Jezabelnën 'akaskëx Elías Horeb kakë bashinu abá ñuikë bana
19
Ahabnën ka anu kuanxun Jezabel kakë xanu a usakian Elíasnën 'akë ñukama 'imainun uisokin kara an Baalnuxun an bana ñuikë unikama tëtsëkakin rëtëmiaxa kixun ñuixuankëxa. 2 Usakian ñuixunkëxun kuatankëxun ka Jezabelnën achúshi uni an Elías ësokin kaxuntanun kixun xuakëxa: “¡Mix kamina Elías 'ain 'ëx kana Jezabel 'ain! Min kamina an Baalnu 'ikë an bana ñuikë unikama rëtëmian, usa 'ain ka dioskaman, imë́ishi ënë horanbi ka an Baalnën bana ñuikë unikama 'amikësaribi okin 'aiama 'ë tëmëramiti 'ikë kixun ka kamiakëxa.”3 Usakian kamikëxun a bana kuati 'itsaira rakuë́ti ka Elías ënu kana 'itima 'ai kixun sinani aín uni achúshibë Beerseba kakë ëma Judá menua 'ikë anu abati kuankëxa, kuanx anu bëbaxun ka abëa kuankë aín uni anu ëankëxa. 4 Usakin anu ëbiani ka anu uni 'ikëma me anu aratsushi kuankëxa, kuani ka achúshi nëtën nikiani kuanbaiti i pëñanakëkë achúshi nikë a tëmú tantiakëxa. Anu tanti tsóxun sinani ka abi bamatisa tani, kiakëxa: “¡Dios 'ën kana ënë ñuira tënëiman!” ¡Usa 'ain kamina 'ë bamamiti 'ain, 'ëx kana 'ën chaitiokëkama 'iasaribiti uni upíma 'ain!
5 Anuax ka tantia anu tsókë, i pëñanakëkë tëmú anubi rakabuax anubi 'uxakëxa. 'Aínbi ka 'uxkëbi Diosan ángelnën anu uxun aín naminu ratíkakin kakëxa: “Bënëtishi niruxun kamina mi bëxunkë ënë piti 'ain.”
6 Usakin kakëx bësukin arapasukua barikinbi ka Elíasnën, au masuia uxkë anua pán anuxun xuiti 'akë anuxun xuikësa a 'imainun achúshi anun 'umpax biti papitiñu amia 'umpax nankë mërakëxa. Mërai nirutankëxun ka pán pianan 'umpax aribi xëakëxa; usakin 'atankëx ka amiribishi 'uxtëkëankëxa. 7 'Uxtëkënkëbi ka amiribishi Diosan xukëx aín ángel utëkënxun bësunun kixun aín naminu ratíkakin kakëxa: “Niruxun kamina mi bëxunkë piti ënë piti 'ain, anumi kuanti me ax ka 'uraira 'iti 'ikën, usa 'ain kamina kuani me 'ura 'ain 'itsaira pananti 'ain.”
8 Usakian kakëx bësui niruxun ka Elíasnën pianan xëakëxa. A pitia pikë an ka cuarenta nëtë 'imainun cuarenta ñantan nikiani kuanxa aín bashi Horeb kananbi Diosan bashi kakëribi anu bëbati kushiñua 'inun 'akiankëxa. 9 Usai anu bëbatankëx ka Elías bashi kini achúshinu atsíankëxa, atsíntankëx ka anu achúshi imë́ 'uxakëxa. 'Uxunbi ka Diosan kakëxun aín bana kuakëxa. “¿Elías añu kaina ënuxun 'ain?”
10 Ësokia kakëxun kuankin ka Elíasnën kakëxa: 'Ëx kana minun rabanan 'itsaira bamatisa 'inun tëmërain mixmi Dios kamabi kushiñuira 'aínbi, Israel unikaman ka atumi manuxuma 'anun ka usakin ñu 'ati ëanxa, 'imainun ka anuxun mi rabikin ñuina xaroti akamaribi masóxa, usakin 'anan ka an min bana ñuikë unikamaribi atun manë xëtokën 'akin këñúaxa. Usa 'ain kana 'ëratsushi bërúan, usakin atu 'axunbi ka 'ëribi 'akatsikixun barikania.
