—Diosan bana kamina kuati 'ain. Ësai ka Dios kiaxa: “Imë́ishi ënë horanbi ka Samaria ëmanu 'ikë unikaman anun atsínti xëkuënuxun mapai achúshi 'imainun rabë́ litro trigo putuakë achúshi kuríki manë 'akë kupinshi maruti 'ikën, 'imainun ka achúshi kuríki manë 'akë kupinshi quince litro cebada putuakëribi maruti 'ikën.”

2 Ësokin kakëxun ka an 'apu ñu mëëxunkë unin an Dios kikë bana ñuikë uni Eliseo kakëxa:

—Diosan naíkamë 'ëo xëókinun 'imikëbëbi ka mix kikësoibi 'itima 'ikën.

Usai kiabi ka Eliseonën kakëxa:

—Min bërúnbi kamina usaía 'ia ñu isti 'ain, 'aínbi kamina min a ñukama pitima 'ain.

3 Usakian kamainun ka rabë́ 'imainun rabë́ uni an nami chëkimikë 'insínñu uni anun ëmanu atsínti xëkuënua 'ikë atuxi kanankëxa:

—¿Añu karanuna nun bamatishi kaini tsókin ënuxun 'ati 'ain? 4 Ëma 'ukëmëu atsínti sinanx atsini kananuna anuax bamati 'ain, anu ka numi chaiira 'ikën; 'imainun ënubi tsótax kananuna bamati 'ain. Usa 'ain kananuna ënuax anua sirio unikama 'ikë anu kuanti 'ain; anuxun 'akaskin 'akëx sapi kananuna anuax bamati 'ain.

5 Ësai kanankiani ka a xupibutia bë́anki kuankëbë anua sirio unibu 'ikë anu rikiankëxa; 'aínbi ka anua atux 'ikë anu, bëbai kuankin 'urama okinbi uibi anua 'aíma okëxa. 6 Usai 'inuan Diosan 'imikëbëa sirio suntárukama anuax 'akánanti 'aisamaira caballonën nirinkëxa banakësari 'ia kuanun 'imianan caballonuax 'akanankë suntáru ukësari 'ia kuanun kuamiakëxa; kuamikëxun ka sirio suntárukaman sinánkëxa. Israelnu 'ikë 'apun isa hitita 'imainun egipcionu 'ikë 'apukama atuisa aín suntárukamabë timë́xun 'anun kupíoxa kixun sinánkëxa. 7 Usakin sinani ka bari xupibuti bë́anki kuankëbë, atux anu 'itia chupa xubusa okin 'akë a ëbianan aín caballo 'imainun aín burro akamabi anua 'ikankë anubi uisabi okinma atu 'aisa sinani abákin ëbiankankëxa. 8 Ëbian ka an nami chëkimikë 'insínñu unikama anua 'ikankë chupa xubusa okin 'akë kamanu atsínbëkinkin anua ëbiankankë piti pianan xëakëxa; usakin 'anan ka manë uxua, kuri 'imainun chupa, akama bibiankin buánxun unëakëxa. Unëbëtsini uxun ka bëtsinuaribi ñukama bibianxun aribi unëakëxa. 9 Usakin 'ax ka atuxi kánani kikankëxa:

—Nun nu ësokin ñu 'akë ënëx ka upíokin 'akëma 'ikën. Usa 'ain kananuna ënë nëtënbi unë́kinma atu kai kuanti 'ain, nun kananuna unë́xun ësokin ñu 'atima 'ain. Nun nu imë́ishi kai kuanxun kaínti 'aínbi ka nun isanuna 'atima ñu 'a kixun nu 'uchokanti 'ikën. Usa 'ain kananuna kuantankëxun anua 'apu 'ikë xubunu 'ikë unikama kai kuanti 'ain.

