Micaías Ahab kupitanuma 'ati ñui kia bana
(2 Cr 18.1-34)
22
Rabë́ 'imainun achúshi bari inúmi ka sirio unikamabë Israelnu 'ikë 'apu 'imainun aín suntárukama uisaibi 'akananima 'iakëxa. 2 'Aínbi ka rabë́ 'imainun achúshi bari 'ikë 'ain ka anun Josafat Judánu 'ikë 'apu ax Ahab Israelnën 'apu a isi kuankëxa. 3 Kuankë 'ain abë banakin ka abëa 'ikë uni aín kushikama Ahabnën kakëxa:—Mikamanbi kamina 'unánkanin Ramot ëma Galaad kakë menu 'ikë ax ka nun me 'ikën. ¿Usa 'ain karanuna nukaman Sirionu 'ikë 'apu nun me bikuanti añu 'ati 'ain?
4 Kixun atu kanan ka Josafat aribi ñukákëxa:
—¿Minribi kaina Ramot kakë ëmanu 'ikë suntárukama an Galaad kakë me bërúankë 'anun 'ë 'akintima 'ain? Kakëxun ka Josafatnën kakëxa:
—Asabi ka, usa 'ain kana 'ën suntárukama 'imainun 'ën caballonën nikinkëkama min unikamabë timë́nun 'imiti 'ain. 5 'Aínbi kananuna atu 'ai kuanxun an bana ñuikë unikama uisai kara Nukën 'Ibu kia 'unánti ñukáti 'ain.
6 Ësakin kakëxun ka Ahab Israel unikaman 'apu an Dios kikë bana uni ñuixunkë unikama cuatrocientos 'iti 'urama a timëtankëxun ñukákëxa:
—¿Ramot ëmanu 'ikë suntárukama an Galaad me bërúankë atubë karana 'akánanti 'ain karana 'akanantima 'ain? Kakëxun ka atun kakëxa kamina 'akánanti 'ain, Nukën 'Ibun ka mi 'aia 'akinti 'ikën. 7 Kixuan atun kaiabi ka Josafatnën ñukákëxa:
—¿Ënu kara an Dios kikë bana ñuikë uni itsi aribi ñukáti abë banati 'aíma 'ik?
8 Kixun kakëxun ka Israel kaman 'apun Josafat kakëxa:
—Anu ka achúshi aribi uisai kara Nukën 'Ibu kia ñukátisa 'ikën. Ax ka Micaías Imlá aín bakë bëchikë 'ikën. 'Aínbi kana 'ën a uni istisama tanin an ka uínsaranbi upí bana kakinma, 'atima bana ishi ñuikin 'ë kaia. Kakëxunbi ka Josafatnën kakëxa:
—Usai kamina banatima 'ain.
9 Kakëxunshi ka Israelnu 'ikë 'apun Ahab an aín suntárunën kushi achúshi kuënxun kakëxa:
—¡Bënëkuatsinia 'ishtun Micaías Imlá ain bakë bëchikë unun kamina kai kuanti 'ain kixun kamikin ka xuakëxa!
10 Usa 'ain ka Israelnu 'ikë 'apu 'imainun Judánu 'ikë 'apu anun 'akánanti ñukama a rapasu nanx anua uni tanti bukuti 'akë, aín tsótinu anún uni Samarianu kuani atsínti xëkuënu 'akë anu tsóakëxa, tsókë 'ain ka an Dios kikë bana ñuikë unikaman usai 'iti banakama kakëxa. 11 Usa 'ain ka Sedequías an bana ñuikë Quenaaná ain bëchikë ñuina manchan tankin manë 'atankëx kuënkëni munuma banakuatsini ai kiakëxa: “¡Ësai ka Nukën 'Ibu kiaxa: Ënë mancha tankin 'akë ënën kamina sirio unikama këñukin 'ati 'ain!”
12 Ësai kikëbë ka an Dios kikë bana ñuikë ain patsankamaxribi usaribiti kiakëxa. Kikin ka 'apu kakëxa: “Ramot Galaad menu 'ikë a kamina, Nukën 'Ibu mi 'akimainun 'akánti 'ain, 'axun kamina atun ëma biti 'ain.”
