Sabá menu 'apu 'ikë xanu Salomón isi kuan ñuikë bana
(2 Cr 9.1-12)
10
1-2 Xanu achúshi Sabá menu 'apu 'iti anëkë an ka aín kushi 'inánkin 'akinkëxua Salomónnën Diosmi sinani ami kushikin ñu 'aia unikaman ñuikania kuakëxa, kuabiani ka an kuaisama 'imainun an 'unántisama banakama ñukákin tanti sinanx Jerusalén ëmanu kuankëxa. Kuanx ka aín suntárunën kushikaman bëararamainun aín camellokamanu ro sanuira ñusutinu 'aruxun camellokamanan nankë akama këñun 'aisamaira kuri këñunbi maxá chabáchabákikë upíirabu akama uanx bëbakëxa. Anu bëbaxun ka usakin ñukatia sinánbëtsinkë banakama a banabi Salomón ñukákëxa, 3 Ñukákëxunbi ka kamabi bana an ñukákë a 'apu Salomónnën uisai kara a bana kia a ñuixuankëxa. Uisa banabi ka Salomónnën a xanun ñukákëxun usai ka a bana kia kixun 'unánkëmama 'iakëxa. 4 Usakin unin 'unántisama banakama abi upíira okin 'unánkë Salomón kuanan aín xubu upíira okin 'amikë isi ka Sabá kakë ëmanua 'apu 'ikë xanu, 5 aín piti ñukama bata 'inun mëtuakin 'amixun anuxun pikë ñu upiranu nankë isakëxa, isanan ka anua aín suntárunën kushikama 'ikë, aribi upí isanan aín unikaman chupa upíbu pañumainun, an 'apu aín xëati 'axunkë unikamaribi chupa upí pañukë isanan, anuxun Dios rabiti xubunubi 'akë anuxuan ñuina rëxun sacerdotekaman Dios xaroxunkë a kamabi isi ratúkin ka 'apu xanu an, 6 ësokin 'apu kakëxa:—'Ën nëtënuxun ësokin min ñu 'unánkëira 'ixun ñu 'aia unin ñuia kuabëtsini uxun 'ënbi iskë ënëx ka këmëma asérabi 'ikën; 7 usa 'ain kana asérabi kara usa 'ikë kixun isi uxun bërí 'ën bërúnbi iskin këmëkinma ka unin ñuiaxa kixun 'unan. 'Aínbi ka añu ñukama 'anan kaina uisakin ira ñu 'ai kixun 'ë upíira okin ñuixunkankëma 'ikën, usa 'aínbi ka ñu upíokin 'unánkëira 'ixunmi 'amikë min ñukama ënëx 'ëa ñuixunkëxun 'ën kuakë usamaira 'ikën. 8 Ësokin min ñu 'akëbë sapi ka min xanukamaxa upiti tsómainun, an mi ñu mëëxunkë min uni ënë kamaribi upíokin sinánkin ñu 'ai upitani kuëënia, atun ka mi rapasu 'ixun ñu 'unánkëira 'ixun kakëxun min bana kuatia. Usa 'ain ka atux kamáxbi kuëënia. 9 ¡Min 'Ibu Diosan ka min Dios 'ixun, upíokin ñu 'aia iskin nuibakin Israelkaman 'apu 'inun mi 'imiaxa! ¡Xënibua 'aínbi Israelkama 'ikë mikama nuibakin Diosan, 'apu 'ixunmi 'aisama okinma ñu atu 'axúnti mi anëxuanxa usa 'ain kamina bërí 'apu 'ain!
