—Min uvas 'apákë kaina 'ë 'inántima 'ain anu bëtsi ñukama 'ëxribi aña 'inuxun 'apánun, ax ka 'ën xubu rapasurabi 'ikën. A mi 'ë 'inánkëxun kana usamaira upíira me anu uva 'apákëñu a mi 'inánti 'ain, ami kuëëniama kana uiti kupí kaina 'aisatani mi kuríkinën kupíoti 'ain.

3 Kixuan kakëxunbi ka Nabotnën 'apu Ahab kakëxa:

—Diosan ka 'ë mi 'inánti sinánmitima 'ikën ënëx ka 'ën papa 'imainun 'ën titan ñukin ëbian me mi 'inántima 'ikën.

4 Ësokia kakëx ka Ahab amo nishananbi masánuitu kiani aín xubunu kuankëxa, Nabotnëan 'ën papa 'imainun 'ën titan ñukin 'ë ënxua me kana mi 'inanima kixuan kakë a bana sinani. Usai kuantankëx ka aín xubunu nukuti ain chikën ami bësui rakakëxa, rakaxun ka añubi piti sinánma 'ikën masá nuitukin. 5 Usai 'iaxa rakakëbi ka aín xanu Jezabelnën anu kuanxun mërakin kakëxa:

—¿Uisakatsi kaina pisama tani masánuitutin?

6 Kixuan kakëxun ka Ahabnën aín xanu kakëxa:

—Axa nu 'urama 'ikë uni Nabot a kana 'ëa aín uvas 'apákë marunun kixun kan; 'aisamatankian uvas 'apákë me itsi 'inánun sinánun kixun kana kan. 'Aínbi ka an 'ë 'inántisama tanxa.

7 Ësokian ñuixunkëxunbi ka aín xanu Jezabelnën aín bënë kakëxa:

—¡Mix karamina an Israel unikama ësokin ka ñu 'at kakë uni ama 'ain! Nirukianxun ka masanuituxunma pitan. ¡'Ën kana uisoxun karana biti 'ain usoxun Nabotnën uvas 'apákë naë mi bixunti 'ain!

8 Usokin aín bënë katankëxun ka Jezabelnën achúshi kirika kuënëokin aín bënë Ahabnën anën 'atankëxun anua 'apun kirika sellakë anun 'atankëxun; a ëmanua 'ikë aín tukurikubu 'imainun 'apukama amixun anu 'ikë ëmanua 'ikë Nabot a buámiakëxa. 9 A kirika kuënëokë anu ka ësokin atu kakin 'akë 'iakëxa: “Kamabi Jezreel ëmanua 'ikë unikamax ka añu ñubi pima samánux timë́kanti 'ikën. Usakin 'akin ka Nabot anua unikama tsókankë anu rëkuë́mikin tsónti 'ikën. 10 'Atankëxun ka rabë́ uni axa ami këmëi a ñui bananun kixun katankëxun a rëkuë́mikin tsónkanti 'ikën, a unix ka Nabotnëx ka Dios ñui kianan 'apu Ahab ñuiribi 'atimati banaxa kiti 'ikën. Usaia kikëbëtan ka ëman chikíntankëxun anuxun maxaxan 'akin rëkanti 'ikën.”

11 Usokin kakëxun ka anua Nabot tsókë ëma Jezreelnu 'ikë aín 'apukama 'imainun aín tukurikubu an Jezabelnën atu kirika xuxunkin kakësabiokin 'akankëxa: 12 'Akin ka kamabi unikaman timë́xun atun achúshi nëtën añubi pima samákin Nabot anua kamabi unikama timë́kë anua rëkuë́ni atubë tsónun 'imiakëxa. 13 Usokia 'an ka axa ami këmëi banai usaisa kiaxa kitia anëkë uni rabë́ axribi anua timëkankë anuax, usaisa Nabot kiaxa kiax kamabi unin kuamainun ësai kiakëxa. Nabot ënëx ka Dios ñui kianan ka 'apu ñuiribi ami 'atimati banaxa kiakëxa. Usai uni rabë́ ax kikëbëtan ka Nabot anua 'ikankë atun ëmanua chikinbianxun a 'urinxun maxáxan 'akin rëkankëxa. 14 Usokin 'atankëxun ka Jezabel kamikankëxa, Nabot kananuna maxaxan 'akin min kakësabiokin rëtëan.