10 Usai kanankiani kuanxun ka an ëma bërúankë uni kuënxun kakëxa:

—Nukamax kananuna anua sirio suntárukama 'ikë anu kuan, 'aínbi ka uíxbi asérabi anu 'aíma 'iaxa; 'imainun ka achúshi unirabi banakëma panákë 'iaxa. Usa 'ain ka caballo kamabëbi burrokamaxribi tëkërëkapabuinkë 'ianan anua 'ikankë atun xubu chupa 'akë ax atun 'akësabi 'iaxa. 11 Ësokin kakëxun ka an anun ëmanu atsínti xëkuë bërúankë unin 'apun xubunu 'ikë suntárukama bënë́kinshi kuëankëxa. 12 Kuënxun kakëxuan aín suntárunën kakëx nirukin ka 'apun a imë́bia ain suntárunën kushikama timë́xun kakëxa:

—Ësokin kana sirio unikama 'ikë ñuixunkin mitsu kain. Nuxnu pitiñuma 'aish tëmërai numin 'ia ka atun 'unánxa, usa 'ain sapi ka atux anu 'ikëkama ëbiani unëti kuanxa, atun sapi ka sinánxa nuxnu ëmanuax chikíkiania nukama 'akimashi bianan anu atsínkin Samaria ëma biti sinanx ninu unëkanxa.

13 Kiabi ka aín suntárunën kushi achúshinën kakëxa:

—'Ën kana ësokin mi kain min kamina suntárukama mapai achúshi caballo bërúkë anun kuantankëxuan, uisai kara 'akanania istánun uni xuti 'ain. Xutia 'akëx ka bamananbi 'akëxma usabi utëkënti 'ikën, 'aínbi ka atux utankëx anun rabiti nusamaira 'isatanan axa ënu tikikë Israel unikamasamaira 'isatantima 'ikën.

14 Usakin kakëxun ka rabë́ caballonën nikinkë a bitankëxun, 'apun anua sirio suntárukama bukukë a ñachatanun kixun xuakëxa. 15 Usakin kakëx rikiani kuankin ka anua sirio suntárukama abati kuankë anunbi kuantankëx Jordán kakë baka anubi bëbakin nuiakëxa, nuibiani kuankinbi ka anúan kuankankë anua 'aisamaira atun chupa puanan ñuribi sirio unikaman bënëti abákin pubiankë isakëxa. Usai isiani anu kuantëkënxun ka an istia xukë suntárukaman 'apu atun isiankë ñukama ñuixuankëxa.

16 Usakian ñuixunkëx bënëtishi rikianxun ka Samarianu 'ikë unikaman anuaxa sirio unikama abákë atun 'ikëkama 'atimokëxa. Usakin 'akë 'ain ka Dios kikësabiokin trigo putuakë mapai achúshi 'imainun rabë́ litro a manë kuríki achúshi kupí bianan; cebada putuakë quince litro aribi, manë kuríki 'akë a achúshi kupíshi maruakëxa. 17 Usokëbëtan ka 'apun an a ñu mëëxunkë uni an isa anun ëmanu atsínti xëkuë bërúanun kixun ëankëxa, 'aínbi ka 'aisamaira 'ixuan unikaman xëkuënuxun anu 'irukin chákakankëx ñuakëxa, usakin ka an Dios kikë bana ñuikë unían 'apu a isi kuankë 'ikë kakësabiokin a bana sënë́nmikin 'akëxa. 18 Usai ka an Dios kikë bana ñuikë unia 'apu, kakësabi oi Samaria anun atsínti xëkuënuxun unin mapai achúshi 'imainun rabë́ trigo putuakë maruanan cebada quince litro manë 'akë kuríki achúshi kupín ishi maruti 'ikë kikësabiokin 'akëxa. 19 Usa 'ain ka an 'apu ñu mëëxunkë uni an Dios kikë bana ñuikë uni Diosan naí kamë 'ëo xëókimikëbëbi isa usai 'itima 'ikë kixun kamainua. Eliseonënribi min bërúnbi kamina usai 'ia 'isnuxun 'ain, 'aínbi kamina a ñukama pinxuma 'ai kixuan kakësabi oi ka usai 'iakëxa. 20 Usai ka asérabi, unían 'aisamaira 'ixun chakakëx anun ëmanu atsínti xëkuënu rakati a uni ñuakëxa.