin nun 'ati 'ain?