2 Kakëx ka Elías Ahab abë banai kuanx anu kuankëxa. Usai 'imainun ka Samarianu tsókë unikama a piti 'aíma 'ain 'itsaira 'akëñuma 'aish numin 'i tëmërakankëxa.

3 Usa 'ain ka Ahab an ñu mëëxunkin bërúankë Abdías a kuënxun kakëxa, an ka Dios asérabi ami rakuë́kin rabiakëxa, 4 an ka Jezabelnën aín suntárukama Diosan bana ñuikë unikama 'atabakin 'amikëbëtan, cien uni timëtankëxun, amo rabë́okin sëtë́natankëxun kini rabë́nu unë́nun 'imikin, cincuenta kini itsinu unë́nun 'imianan cincuentaribi kini itsinu unë́miakëxa, usoxun ka atu aín piti 'inánkëxa.

5 Ahab an ka Abdías kakëxa:

—Kamabi Israel menu kuainakëkin kananuna isi kuanti 'ain, bakakama upíbu kara anua basi paxa mëratisa 'ikë isi kuanti 'ain, nun caballo 'imainun burrokama a pimiti ka 'aíma 'ikën, usokin barikëbëma ka nun ñuinakama bamai këñuti 'ikën, këñúkëbë kananuna ñuinañuma bërúti 'ain. 6 Usai kitankëx ka bëtsíxa amo kuantamainun bëtsiribi amo kuani, Ahab bai itsi amotan kuantamainun, Abdías bai itsi bibiani anun kuankëxa.

7 Usakiani kuankëbëbi ka Elías bainuax Abdías abë mëranankëxa, mëranankin a ka kixun 'unánkin 'urama oi ami ñanati 'ikin ka munuma banakin kakëxa:

—¡Mix kamina 'ën 'ibu Elías a 'ain!

8 —Kakëxun ka 'ëx kana a 'ai —kixun Elíasnën kakëxa. Kakin ka— Kamina kuantëkënti 'ain, ami ñu mëëxunkë uni kamina ënu kana 'ai kai kuanti 'ain kixun kakëxa. 9 Kakëxun ka Abdíasnën kakëxa:

—¿Uisa ñu 'atima karana 'ën minmi an 'ë rëtënumi Ahab 'inánun 'ën 'an? 10 'Ëx kana asérabi ka usa 'ikë kiax manútimoi min Diosan kuamainun kin uinu 'ikë menubi kara mi baritanun uni xuaxa; xukëxa aia ka miisa mërakëma 'ikë kia asérabi kara mi mërakëmaira 'ikë kixun a xukë uni ñuimiaxa. 11 ¡Usa 'aínbi kaina bërí min 'ën a ñu mëëxunkë uni ënu kamina uá kixun katánun 'ë kain! 12 Usa 'aínbi ka bërí 'ëx mi ëbiani kuankëbëtan Diosan bëru ñunshinan anua 'ën mi 'unántima menu buánti 'ikën. Usa 'ain ka mi ñuikin kakëx ukinbi mi mërakinma Ahabnën 'ë rëtëti 'ikën. An mi ñu mëëxunti uni ënën ka bëná 'ixunbi Dios kuëënkësa okinshi ñu 'akëxa. 13 ¿Mi kara uínbi, 'ën Jezabelnëan an Diosan bana ñuikë unikama këñúkëbëtan usokin 'akë a ñuixunkëma 'ik? 'Ën kana cien uni kini rabë́nu unëakën, unëkin kana cincuenta kini itsinu unëanan, cincuentaribi kini itsinu unëxun atún piti 'inánkën. 14 ¿Usa 'aínbi karamina min bërí 'ën ñu mëëxunkë uni ënu kamina 'ai katánun kixun kain? ¡Ësokin kakëx 'uxunbi ka 'ë rëtëti 'ikën! 15 Kakëxunbi ka Elíasnën katëkëankëxa:

—Asérabi kana Dios kamabi kushiñu an ismainun mi kain, bërí nëtënbi kana Ahab abë banai kuanti 'ain.

16 Usokin kakëx ka Abdías Ahab barixun kai kuankëxa, kuanxun mëraxun kakëx ka Ahab Elíasbë banakëxa.

17 Banakin ka Ahabnën Elías kakëxa:

—¿Mix karamina an Israelkama 'aisama unin 'akësokin ñu 'amikin 'aisama okë a 'ain?

18 —'Ëx kana an Israelkama 'atimokin sinánkasmamikë ama 'ain —kixun ka Elíasnën kakëxa—, 'ënma min kamina min unikamabëtan Dios kikë bana tankinma a ëntankëxun, Diosmabi bëtsi ñu uniokë a Baal rabixunkin rabikë akama rabikinin. 19 Usa 'ain kamina bërí an Israel unikama ain bashi Carmelo kakë anu timë́kamë 'ëonun kati uni xuti 'ain, 'imainun ka cuatrocientos cincuenta an bana ñuikë unínbia anëkë Baalnu 'ikëkama a 'imainun anribia bana ñuikë cuatrocientos Aserá anu 'ikë Jezabelnën pimikë atuxribi timë́nun 'imiti 'ain.