10 Usakin pain katankëxun ka a xanun 'apu tres mil novecientos sesenta kuri 'inánkëxa 'inánan, ka 'itsaira ro sanuira 'imainun maxá upíirabu akama 'inánkëxa. Uinsaranbi ka Sabá kakë menu 'apu 'ikë xanua 'apu Salomón 'inainshia usaribi 'itsaira 'imainun 'aisamaira sanuira ro Israel menu uínbi bëama 'ikën. 11 Usakin a ñukama 'inánan ka Hiram Tiro ëmanu 'ikë 'apu, an Ofir kakë me axa Arabia menu 'ikë anua 'ain ñu maruti buánkë bakan nikë manë nunti anun kuri bëakëxa, bëanan ka sándalo kakë no imi 'itsaira tukapakë a kamakëñun maxá chabachaba kikë upíbu akamaribi bëakëxa. 12 Usakin 'inánkëxun ka sándalo kakë no imi tukapakëa 'inánkë anun anuxun Dios rabiti xubu 'akë anu 'anan 'apun xubu anuribi 'amiakëxa. 'Amianan ka a ibi aín arpa 'anan Dios rabi kantakin a banamiti ñukamaribi 'akëxa. Uínsarabi ka 'itsaira 'imainun 'aisamaira sándalo kakë no imi unin isáma 'ikën. 'Imainun ka bërí nëtënbi bëráma 'ia usaribi 'aisamaira sándalo kakë no imi kirikanu kuënëokë ënë ñuikin kuënëo usaribi unin isima. 13 Usakin 'akëxun ka 'apu Salomónnën Sabá menu 'apu 'ikë xanu kamabi ñu an ñukátisa tankë a 'inánkëxa, 'inánan ka anbi kuëënxua a 'inánti ami kuënkin nankë aribi 'inánkëxa. Usakin 'inánkëx ka 'apu anëkë xanu aín suntárunën 'apukaman uamainun atubëbi anuaxa ukë aín menu kuantëkëankëxa.
Salomón upíokin ñu 'aia ñuñuira 'ia ñuikë bana
(2 Cr 9.13-24)
14 Kamabi baritian Salomónnën xuxunkëxun bikë kuri ax ka veintidós milbëtan sënën aín 'ëñë 'iakëxa, 15 ax ka unikaman kupíokë akëñun tupunkëma 'iakëxa, usakin ka Israel unibu ñuñuirakama axa aín ñu marui tëkë akaman upiti atun ñu marui tëëti kupín kupíomainun, kamabi 'apu Arabia menu 'ikë akama 'imainun, bëtsi menu 'ikë 'apukaman kupíokëxa. 16 Usokin 'amianan ka 'apu Salomónnën aín uni an ñu 'axunkë akama kuri charóxuan ami katamëti parókin doscientos 'axúnun 'amiakëxa, a kuri parókin 'akë achúshi achúshinëx ka chabu 'ianan mapai achúshi 'imainun achúshiokin tupunkë aín kilo 'iakëxa. 17 Usokian 'anun 'amianan ka trescientos chukúmabu 'itanunribi charóxun kuri ami katamëti parókin 'amiakëxa, usakian ami katamëti parábu 'itánun kuri 'amikë chukúmabu 'ax ka achúshi kilo okin tupúanan nëbë́tsi sënë́onkin achúshi tupunkë aín 'ëñë 'iakëxa, akama ka usokin 'amitankëxun 'apun xubu Líbanunën ni kakin anëkë anua mëníokin bukunun 'amiakëxa. 18 'Amianan ka ñuina xëtakëñun anu tsóti achúshi cha 'itánun, 'amixun kurin ratátakakin ronun 'amiakëxa. 19 Anua 'apu tsóti 'akë ax ka aín amo rabë́bi uarukin mapai 'imainun achúshi tapiti okin 'akë 'iakëxa; 'imainun ka anuira tsóti ax turua 'imainun ami katiki tsóanan ami bankëpimëtia tsóti anubi paru 'inúan tankin 'akë rabë́ nitsinkin nankë 'iakëxa. 20 Usakin 'amixun ka mapai rabë́ 'imainun rabë́ paru 'inúan tankin 'akë a, mapai 'imainun achúshi tapiti 'akë anu amo rabë́bi nitsinkin nankëxa. ¡Uisaxunbi ka bëtsi 'apukaman an ñu mëëxunkë aín unikama ësaribi 'itánun ñu upíokin 'axúnun 'amiama 'ikën!