15 Usakia kamikëxun kuaxun ka Jezabelnën aín bënë Ahab kakëxa:

—Kuanxun kamina Nabot Jezreel uni an uvas 'apákë naëmi marutisa taniabia mi marutisama tankë a kamina minan 'inun bitsi kuanti 'ain. Aín 'ibu Nabot; kaisa bërí ñukë 'ikën.

16 Usa 'ain ka Ahabnën naë 'ibu Nabot kaisa ñuaxa kixun kuabianxun an 'apákë uvas ainan 'inun biakëxa. 17 Usa 'ain ka Diosan Tisbé ëmanua tsóa uni Elías a kakëxa: 18 “Bënëkiani anu kuanxun kamina abë banakin Ahab Israel unikaman 'apu, Samaria menua tsókë a isi kuanti 'ain. Bëríbi ka Nabotnan 'ikëbi ainan 'iti binuxun uvas 'apákë a isi naënu kuanxa. 19 Kuanxun kamina kati 'ain: Ësokin mi kanun ka Dios kiaxa: Min ismina Nabot 'atankëxun ain uvas 'apákë naë 'ibuan, usa 'ain isa anuxun Nabotnën aín imi 'apatia kamunan biaxkakë anuxunbi min imiribi kamunan biaxkati 'ikën ka kiaxa.”

20 Usokin katanua kakëx ka Elías kuankëxa.

Kuanxun ka anua uvas 'apákë naë anua mërakëxun ami Ahabnën Elías nishkin kakëxa:

—¿Mix 'ëbë nishanankë uni 'aíshbi kaina 'ë baribëtsini uax 'ëbë mëranan? Kakëxun ka Elíasnën kakëxa:

—Mibë bananuxun mi bari kana uan, min kamina Diosan upí iskëma ñuishi 'ain. 21 Usa 'ain ka Dios ësai kiaxa: 'Ën kana bërí uisa karana oisatani usokin 'anan kana kamabi min rëbúnki kamaxa këñunun 'imianan; kana min rëbúnkinën bakë bëchikëkama bëná unibu Israel menua 'ikë akamabi masóti 'ain. 22 'Anan kana min aintsikamabi masókin Jeroboam kakë uni Nabat aín bakë bëchikë 'asaribiokin 'anan Baasá Ahías aín bakë bëchikë 'asaribiokin kamabi Israel unikamaxa 'ëmi 'uchanun kixun 'amiakën, usa 'ain kana 'ëx 'itsaira nishkë 'ixun min aintsikama axa ami nishkë unikaman anun 'amiti 'ain. 23 Kianan ka Jezabel ñuiribi ësai Dios kiaxa: An ñu pukë pikë kamunkaman ka Jezabel anun Jezreel ëma bëararakin kënëarakë a tanain ëmánxun aín nami piti 'ikën. 24 'Imainun ka min aintsikama axa ëmanu tsókë kamaxa bamakë ka kamunkaman aín nami piti 'ikën; pimainun ka ñuina pëchiu an ñu bamakë pikë akamanribi axa 'uri kuanx ñu 'apákënu bamakëkama aribi piti 'ikën.

25 Uinsaranbi ka Ahabnën aín xanu Jezabelnën bana tankin, 'aisama ñu 'anan Diosan upí iskëma ñuira akësokin an 'akë 'apu 'aíma 'iakëxa. 26 Usokin 'anan ka unínbia a rabinuxun 'akë ñuribi rabiakëxa, amorreo unikaman 'asaribiokin, usokin 'aia ka Diosan a unikama Israel unibunën menua chikíankëxa.

27 Ësokia Dios kikë bana Elíasnën ñuixunkëxun a banakama kuakin ka Ahabnën aín chupa abi tukai 'ikiani aín xubunu kuanxun chupa xënira pañutankëx añubi pima a pañukë chupa xënira añabi 'uxanan, masá nuitukëishi 'aish niakëxa. 28 Usaia 'ikëbëtan ka Nukën 'Ibun Elías kakëxa: 29 “¿Min kaina Ahab 'uchatankëxbia 'ëmi sinanati usai 'ia isin? Usa 'ain kana aín aintsikama 'atima okinma upitaxa bukunun 'imianan, ax ñukëbëa aín bakë bëchikë 'apu 'ikëbë kunia atun 'ikënu 'aisama ñu 'inun 'imiti 'ain.”