20 Usa 'ain ka Ahabnën kamikëx kamabi Israel unikama 'imainun an bana ñuitia unin anëkë unikama ain bashi Carmelo kakë anu timëkamë 'ëokëxa. 21 Timëkamë 'ëokë ka atu 'urama okin kamabi unikama Elíasnën kakëxa:

—¿Uínsaran kaina mitsun rabë́ ñu sinankin ñu 'akë a ënkanti 'ain? Dios axa Dios 'ikë ashi rabikin kamina an kakësabiokin 'ati 'ain, 'anan kamina Baal axribia asérabi dios 'ikë ashi rabikin an kakësokinshi 'akin rabikanti 'ain. Ësokin kakëxun ka unikama timë́kë akaman achúshi banabi uínbi káma 'ikën. 22 Uisokinbi kakëxuma ka Elíasnën abi kakëxa:

—'Ëshi kana an Dios kikë bana uni ñuixunkë 'ain, 'aínbi ka Baalnan cuatrocientos cincuenta unínbia anëkë an bana ñuikë anu 'ikën. 23 Usa 'ain kananuna uinu 'ikë ax kara asérabi Dios ira 'ikë isti 'ain, isti kamina vaca bakë rabë́ bërí kanikë bëkanti 'ain, bëxun kamina achúshi kaístankëxun anuxun xaroti 'atankëxun karu pain anu tikatankëxun rëxun chánkapatankëxun anu puruti 'ain, 'aínbi kamina tsin bimitima 'ain. 'Ënribi kana vaca bakë anuxun xaroti 'atankëxun karu pain anu tikatankëxun rëxun mëníotankëxun anu puruti 'ain, 'aínbi kana 'ënribi tsin bimitima 'ain. 24 Usokin 'atankëxun kamina mitsun dioskama abë banakin ñukáti 'ain, 'ënribi kana 'ën Dios ñukáti 'ain, ¡usokin ñukákëxuan an tsi rëkirumikin 'ibúmikë dios ax ka asérabi Dios ira 'iti 'ikën! —¡Asabi ka mixmi kikë usakin kananuna 'ati 'ai! —kixun ka Elías kamabi uni timëkamë 'ëokë an kakëxa.

25 Usai kikankëbëtan ka Elíasnën an bana ñuikë Baalnu 'ikë unínbia anëkë akama kakëxa: —Mitsun pain kamina vaca bakë bërí kanikë rëtankëxun mëníoxunti 'ain, mitsux kamina 'itsaira 'ai usa 'ain kamina 'ati 'ain. Usokin 'atankëxun kamina mitsun dios ñukáti 'ain; 'aínbi kamina tsin bimikantima 'ain. 26 Kakëxun ka atun pain vaca bakë bërí kanikë bëxun 'inánkëxun rëxun mëníokëxa, mëníoxun ka pëkarakëma 'aínshi 'apunkin bari xamánrumikin atun dios Baal ñukákëxa. Ñukati ka kikankëxa: “Baal nun kakëxun kamina kuati 'ai kixun kakëxa” kai sharati ka anuxun ñuina xaroti 'akë ratanarati chirini 'ikankëxa, 'aínbi ka uisa banarabi kakëxuma okankëxa. 27 Usaia 'ikëbëa bari xamarukëbëtan ka Elíasnën atu 'usani atumi kuaikin ësokin kakëxa:

—Munuma kamina kushi sharákanti 'ain, ax ka dios 'ikën. Usa 'aish sapi ka aín ñu mëëti 'aishi 'ia; 'ianan sapi ka insúanan puianan nitsi chikíkiani kuanxa. ¡'Ianan sapi ka 'uxaxa usa 'ain kamina bësunkanti 'ain! 28 Ësokin kakëx ka atux munuma sharati chirini 'ianan masibu xëtan tarókati 'iakëxa usaibi atun dios rabi 'ikë 'aish, imin nashi usai 'ikankëxa. 29 Usaia 'ikëbë ka bari xamánrukë inuti bari kuainakëkëbë abi munuma sharati chirini ñunshin bakë́anx 'ikësai 'ikankëxa, 'ikankëbë ka anun ñuina xaroti hora 'iakëxa, 'aínbi ka uisa banabi kuakanma 'ikën. ¡Usai 'ikëbëtanbi ka uínbi kaima 'imainun uisaibi bananan 'ia kuakama 'ikën!

30 Usai 'ian ka Elíasnën kamabi unikama kakëxa:

—'Ë 'urama kamina rikuatsinkanti 'ain. Kakëx ka kamabi unikama a 'urama ukankëxa, ukëbëtan ka anuxun Dios ñuina xaroxunti achúshi bëráma 'akëxa rurukubukë a mëníokëxa. 31 Mëníotankëxun ka doce maxax Jacobnën bakë bëchikë bëbukamabëtan sënën biakëxa, a ka Diosan Jacob ain bëchikëkama ka Israel kakin anëti 'ikë kia 'ain 'akëxa, 32 'axunka ka maburukin anuxun Dios ñuina xaroxunti 'akëxa; 'atankëxun ka maxá maburukë a rapasu buinarakin me naëakëxa, naëkë ax ka anu veinte litrosa ñu bimi uakaisa 'iakëxa, 33 a rapasu karuribi tikakëxa, tíkaxun ka vaca bakë bërí kanikë aribi rëxun mëníoxun chánkapatankëxun karu tíkakin bukúnkë anu puruakëxa.

