2 Rikiankë ñuikania Jeroboam Nabat aín bakë bëchikënën Egipto menuxun kuakëxa, 'apu Salomónnën 'ati rabanan abáx anu bërua 'aish anu tsókë 'ixun ka anuxun kuakëxa. 3 Usa 'ain anu unun kamikëx uax, ka Jeroboam kamabi israel unikamabë anu kuanxun Roboam kakëxa:

4 —Min papan ka nukama 'aisamaira ñu mëëkin tëmëranun 'imiakëxa; usa 'ain kananuna minmi nukama ñu mëëmikin chaiira 'amikinma chukúmashitani 'amikëxun mi ñu mëëxunti 'ain. 5 Kakëxun ka Roboamnën atu kakëxa:

—Ënuax kuantankëx kamina rabë́ 'imainun achúshi nëtë 'ikëbë 'ë isi rikuatsintëkënti 'ain usakin kakëx ka a isia ukë unikamax rikiantëkëankëxa, 6 rikiankëbëtan ka 'apu Roboamnën uni ain tukurikubu, an ain papa ñukëma pain 'ikë ñu mëëxuan akama ñukákëxa:

—¿Uisakin kaina mitsun 'ë isi ukë unikama kanun 'ë kati 'ain?

7 Kakëxun ka atun kakëxa:

—Min kamina bërí atun kakësabiokin upíokin atúxa kuëëntanun 'ati 'ain kixun ka kakëxa, usakin min 'axunkëxun ka ënkinma abi ñu mi mëëxukanti 'ikën.

8 Kakëxunbi ka Roboamnën uni tukurikubu kaman kakësokin 'akinma atun bana kuaisama tankin, anu kuanxun abë kanikë 'ixunbia an ñu mëëxunkë uni bënábukama, 9 atu ñukákëxa:

—¿Uisokin axa 'ë isi ukë unikama, an 'ën papan 'aisamaira okin ñu mëëmia 'ixun 'ën chukúmashi okin ñu mëëminun kixun ñukáti ukë akama kanun kaina mitsun 'ë kati 'ain? 10 Ësokin kakëxun ka uni bënábu abë kanikin ñu mëëkë atun kakëxa: —Axa minu ukë unikama min papan 'aisamaira okin ñu mëëmia atu kamina ësokin kati 'ain: 'Ën papan ka 'aisamaira okin mitsu ñu mëëmiakëxa 'aínbi kana, 'ën 'itsaira mitsu ñu mëëti 'ai kixun kamina kati 'ain; 11 an ñu cha 'amia 'ikë kana, usamaira ñu chaiira mitsu 'amiti 'ain; an anúan tsitëkërëkikë anun rishkia 'ikë kana 'ën mitsu mëxi ain rëbunu manë xëtokë tëkërëkakë anun mitsu rishkiti 'ai kixuan atu kanun kakëxa.

12 Usokian kakë rabë́ 'imainun achúshi nëtë 'ikëbë ka Jeroboam 'imainun unikamax utëkëankëxa 'apu Roboamnën kakësabi oi. 13 'Aínbi ka 'apu Roboamnën ami nishkin aín tukurikubukaman bana kuakëmasa okin atumi nishkin kakëxa, 14 kakin ka usakin kanun bëná unikaman kakë usakinbi kakëxa: 'ën papan 'itsaira ñu mëëmikin achúshi ñu 'ië 'amia 'ikë kana, 'ën bëtsi usamaira 'ië́ra mitsu 'amianan chaiirabu 'amiti 'ain, 'ën papan anúan tsitëkërëkikë anun rishkia 'ikë kana mitsu 'ën mëxi aín rëbunu manë tëkërëkakë anúnribi rishkiti 'ain. 15 Usakin 'apun ax usai 'itia Dios kikësabiokin unikama kakësokin 'aisamatankëxa, usai ax 'iti ñuikian Diosan kásabi oi ka, Jeroboam Nabatnën bakë bëchikë Ahías Siló ëmanu 'ikë an kakësabi oi 'iakëxa.

18 Usa 'ain ka Roboamnën Siquemnuxun xukëbi ka Adoram an kamabi unin ñu mëia iskë a xuakëxa, xukëbi ka Israel kaman maxatan 'akin rëakëxa. Usakin rëkë kuati ka bënëti caballonën nikinkë anu 'irukiani Roboam Jerusalénnu abákëxa. 19 Ësai 'ian ka Israelkama Davidtan rëbúnki 'apu 'iti kuëënima ami nishakëxa, usai 'ia 'aish ka bëríbi usai 'ia.