21 Usakin 'akë 'imainun ka, amia 'apun xëakëkama ax manë xampakama ax bëtsi ñu këñun mëskukin 'akinma kurishi 'akë 'iakëxa, 'imainun ka 'apun xubu Líbanunën ni kakin anëkë anu nankë. Kamabi amia 'apun pikë ñukama ax upíirabu kuri 'akëishi 'iakëxa. Usa 'ain ka manë uxua 'akë ñubi anu 'aíma 'iakëxa, a nëtëkaman ka Salomón ñukëma pain 'ain kuríki 'akë ñukamax kupímara 'iakëxa, 22 usaía 'imainun ka 'apun manë nunti chaiirabu anúan ñu maruti nikinkë Tarsis menua 'ikë a kamaxa kuanmainun, Hiram kakë 'apun manë nunti anun ñu maruti uankë a kamaribi abëbi, kuri, kuríki, ñuina xëta 'inánan ni mananën nikë ñuina 'imainun pabukama 'arakakë a kamabi 'apu Salomón bëxuni ai rabë́ 'imainun achúshi baritia 'ikëbë 'ikëbë bëbakëxa.
23 Usakin upíokin ñu 'ai ka kamabi menu 'ikë 'apukama 'ikësamaira 'inun ñuñuira 'ianan ñu upíokin 'unánkëira 'apu Salomón 'iakëxa. 24 Usakin 'aia kuati ka kamabi menu 'ikë unikama uisaira okin karaisa Diosan 'apu 'imianan aín kushi 'inánkin kamabi ñu 'unánkëira 'inun 'imia kixun Salomón istisa tankëxa, 25 usakin istisa tankin ka kamaxunbi baritia 'irukëtibi a 'inainshiti ñukama anu uankëxa: uankin ka manë uxua 'akë 'imainun kuri chupakama, 'ianan anun 'akánanti ñukama a 'imainun ro, sanuira 'imainun caballo, bënë 'imainun aín xanu akama këñunbi ñu a 'inánti anu kuankin uanxuankëxa.
'Apu Salomónnën marukin bitankëxun caballo 'imainun caballonën nikinkë carreta amiribishi marutëkëan ñuikë bana
(2 Cr 1.14-17; 9.25-28)
26 'Apu Salomónnën ka caballonën nikinkë carretakama 'imainun axa caballonuax 'akánanti 'unan unikama timëkin biakëxa. Usa 'ain ka aín caballonën nikinkë carreta mil cuatrocientos 'iakëxa, 'imainun doce mil axa caballonën nikë suntárukama a Jerusalénnu 'ikë xubu anua suntáru 'ikë anu xuakëxa. 27 Usakin 'anan ka 'apu Salomónnën Jerusalén ëmanua 'aisamaira maxása kuríki 'inun 'imiakëxa; usakian 'imikëbë ka kunxan kakin anëkë no imi akamaxribi 'aisamaira higuera ninu unia iskësaira me sapannu 'iakëxa. 28 Usa 'ain ka Salomónnën suntárunën 'apun unikaman Musri kakë menu 'ikë anua maruanan Cilicia, kakë ëma anuaribi marutakëxun aín caballokama axa 'apun ñu marui tëkë manë nunti chaiirabu anúan Israel menu buánxuntanun xuakëxa. 29 Achúshi caballonën nirinkë upíokin Egipto menuxun 'akë marukë ax ka seiscientos manë kuríki kupíakëxa, 'imainun ka caballo achúshi ciento cincuenta manë kuríki 'akë kupíakëxa. Usakian 'aia ka hititanu 'ikë 'apu 'imainun Sirionu 'ikë 'apukamanribi Salomónnën suntárunën kushikaman 'amikëxun atumi 'ixun aín ñukama maruakëxa.