11 Usa 'ain ka Diosan Elías kakëxa: “Anumi 'uxkë bashi kini ënuax chikíntankëx kamina 'ën istisabioí aín xëkuë 'urama ënubi niti 'ain.” Usakin kakëxa Elías chikíkëma 'aínbi ka Dios bërámashi inúkëbë, suñúan kushiira anu 'ibúkin kamabi ni tsasipakin masókëxa, masónan ka anua 'ikë maparakamaribi tukapakëxa; 'aínbi ka Dios suñúan 'ibúkë anuma 'iakëxa. Usaia suñúan kushiira 'ibútankëx bukubukëbëshi ka meribi shaíkiakëxa; 'aínbi ka me shaíkikë anubi Dios 'aíma 'iakëxa. 12 Usai me shaíkikë ax nëtë́këbë ka tsi rëkirui tirítia iskësa usaribi 'inun 'iakëxa; 'aínbi ka usaía tsi rëkirui tiríkësa anubi Dios 'aíma 'iakëxa. Usai 'itankëxa tsi rëkirukësai 'ikë ax nëtë́këbë ka, Elías anua 'uxkë bashi kini anubi atsíankëxa, anuxun kuakëxbi ka ñu banakësari munura 'ia kuakëxa. 13 Usai 'ia kuati ka Elías aín pañukë tari anunbi bëmápukukiani kuanx, anua 'uxkë kini aín xëkuë anu nirakëakëxa. Anu nixunbi ka achúshitia ësai Dios kia kuakëxa. ¿Añu kaina ënuxun 'ain Elías?
14 Kixun kakëxun kuakin ka Elíasnën kakëxa: “'Ëx kana minun rabanan 'itsaira bamatisa 'inun tëmërain mix Dios kamabi kushiñuira 'aínbi, Israel unikaman ka atubëtan min achúshi ñu 'a usakin 'ati ëanxa, 'imainun ka anuxun mi rabikin ñuina xaroti akamaribi masóxa, usokin 'akin ka an min bana ñuikë unikamaribi atun manë xëtokën 'akin këñúaxa. Usokin 'akëbë kana 'ëshi bërúan, 'aínbi ka 'ëribi 'anuxun barikania.”
15 Usa 'ain ka Diosan Elías kakëxa “Anunmi ukë aubi kuantëkënibi kamina anuinra kuanima amo kikiani kuantankëx anu uni 'ikëma me 'urama 'ikë Damasco kakë ëma au kuanti 'ain. Anu bëbaxun kamina arameo uni achúshi Hazael kakë axa Siria unibunën 'apu 'inun upíokin katankëxun anëti 'ain, 16 'imainun kamina Jehú kakë uni Israel Nimsí aín xuta aribi Israel unikaman 'apu 'inun anëti 'ain; 'anan kamina mix chikímainua an 'ëx kikë bana uni ñuixunun Eliseo Safatnën bëchikë, Abel-meholá ëmanua 'ikë aribi anëti 'ain. 17 Usokin 'akë 'ain ka uix kara Hazaelnën manë xëtokën 'akaskëxbi anuax abatia ka Jehúnën 'ati 'ikën, 'imainun ka ui unix kara Jehúnën aín manë xëtokën 'akaskëxbi anuax abatia a ka Eliseonën 'ati 'ikën. 18 'Aínbi kana 'ën siete mil Israel uni an Baal rabi ami rantinpuruni 'ikin bëtsukukakëma a uisabi okinma ënti 'ain.”
Diosan Eliseo aín bana ñuinun kuëan ñuikë bana
19 Usa 'ain ka Elías anu uni 'ikëma me anuax kuantankëx anua Safatnën bakë bëchikë Eliseo an aín vaca bënëkama mapai rabë́ 'imainun rabë́ a manë paránën me tukamikë anu bëbakëxa, anuxun iskëxunbi ka aín unikaman 'amainun Eliseonënribi atu kaxú tsiánkiankin rabë́ vaca bënë me tukamiakëxa. Usakian 'akëbë a 'urama okinshi ka Elíasnën aín tarin Eliseo mapuakëxa. 20 Usakia 'akëxunshi ka Eliseonën bënë́kinshi aín vaca bënëkama ëbiani, a kaxu abákiani kuanxun nukúkinshi Elías kakëxa:
—Mibë kuanuxun 'ën papakëñun 'ën tita anu kana kuani kixun kakin bëtsuku katamainun kamina 'ë kaínti 'ain.
—Asabi ka kamina kuanti 'ai —kixun ka Elíasnën kakëxa—, 'aínbi kamina añu karana 'ën mibëtan 'a kixun sinánti 'ain.
21 Usokia kakëx ka Eliseo anuax Elías ëbiani kuankëxa, kuanxun ka vaca bënë rabë́ a me tukamikë a rëtankëxun chánkapatankëxun i maxu tëakë anúan vaca bënëkama me tukamikia ami manë pará nëakëkama abi tëapaxun tsi tikatankëxun anu vaca namikama 'aruakëxa, 'aruxun ka an ñu mëëxunkë unikama pimiakëxa. Usokin 'abiani ka Elías baribiani a kaxu kuanx anu 'akini abë 'i bërúakëxa.