34 Purutankëxun ka Israel unikama kakëxa:

—Rabë́ 'imainun rabë́ chumu 'umpax bëxun kamina vaca bakë rëxun nankë akëñun anu nankë karu tíkati bukúnkë aribi 'aimakin chabokanti 'ain, kixun kakëxua chabóia ka amiribishi kamina rabë́ okin chabotëkënti 'ain kixun kakëxa, kakëxun ka atun usokin rabë́ 'imainun achúshi okin chabókëxa.

35 Usokin 'akëx ka 'umpax kamabi a chaborati me naëkë anuribi buchuakëxa, usakin 'akëxun ka anuxun ñuina xarotia 'akë a chabói me naëkë anuribi 'umpax uakakëxa.

36 Usakin 'akin kamabi mëníokë 'ain ka anun ñuina xaroti hora 'ikëbë an Dios kikë bana uni ñuixunkë Elías, anuxun ñuina xaroti 'urama ai munuma banai ësai kiakëxa: “¡'Ën 'Ibu Dios Abraham, Isaac 'imainun Israelnën Dios kamina mix 'ain: usa 'ixun kamina bërí unikaman mix kamina Israel unikaman Dios 'ai kixun unánun, 'ëx min uni 'ixun mi ñukákë usokinbi 'ati 'ain, min kamina ësokin ënëkama 'anu 'ë kan! 37 ¡Mix Dios 'ixun kamina 'ë kati 'ain; ënë unikaman ka mix kamina asérabi Dios 'ai kixun mi 'unánti 'ikën, 'unánkin sapi ka bëráma 'asábi okin mi rabitëkënti 'ikën!” 38 Ësokin kakëxunshia Diosan naínuxun anu 'ibúmikëxun tsin anuxun ñuina xarotia 'akë akëñun karu tikakë aribi 'anan maxax akama ain chimapuishi 'itánun këñuanan 'umpax me naëkënu buákirukë aribi 'aíma 'itánun tsin këñunun 'amiakëxa. 39 Usokin 'aia isi ka anua timë́kë unikama ax aín bëmánan memi tikai 'i kikankëxa: “¡Nukën 'Ibu Dios ax ka asérabi Dios 'ikën!” 40 Ësai kikania ka Elíasnën atu kakëxa:

—¡An bana ñuikë unínbi anëkë Baalnën unikama kamina ñatankanti 'ain, achúshirabi abátanun kamina ënkantima 'ain! Kakëxun ka unikaman atu ñatankëxa, ñatankë ka Elíasnën Quisón kakë xëxanu buánxun anuxun atu kamabi 'amiakëxa.

41 Usokin 'atankëxun ka Elíasnën Ahab kakëxa:

—Pianan kamina xëai kuanti 'ain, xukirui 'ia kana 'uí kuatin usa 'ain ka ënuax basimashi kamabi me chabói kushiira 'uí 'ibúti 'ikën. 42 Ësokin kakëx ka Ahab pianan xëai kuankëxa.

'Aínbi ka Elías aín bashi Carmelo kakë manámi, mapërakëax, anuax menu rantinpuruni aín ranbuxunu aín bëmánan nani tëtúbuti 'iakëxa, 43 'ikin ka an ñu mëëxunkë uni kakëxa:

—Parúmpapami bësukin kamina isti 'ain. Kakëx kuanxun isëtsini ukin ka kakëxa:

—Añu ñubi ka 'ën iskëx 'aíma 'iaxa. 'Aínbi ka Elíasnën kakëxa:

—Mapai achúshi 'imainun rabë́okin kamina kuanx kuanx ukin isti 'ain. 44 Usokin kakëx mapai achúshi 'imainun rabë́ oi kuankin ka an ñu mëëxunkë unin kakëxa:

—¡Parúmpapa 'urakëo kana nëtë kuin chukúmara 'aish mëkënsara niruia isan! Kakëxun ka Elíasnën kakëxa:

—Anu kuantankënxun kamina Ahab kai kuanti 'ain, aín caballonën nikinkë anu 'irukiania 'uí 'ibúkëma 'aínshi kuantanun kati 'ain, kuaniabia 'uíkan 'ibúkin bëarakëx ka kuantima 'ikën.

45 Kakëx kuanxuan kakëx ka Ahab ain caballonën nirinkë anun Jezreel kakë ëmanu kuani 'iruakëxa. Usai 'imainun ka suñúan ukin nëtë bëánkimibëtsinkëbë 'uíribi kushiira 'ibúakëxa. 46 Usai 'imainun ka Diosan Elías kushioia tsitëkërëkinun kakëxa, kakëx 'aímai kushioi tsitëkërëkianan aín chupa mëniobiani kuanx ka Jezreel kakë ëmanu abákianx Ahab bëbatisa 'aímabi anpan bëbakëxa.