Anuxun Dios rabiti xubu 'amianan, anu 'apu 'iti xubu 'amikin sënëomixuan kamabi an 'aisatankë ñukama 'akin këñumian ka 2 rabë́ oí mërati Gabaón ëmanuaxa bëráma 'ikësaribiti Salomón mi Nukën 'Ibu amiribishi mëratëkëankëxa, 3 ami mërakin ka ësokin kakëxa: 'Ën kana 'ëbë banakinmi 'ë kakëxun kuan, 'imainun kana anuxun 'ë rabiti min 'amikë anu 'ëx mitsubë 'iti 'ain. Anu mitsubë 'ixun kana uisaxunbi xënibua 'aínbi mi ëntima 'ain. 4 Mix kamina bërí min papa David 'iásaribiti, 'ën iskëx ñu 'atima 'ati sinanima min nuitu upí 'ixun, kamabi usaími 'inun 'ën mi kakë bana kikësabi oi 'ianan, ax kikësaibi oí 'iti banakama kikësabi oi 'ëmi katamëtin, 5 usa 'ain kana mi 'imainun min 'aintsi 'ibukamaxa Israel menu 'apu 'inun 'imiti 'ain, 'ën min papa David kásabiokin, uínsarabi kana Israel unibunëxa atun 'apuñuma 'inun aín rëbúnki achúshi 'apu 'imiti ëntima 'ai kixun kana kakën. 6 Usa 'aínbi kana mix 'ikëbëma min rëbúnkikama 'ikëbëa bëtsi unikamaribi 'ë rabiti ëni 'ëmi manúkin a tanti banakama 'imainun ax kikësabi oi 'iti banakama a ñuikin usakin 'anun 'ën atu kakë usakinbi 'akinma, ami katamëkin bëtsi ñukama rabia kana, 7 'ën atu 'inan me anua Israelkama chikínti 'ain, chikíanan anuxun 'ë rabiti xubu 'amikë a ënun ëmikëbë ka Israel kamami bëtsi menu 'ikë unikama kuaiti 'ikën. 8 Usakin 'anun atu 'amianan kana anuxun 'ë rabiti xubumi 'amikë ënëribi rurukubuti aín maxákama tukibuti aín i kamaribi chánkibuaxa bukunun 'imiti 'ain, usakin 'ën 'imikë 'ain ka a 'urama kuainkin isi ratuti ami uni kuaiti 'ikën, kuai ka ñukákanani kananti 'ikën uisai 'iaira kara Diosan ënë me ësonan anuxun a rabiti xubu ënë ësokin 'akëxa. 9 Kia kuakin ka uisa unínbi kara bëtsi kati 'ikën, aín chaitiokëkama Egipto menua chikían 'ixunbia ami katamëti ënkin bëtsi dios rabia ami manúkëxun ka aín Dios 'ixunbi usakin Israel unibu 'axa kixun kanan ka usa 'ain ka 'itsaira tëmëramianan 'aisamaira okin masá onan 'atimoxa kixun bëtsi kati 'ikën.