Elías an Dios kikë bana uni ñuixunkë 'uñëbi 'ibúkëbëma ka me ëskinxun 'aia kia bana
17
Aín bana unikama ñuixunua Diosan kaískë Elías, Tisbé kakë ëma Galaad, menua 'ikë anu tsókë an ka ësokin Ahab kakëxa: “¡Diosan kuamainunbi kana ami sinánun mi kain, Israel unibunën Dios an kakësabiokin aín bana tankin 'ën ñu 'axunkë ax ka 'ëx kikëbë 'ibunux ka ënë barikaman 'uí 'ibutíma 'imainun imë́bi nibí 'ibutima 'ikën!”2 Usa 'ain ka Diosan Elías ësokin kakëxa: 3 “Ënuax kuantankëx kamina amiaxa bari urukë, ami kikiani kuanti 'ain, kuanx kamina Jordán kakë baka amiaxa bari urukë anu kuantankëx anua 'ikë Querit, kakë xëxá anu unëax 'iti 'ain. 4 Anu 'ixun kamina xëxá 'umpax a xëati 'ain, usa 'ain kana anumi 'ikëbëtan anuxunmi piti ñu mi uanxunun kana ñumakuru kan.”
5 Usokian kakëx ka Elías Diosan kakësabi oi anu kuanx Querit kakë xëxá amiaxa bari urukë amia 'ikë Jordán kakë baka au 'i bërúakëxa. 6 Usai kuanxa anu 'ia ka ñumakurukaman usakin anua Diosanbi 'amikëxun pán këñun ain piti nami ñantainshi bari urukëbëtan 'inánpunkin xupinbukëbëtanribi Elías 'inánkëxa. Usakian 'akëxun ka xëxá 'umpax abi xëakëxa. 7 Usakin anua 'umpax ain xëati bikëbëbi ka xëxá ax 'itsama nëtë 'ikëbë, Israel nëtënuaxa 'uí 'ibúkëbëma ë́skiakëxa.
Elías 'imainun Sarepta ëmanua 'ikë raëmëkë xanu 'ia ñuikë bana
8 Usa 'ain ka Querit kakë xëxá ëskikë 'ain Diosan ësokin Elías kakëxa: 9 “Bërí kamina nirukiani Sarepta, ëma Sidón kakë ëma 'urama 'ikë anu kuanti 'ain, anu kuantankëx kamina anu 'i bërúti 'ain. Anua 'ikë xanu raëmëkë kana, anu 'ia mi piminun kan.”
10 Ësokian kakëx ka Elías Sarepta kakë ëmanu kuankëxa. Kuanx anun ëmanu atsínti xëkuënu bëbaxun ka, achúshi xanu raëmëkëan karu bitsia isakëxa. Iskin ka kuënxun kakëxa:
—'Ë kamina ami xëati ñu achúshimi xëanun 'umpax bëxúnti 'ain.
11 Usakin kakëxua bitsi kuaniabi ka, Elíasnën a xanu amiribishi kuëntëkënkin kakëxa:
—Kamina, achúshi pán tukakëribi 'ë bëxúnti 'ain.
12 Kixun kakëxun ka xanuxun Elías kakëxa:
—Asérabi kana paránkinma ami sinánun min Diosanbi kuamainun mi kain, 'ëx kana pán xuikë achúshirabi nankëñuma 'ain. 'Aínbi kana mëkën achúshi harinara 'ën chumunu xëni chamarakëñun anu 'aruti anu 'aruxun nan, usa 'ain kana bërí karu chamara anu 'ën tuanan 'imainun 'ën piti xui kuanxun bian. Usa 'ain kananuna a chamara pitankëx a piti 'aíma 'ain numin bamati 'ain.
13 Ësokin kakëxunbi ka Elíasnën kakëxa:
—Kamina bamaiman usa 'ain kamina rakuë́tima 'ain. Kuantankëxun kamina ami ñuikë piti a 'ai kuanti 'ain. 'Aínbi kamina 'ë pain min ñuikë harina a pán chukúma 'itánun 'abëtsinkin bëxúnti 'ain, usakin 'ë pain bëxuntankëxun kamina minan 'anan min tuáribi pán 'axúnti 'ain. 14 Nukën 'Ibu, Israel unibunën Dios ax ka ësai kiaxa, ami chumunu 'aruxun nankë harina a 'imainun, xëni anu 'aruti 'akë ñunu 'aruxun nankë ax ka anuan Diosan menu 'uí 'ibúmitëkënti nëtë 'itámainun këñutima 'ikën.
15 Usakin kakëx kuanxun ka xanu raëmëkë an usakian anua Elíasnën kakësabiokin 'akëxa. Usokin an ka xanu raëmëkë 'imainun aín tuá abëtan Elíasnën kamabi nëtën piti ñu sënën 'iakëxa. 16 Usa 'ain ka ñutënu 'aruxun nankë harina 'imainun xëni ñunu 'aruxun nankë ax këñuama 'ikën, Diosan usai ka 'iti 'ikë Elías kakësabi oi ka usai 'iakëxa.
17 Usai 'ia 'itsa nëtë inúkëbë ka raëmëkë xanu aín tuá 'insínan kushiira uin bitsi 'insínkë 'iakëxa. 18 Usaia aín tuá 'ian ka kasunamëkë xanu an ësokin Elías kakëxa:
—¿Añu karana 'ën mixmi Diosan uni 'ain, mibëtan 'ati 'ain? ¿Mix kaina 'ën 'ucha kupín 'uchañu kamina 'ai 'ë kakin 'ën tuá ñumiti kupín ënu uan?
19 Ësokian kakëxunbi ka Elíasnën kakëxa:
—Ënu kamina min tuá 'ë bëxúnti 'ai kixun.
Ësakin kakin ka xanu raëmëkë an aín tuá bibiakin uani kuanx ka anu 'uxtia 'inánkë manan anu kuaruxun anua 'uxkë anu tuá ñukë a rakankëxa. 20 Anuxun ka Dios munuma banakin kakëxa: “Dios uisa 'ixun kaina mix 'ën 'Ibu Dios 'ixunbi, ¿Kasunamëkë xanu aín xubunu 'ëx 'ikë ënë aín tuá ñumi anun rabanan paë 'itsaira tëmëranun 'imin?” 21 Usokin katankëxun ka rabë́ 'imainun achúshi okin buinakin tuá ñukë manan uankë a chupa bëpantankëxun, abë banakin munuma Dios kakëxa: “'Ën 'Ibu Dios, ¡'Ën kana mibë banakin ësokin mi kain, ënë tuá ñukë kamina amiribishi baískitëkëntakëxa tsónun 'imiti 'ain!”
22 Usokin ñukákëxun ka Nukën 'Ibun Elíasnën ñukákësabi okin a tuá baískimiakëxa. 23 Usakian baískimitëkënia ka Elíasnën bënë́kinshi ax anu 'uxkë anua bëkë anua bibiankin xubu shimú uanxun 'inánkin aín tita kakëxa: —¡Ka kuat, min tuá ka ñuaxi baískiaxa!
24 Ësakin kakëxun ka xanuxunribi Elías kakëxa:
—Bërí kana 'ën mix kamina asérabi këmëima Diosan uni 'ai kixun 'unanin, 'imainun ka mixmi asérabi këmëima banaia Diosan kuatia.