—¡'Ën papa 'ibusa 'ikë kana mi nuibakin kain, mix kamina Israel suntárukamasamaira kushiira 'iakën 'ia 'aíshbi kamina ësaira rakatan!

15 Kakëxun ka Eliseonën kakëxa:

—Kanti achúshi këñun kamina pia itsi biti 'ain. Kakëxun ka 'apun kanti achúshi bianan piaribi biakëxa. 16 Bitsia ka Eliseonën kakëxa:

—Anun bëëkakin pia ninun kamina min kanti kanuti 'ain kakëxa. Kakëxuan 'apun kanti bëëkamainun ka Eliseonën, aín mëkënribi anua 'apun kanti bëëkakin tuinkë anubi aín mëkën nankin, 17 kakëxa:

—Anun buánxun isti xëputi chukúma amiaxa bari urukë amia 'ikë a kamina xëókati 'ain. Kixun kakëxun xëókaia ka 'apu Eliseonën kakëxa:

—Bërí kamina, ¡Kanti bëkakin pia niti 'ain! Kakëxun ka 'apun pia kanti niakëxa. Nikëbë ka Eliseo munuma kuënkëni kiakëxa:

—¡Min pia ënëmi katamëti kamina Diosan 'imikëx ië́ti 'ain! ¡Pia ënën ka Israelkaman Siria unikama kupitanuma 'ati 'ikën! ¡Min kamina sirio unikama Afec, kakë ëmanuxun kupitanuma këñukin 'ati 'ain! 18 Usai pain kitankëxun ka Eliseonën 'apu kakëxa:

—Pia raíri a kamina biti 'ain. Kakëxua pia bitsia ka 'apu Eliseonën kakëxa:

—Bërí kamina pia mi bikë anun me rishkiti 'ain. Kakëxun rabë́ 'imainun achúshi okin me rishki ka 'apu anu nirakëakëxa. 19 Usakin 'aia anubi nirakëtia ka an Dios kikë bana ñuikë unin nishkin 'apu kakëxa:

—Mapai achúshi okin 'anan achúshi okin me rishkixun kamina min sirio unikama kamabi këñukin 'atsían; 'aínbi kamina rabë́ 'imainun achúshi okinshi min atu 'anuxun 'ain.

20 Ñukëa Eliseo maínkan 'ain ka baritsi baritsi inúkëbë, an ñu mëkamakë moabita unikama Israel me kamanu atsíankëxa, 21 nëtë itsin ka uiti Israel unikamax kara achúshi uni ñukë maínti buani kuankëxa, 'aínbi ka an aín 'ibu 'atankëxun ñu mëkamakë unikama rikuatsinia isi atumi rakuë́ti abákin anu Eliseo ñukë maían kini anu uni ñukë a nipabiani abákankëxa. Usakin 'akëx ka uni ñukë ax anu Eliseo ñukë maían aín xo kamami tikishi uinakëti baiski nitsi niruakëxa.