Salomónnën kaniakëkin bëtsi ñukama rabia ñuikë bana
11
26 'Itsa baritia inúkëbë ka achúshi nëtën Jeroboam Nabat ain bëchikë ax Salomón chikíanan 'apu 'iisa tankëxa. Jeroboam ax achúshi uni an Salomónnën ñu mëëxunkë Seredá kakë ëmanu 'ikë 'aish Efraínën rëbúnki 'iakëxa. Usa 'ain ka aín tita ax raëmëkë xanu Serúa kakin anëkë 'iakëxa. 27 Jeroboam axa 'apumi nishkë ax ka 'iakëxa: Salomónnëa kënëara kënë ain kinikama men natakakakë a kupín ka usai 'iakëxa, ax ka ain papa Davidnën ëma kakin anëkë 'iakëxa. 28 Salomónnën ka Jeroboam ax ka uni bëna kushi 'ianan ñu 'aisa 'ikë kixun 'unánkëxa, usakin unánxun ka an isa Josénën rëbúnkikama ñu mëia bërúanun kixun anëakëxa, atux ka Efraín 'imainun Manasésnën rëbúnkikama 'iakëxa.29 Usa 'ain ka achúshi nëtën Jeroboam Jerusalénnuax kuankëxa, kuankinbi ka an Dios kikë bana uni ñuixunkë Ahías Silónu 'ikë axa, chupa iotan raküax kuankëbë abë mëranankëxa. Usai 'i ka a rabëtaxëshi anu uni 'ikëma ni anuax mëranankëxa, 30 mëranankin ka Ahíasnën anúan rakúkiankë aín chupa ió a bikin mapai rabë́ 'imainun rabë́ 'itanun tukapakëxa, 31 tukapakin ka Jeroboam kakëxa: “Mapai rabë́ tukapakë ënë kamina minan 'inun biti 'ain, Israel kaman Dios ka ësai kiaxa: 'Ën kana Salomón 'apu 'ikëbi chikinuxun 'ain, chikínkin kana mixmi mapai rabë́ ñakánu 'ikë unikama 'apu 'inun 'imiti 'ain. 32 Usa 'ain kana Salomón achúshi ñakánu 'ikë unikaman 'apuishi 'inun 'imiti 'ain, aín papa Davidtan ka 'ën kakësabiokin 'akëxa 'imainun kana Jerusalén ëma 'ënbi Israel unikaman ëmanua kaisakën. 33 Salomónnën ka 'ën kakësabiokin 'ë rabikinma bëtsi dios rabikin, Astarté diosa kakë sidonio; Quemós moabita unikaman dios; a 'imainun Milcom amonita unikaman dios akama rabiaxa. Usakin 'akin ka 'ën ismainunbi ñu 'atima 'axa, usakin 'akin ka ain papa Davidtan 'ásabiokin 'ën banakama kikësabiokin 'akëma 'ikën. 34 Usa 'aínbi kana ñukëmapain 'ikë aín 'apu 'ikënua chikinkima bërúanti 'ain, ain papa David an ka 'ën kásabiokin, 'anan 'ën bana kikësabiokin 'anan a tanti banakama kikësabiokin upíokin 'akëxa. 35 'Aínbi kana aín bakë bëchikënëxa 'apu 'inun 'imitima 'ain, 'imikinma kana mixmi mapai rabë́ ñakánu 'ikë; unikaman 'apu 'inun 'imiti 'ain. 36 Usakin kana achúshi ñakánu 'ikë unin 'apuishi 'inun aín bakë bëchikë 'iminuxun 'ain, 'imikëxun ka anua 'ën uni David 'ia Jerusalén ëma 'ën kaisa anuxua 'ë rabiti xubu 'amiakëxa. 37 Usa 'ain kamina 'ën mi 'imimainun mix kamabi unin 'apu 'ianan, kamina kamabi menu 'ikë Israel unikaman 'apu 'iti 'ain. 38 'Ën mi kakësabiokin kamabi ñu upíokin, 'ën ismainunbi 'akin a tanti banakama 'imainun ax kikësabi oi 'iti banakama 'aia kana 'ën uni David 'akiansaribi okin mi 'akinti 'ain, 'akinkin kana min rëbúnkinëxa Israel kaman 'apu 'inun 'imiti 'ain, 'ën uni David kásabi oi ka ain rëbúnki Judá menu 'ikë unikaman 'apu 'iti 'ikën. 39 Usa 'aínbi kana Davidtan rëbúnki uisakin karana tëmëramiti 'ai usakin 'ati 'ain, Salomónnën ñu 'aisama 'akë kupín, 'aínbi kana xënibua 'ixun usakin 'atima 'ain, kiax ka Dios kiaxa kixun ka Ahíasnën kakëxa.”
40 Ësokian Ahíasnën kakë kuaxun ka Salomónnën Jeroboam 'aisatankëxa; 'aínbi ka Jeroboam Egipto me anua Sisac 'apu 'ikë anu abati kuankëxa, kuanx ka anu Salomón bamatamainun tsóti bërúakëxa.
Salomón ñua ñuikë bana
(2 Cr 9.29-31)
41 Usai 'ianan usakin ñukama 'á, 'imainun raíri banakama ax sinan ñuira 'aísha usai kia, banakama raíri a ka Salomónnën a ñukama kuënëokë kirika crónicas anu kuënëokëxa. 42 Salomón ax ka Jerusalén ëmanu cuarenta baritia kamabi Israel kaman 'apu 'iakëxa, 43 usa 'ikë ka ñukë aín papa Davidtan ëma kakë anu maíankëxa. Usa 'ain ka ax baman aín bëchikë Roboam ax 'apu 'iakëxa.