20 Usokëbë amiribishi abati Jerusalénnu kuantëkënkë kuankin ka Israel unikama Jeroboam kamabi uni timë́xun anua unun kixun kamiakëxa, kamikëx uax bëbakë ka atu achúshinën, mix kamina Israel unikaman 'apu 'iti 'ai kixun kakëxa. Usakin anëkëbëbi ka Judánu 'ikë unikama atux kuëënima Davidtan rëbúnkin achúshi 'apu 'iti kuëëankëxa.

21 Usokin 'anbi ka Roboamnën Jerusalénnu bëbaxun, ciento ochenta mil suntáru kaisbëtsinkin bëi uakëxa, atux ka Judánën 'aintsi 'imainun Benjamínën rëbúnkikama 'iakëxa, Israel kama abë 'akanankin kupitanunma ax 'apu 'ikatsi kixun ka usakin bëakëxa.

22 'Aínbi ka an bana ñuikë Semaías aín uni a Diosan ësakian 'anun kakëxa: 23 “Roboam Salomónnën bëchikë Judánu 'ikë unikaman 'apu a kanan, kamina Judánën 'aintsikama 'imainun Benjamínën aintsikama kanan kamabi unikamaribi kati 'ain, 24 'ën kana min xukë́n apan Israel unikamabë kamina 'akanantima 'ai kixun mi kamin. Usa 'ain ka a unikamax atubë 'akananima atún xubunubi rikiantëkënti 'ikën, 'ëx kana usaía atux 'inun kian.” Ësokian kamikëx ka kamabi uni atun xubunubi rikiantëkëni, usokin kanua Diosan xukëxua kakëx kuankankëxa.

25 Jeroboam an ka Siquem kakë ëma 'amitëkëankëxa, 'amitankëx ka Efraínnën ñakánu 'ikë unikama anu tsókë, aín bashi anu tsóti bërúakëxa. Anuxun ka Penuel kakë ëma aribi 'amitëkëankëxa.

26 'Aínbi ka an ësokin sinánkëxa: “Davidtan rëbúnki 'apu ax sapi ka Israel unikaman 'apu 'iti 'ikën, 27 ënë unikamax ka Jerusalénnu 'ikë anuxun Dios rabiti xubunuxun ñuina xaroi kuanti 'ikën. Kuania Roboam Judánu 'ikë 'apu an upíokin nuibakëxun tankin maxatan 'ë rëbiani ka Roboamnu rikianti 'ikën.”

28 Ësokin pain sinántakëx ka an 'akinkë aín suntárunën kushikamabë banatankëxun 'apu Jeroboamnën rabë́ vaca bakë bërí kanikë tankin uniomiakëxa, uniomitankëxun ka kamabi unikama kakëxa: “Israel unikama mitsux kamina 'itsaira nitsi Jerusalénnu kuanin. Usa 'ain ka ënu an Egipto menua chikínbëtsinkin mitsu bëa Dios a 'ikën.” 29 Usokin atu katankëxun ka achúshi Betel kakë ëma anu nitsimianan ka bëtsi aribi Dan kakë ëma anu nitsínun 'amiakëxa. 30 Usokin 'axun ka Israel unikama 'uchamiakëxa, usa 'ain ka a rabi Betelnu kuanan Dan kakë anuribi a rabi kuankankëxa, usai 'ikin ka Jerusalénnu Dios rabi kuankë a ënkankëxa.

31 Usokin 'anan ka anuxun unin 'akë ñu rabiti ain bashikamanu xubu anuxun bëtsi dios kamaribi rabinun 'amiakëxa, 'amixun ka ëmanu 'ikë uni sacerdote isa 'inun kixun levita uni 'ikëmabi anëakëxa.

32 'Anan ka anbi 'ati kuëënxun anun bëtsi ñu rabikin fiesta 'ati nëtë nankëxa, a ka mapai achúshi 'imainun rabë́ 'uxë 'irukë axa mapai rabë́ nëtë 'ikë a nëtë nankëxa, nankë 'ain ka anuxun Judánu 'ikë unikaman fiesta 'akëxa, 'akin ka anuxun xaroti 'akë anuxun ñuina xarokëxa. Ësokin Betelnuxun 'akin ka vaca bakë tankin 'akë a ñuina xaroxuankëxa, 'anan ka an vaca bakë tankin 'akë rabikin ñuina xaroxunti sacerdote anëakëxa. 33 Usa 'ain ka mapai achúshi 'imainun rabë́ 'ianan achúshi 'uxë 'irukë anun Jeroboam anribi anuxun xarotia Betelnu 'amikë anuxun ñuina xarokëxa. Ësokin ka anbi sinánxun anun fiesta 'ati nëtë an kuëënkësa okin nankëxa; usakin 'atankëx ka a nëtë 'ikë anuinsa Israel unikaman fiesta 'ati 'ikë kiax kiakëxa, usa 'ain ka a 'uxë 'ikëbë 'ikëbëtan ñuina xaroi anu kuankankëxa.