Ahab kakë uni Israel unin 'apu 'ia ñuikë bana
16
29 'Apu 'ikin pëua 'aish ka Judá menu treinta 'imainun ocho baritia 'imi Asá 'apu 'ikëbë ka Ahab Omrí, kakë unin aín bakë bëchikë axribi Israel menu 'apu 'iakëxa, usai 'apu 'itankëx ka atun ëma chaiira Samaria kakë anu veintidós baritia 'imi 'apu 'iakëxa. 30 Usai 'apu 'ixunbi ka 'aisama nuituñu 'ixun Diosan bërunuxunbi, ax 'isama 'aia anpaira 'apu 'ia unikama an 'asamaira okin Dios kuëënkëma ñu 'akëxa, 31 usakin ñu 'atima 'ai ka Jeroboam Nabatnën bakë bëchikë 'iásaribiti 'uchakinbi ka 'aisama ñu 'akinma kana upí ñuishi 'ati 'ai kixun sinánma 'ikën. Usai chaiira 'uchaibi ka a sinanima Sidónu 'ikë 'apu Et-baal kakë aín ini bëchikë xanu achúshi Jezabel kakë abë biranankëxa, usai 'ixun ka Baal kakë unin 'akë dios a rabiakëxa, 32 'imainun ka usakin Baal rabikin anuxun ñuina xaroxunti 'amianan anuxun rabiti xuburibi Samaria menu 'amiakëxa. 33 Usakin 'anun 'amianan ka a 'akëbëa Dios 'aisamairai nishtanun, unin 'akë Aserá, kakë a tankinribi 'akëxa, usakin 'akëbë ka Israel unibunën Dios, ax 'aisamairai 'apu 'imia unikaman ñu 'aisama 'akëbëa 'iásamairai atian ira nishakëxa.34 Anuan Ahab kakë uni 'apu 'ikë a nëtë kaman ka Hiel kakë uni Israel uni Betel ëmanua tsókë an amiribishia Jericó ëma kënëtëkënun 'amiakëxa. 'Amikin taëomixua ami birukin uarukin kënëti aín tapun akama 'amikëbë ka aín bakë bëchikë apan Abiram, kakin anëkë ax ñuakëxa, ñukë 'aínbi ka ëma kënëmixua aín xëpútikama 'anun 'amikëbë aín bakë bëchikë 'anáka Segud kakë axribi a xëpútikama 'amikëbë ñuakëxa, Diosan Josué Nunnën bakë bëchikë a usai ka 'inuxun 'aia kixun a ñuikin kásabi oi ka usai 'iakëxa.