13 Kakëbë axribi ukin ka axa Micaías kai kuankë uni an ësakin kakëxa:
—Kamabi an Diosan bana ñuikë unikamax ka bëtsix kikësa kikësaribiti banakin 'apu upíokin kaxa. Usa 'ain kamina minribi atun kakësaribiti añu kara 'ati 'ikë 'apu kai kiti 'ain.
14 Kakëxunbi ka Micaíasnën kakëxa:
—¡'Ëx kana asérabi Nukën 'Ibun ismainunbi kin, usa 'ain kana uisakin kanun kara an 'ë kaia usakinshi kati 'ain!
15 Usai kitankëx ka Micaías anua 'apu 'ikënu kuankëxa, kuania ka 'apun ñukákëxa:
—Micaías, ¿Ramot Galaad menu 'ikë a karana 'ati 'ain karana 'atima 'ain? Kixun ñukákëxun ka Micaíasnën kakëxa:
—Kamina 'ati 'ain, Nukën 'Ibun mi 'akinkëxun 'atankëxun kamina atun ëma biti 'ain.
16 'Aínbi ka 'apu Ahabnën kakëxa:
—Uiti okinshi karana 'ën mi kan, asérabi kamina sinántëkënuxuma Nukën 'Ibun anën usai kamina 'iti 'ai kixun 'ë kanun mi kan.
17 Kakëxun ka Micaíasnën kakëxa:
“'Ën kana Israel suntárukama
aín bashinua an bërúanti uni 'aíma 'ain,
ovejakama abískësari 'ia isan.
Usa 'ain ka Nukën 'Ibun 'ë kaxa:
Ënë unikamax ka 'ibuñumasa 'ikën;
usa 'ain kana 'ëx atun
xubunubia achúshi achúshinëx chuámashirua riakianti kuëënin.”
18 Kikëbëtan ka Israelnu 'ikë 'apu Ahab Josafat kakëxa:
—'Ën kana mi kan ënë unin ka uínsaranbi upí bana ñuikin kakinma 'atima ñu inuti banaishi ñuikin 'ë kaia.
19 Kia ka Micaíasnën kakëxa:
—Mix kamina usai kian, usa 'ain kamina 'ën 'Ibun iskë ñu ñuikin mi kamainun upíokin kuati 'ain: 'Ën kana Nukën 'Ibu anua tsótinua tsókë isan, isanan kana aín ángel naínua 'ikë kamaribi a rapasu sëtë́kë aín mëkeu raíri 'imainun aín mëmiu sëtë́kë isan. 20 Usa 'ain ka Nukën 'Ibun ñukákin, uin kara Ahab paránbiankin aín suntárukamabëa Ramot Galaad me an bërúankë suntárukaman 'akëx anuax bamanun buánti 'ikë kixun ñukákëxa.
Ñukákëx ka raírinëx bëtsi kimainun raírinëxribi bëtsioiribi kiakëxa. 21 Kikankëbë anu ukin ka ñunshin 'atima an Nukën 'Ibu 'ën kana paránti 'ai kixun kaxa. Kakëxun ka Nukën 'Ibun uisakin kara an paránti 'ikë kixun ñukákëxa, 22 ñukákëxun ka ñunshin 'atimanën kakëxa, 'ën kana an Dios kikë bana ñuikë unikama këmëkin 'apu Ahab paránun sinánmiti 'ain kixun kaxa. Kakëxun ka Nukën 'Ibun usakin sapi kamina paránti 'ain, usakin 'ai kamina kuanti 'ain kixun kakëxa. 23 Usa 'ain kamina bërí 'unánti 'ain Nukën 'Ibun ka an Dios kikë bana uni ñuixunkë min unikama an paránti ñunshin 'atima atunu xuaxa kixun, usa 'ain kamina mix 'akanankënuax bamati 'ai kixun ka kakëxa.
24 Kixuan kakëbë a 'urama ukin ka Sedequías Quenaaná ain bakë bëchikë an achúshi okin bëtáshkakin Micaías kakëxa:
—Min kamina sinántima 'ain Diosan bëru ñunshinsa mibë banaima 'inun 'ë ëanan mibë banaia kixun.
25 Kakëxun ka Micaíasnën kakëxa:
—Min kamina uínsaran nëtën kaina anu unë́ti xubu kata itsi kata itsi anu 'uxkë anua bari anun 'ën kakësabi oi 'i kixun 'unánti 'ain.
26 Usakin kaia ka Israelnu 'ikë 'apun Ahab kakëxa:
—¡Micaías kamina ñatanbiankin Amón Alcalde Samarianu 'ikë 'imainun 'ën suntárunën kushi Joás 'ën bakë bëchikë anu añu kara axa istankëxun mëníonun buánti 'ain kixun ka kakëxa! 27 Kakin ka 'ën kana sipunu atsíminun xutin kixun kanan, chukúmaratsushi aín piti pán 'inánan 'umpaxribi chamaratsushi an xëati 'inánun kixun kamiakëxa, 'ëx 'akanan kuatsini 'ën suntárukamabë uisaibi 'ikëma utëkëntamainun. 28 Ësakin kaiabi ka Micaíasnën katëkëankëxa:
“Mixmi uisaibi 'ima asábi utëkënkë,
ax ka Diosan kamikëxun 'ën mi kakëma 'iti 'ikën.”
29 Usakin kakëx ka Israel unikaman 'apu Ahab 'imainun Josafat Judánu 'ikë 'apu ax Ramot kakë ëma Galaad menu 'ikë suntárukamabë 'akanani kuankëxa. 30 'Aínbi ka 'akanani atsínuxun Israel unikaman 'apun Josafat kakëxa:
—'Ëx kana suntáru itsisa 'itánun bëtsi chupa pañubiani kuanti 'ain, usa 'ain kamina min 'ën chupa pañuti 'ain kixun ka kakëxa. Katankëxun bëtsi chupa pañubiani ka Israelnu 'ikë 'apu Ahab 'akanani atsínkiani kuankëxa.
31 'Aínbi ka 'akananuxun Sirianu 'ikë 'apun aín treinta y dos suntárunën kushi capitán axa aín caballonën nirinkë carretanu ikë atu kakëxa, 'akanankin suntárukama 'akinma Israel unikaman 'apu Ahab 'ashi 'ati 'ain. 32 Ësokin kakëx 'akanani kuania aín autunua caballonën niribiankëxun iskin ka capitánkaman Josafat, ax isa Israelnu 'ikë 'apu a 'ikë kixun sinánkin anuxun bëara buiankëxa. Bëara buinkëxi ka Josafat aín suntárukama 'akinun kuëëni munuma kuënkëankëxa, 33 usai 'ia iskinbi ka Israel uni 'apu Ahab atun bëarabuinxubi ëankëxa.
34 'Aínbi ka sirianun 'ikë suntárunën aín kanti pia manámiokin nóokin nikinbi, anunbia bamatanun aín xabankë xanpëskabianxun Israelnu 'ikë 'apu 'akëxa. 'Akëxun ka an caballonën nirinkë carreta an buánkë suntáru kakëxa:
—Nirakëti kamina kuainakëti 'ain, 'ë kamina 'akanankënua chikínti 'ain 'ë ka tëtsórutisamaira okin 'akania.
35 Usa 'ain ka a nëtën ain caballonën nirinkënubi 'apu niakëxa, siriokamabë ain suntárukama 'aisamairai 'akanamainun: 'Aínbi ka bari xupibukëbë aín imi 'itsaira 'ibúkin anua nikë caballonën nikinkë aín carreta namë abi chabópati aín imi 'ibúkëbë bamakëxa. 36 Usa 'aínbi ka bari kuabúkëbëtan Israel suntárukama aín 'apukama ësai kia kuakëxa: “¡Mitsun xubunubi rikianan kamina mitsun menubi kuanti 'ain, 37 'apu ka 'akankëx bamaxa, usa 'ain kananuna 'akanantima 'ain!” Usa 'ain ka 'apu ñukë Samaria ëmanu uanxun maínkankëxa. 38 Usakin 'atankëxun ka aín caballonën nikinkë unin 'akë 'ian cha anuaxa bëtsi bëtsi unibë 'ikë xanukama nashikë Samarianu 'ikë bakanuxun chukakëxa, usakin chukaia ka kamunan Ahab aín imi biáxkakëxa, usakin 'atia Dios kikësabiokin ka usakin 'akëxa.