3 Usaia kamabi Israel kushikamax anu timë́ti bëban ka Sacerdote unikaman bunántisa okin 'akë kurin ratakakakë anua Diosan banakama kuënëoxun nan a bianan, 4 xubusa okían anuax Diosbë mërananti 'akë a mëu bukúnkë ñukama upíirabu akama këñunbi, Sacerdote 'imainun Levitas unikama raírinën buánkëxa. 5 Usa 'ain ka 'apu Salomón 'imainun kamabi Israelkama abëa timë́kë akaman, bunántisa okin 'akë kurin ratakakakë a 'urama oveja 'imainun vaca aín bënëkama unin tupuntisamaira 'inun rinbëtsinkë akama Dios xaroxuankëxa.

6 Usakin 'atankëxun ka Sacerdote unikaman bunántisa okin 'akë kurin ratakakakë anua Diosan bana kuënëo mëníokin nan a buántankëxun anuxun Dios rabiti xubua 'akë a 'ukëmëu, aín kata upíira anua querubin tankin 'akë aín pëchi tëmú anu nankankëxa, 7 aín pëchi rabë́ an ka bunántisa okin 'akë kurin ratakakakë a mapuanan anun tuinbiankin buánti 'akë tsatisa akëñunbi mapukë 'iakëxa. 8 'Aínbi ka anun tuínxun buánti 'akë tsatisa ax aín rarasama chaxkë́ira aín rëbu 'iakëxa, usa 'ikë ka upí kakë anuxunbi unin aín kata upíira anu nankë istisa 'iakëxa, 'aínbi ka ëmánxun unin istisama 'iakëxa; usai kaisa anúan ënë kirika kuënëoti nëtë sënë́ntamainun 'iakëxa. 9 Usa 'ain ka bunántisa okin 'akë kurin ratakakakë anu raíri ñukama nankan a 'aíma 'imainun maxax pará rabë́ anua usai Israel unikama Egipto menuax chikíkiani kuani 'itia Diosan kuënëomikëxun 'axun Moisésnën Horeb kakë bashi anuxun nan ashi anu 'iakëxa.

10 Usokin nantankëxa sacerdotekamax anuxun Dios rabiti xubu mëua 'ikë upíira kakë anuax chikíkëbëishi ka Diosan 'imikëx kuin këxtuira 'ibúkin mapuakëxa, 11 usakian kuinan mapukë 'ain ka sacerdotekaman anuxun Dios rabitisatankinbi 'ama 'ikën, Diosan kushian anuxun a rabiti xubu nuturukë 'ain.

12 Usa 'ain ka Salomón ësakin kakëxa:

Mix Dios 'aish kamina ësai kiakën, 'ëx kana bë́anbëankibukënu 'iakën.

14 Ësai kitankëx ka 'apu Salomón aua kamabi Israel unikama sëtë́kë, atumi bësuakëti nirakëkin upíokin atu sinánxuni 15 ësai kiakëxa: Israel unikaman Dios ax ka upíokin rabikë 'iti 'ikën, an ka 'ën papa David kásabiokin 'axa, usa 'aish ka ësai kiakëxa: 16 A nëtën 'ën Israel unikama Egipto menua chikínbëtsinkin bëkin kana uinu 'ikë Israel ñaká kamanuabi an anuxun 'ë rabiti xubu 'axúnun kixun kaisama 'ain. 'Aínbi kana David ashi ax 'apu atsíntankëxuan Israel 'ën unikama 'akinun kaisakën. 17 Usa 'ain ka 'ën papa David axëshi anuxun Israel unibu nun Dios rabiti xubu 'ati sinánñu 'iakëxa. 18 Usa uni 'ikë 'unánxun ka Diosan 'ën papa David kakëxa: Anuxun 'ë rabiti xubu 'akin kamina upíokin 'ati 'ain; 19 'aínbi kamina min a xubu 'atima 'ain, min bakë bëchikë achúshi an ka a xubu 'ë 'axúnti 'ikën. 20 Usa 'ain ka Diosan usaía ënë ñukama ax kiásabi oi 'inun 'imiaxa. Usa 'ain kana 'ën papa Davidtan 'ama 'ikëbi anuxun Dios rabiti achúshi xubu an Israel unibu 'ikë nu 'akian Dios 'axuanan bërí Israel unikaman 'apu 'ëx 'ain. 21 'Anan kana a xubu mëu anu bunántisa okían 'akë kurin ratakakakë anua Diosan banakama 'ikë anu nantiribi 'amian ax ka Diosan nun chaitiokëkama Egipto menua chikínbëtsinkin usaía atux 'iti banakama 'inan anu nankë a 'ikën.

22 Usokin atu katankëx ka Salomón anuxun Dios ñuina xaroxunti 'akë a bëmánon, kamabi Israelkaman ismainunbi nirakëti ka manámi aín mëkën rabë́ buarui mëshpakin, 23 munuma banakin Dios ñukákëxa: “Israel unikama nun Dios: naínu 'ianan ka menubi min 'akësaribi okían an ñu 'akë dios achúshirabi 'aíma 'ikën, usa 'ixun kamina mix kiásabiokin an min bana asérabi kuëënkin 'akë akamaishi 'akinin; 24 usa 'ixun kamina bërí min uni 'ën papa David mi 'axunuxun kásabiokin 'an, an ka añu 'anun kaina kai a mi 'axuankëxa, min achúshi ñu abëtan mëniosabi okin 'imainun kamina kakën achúshi min bëchikënën ka anuxun 'ë rabiti xubu 'ati 'ikë kixun ká nëtë a bërí sënë́anxa.

25 Usa 'ain kamina mix Israelkaman Dios 'ixun, minmi 'ën papa David min uni 'ikë kásabiokin asérabi: nun rëbúnkikamaxa min 'imikëx an 'akinti 'apuñua Israelkamax 'inun 'imiti 'ain, usakin 'imikëx ka ain bëchikëkamax ain niti bërúankati 'ikën, ain papan ain niti bëruansaribi okin. 26 Usa 'ain kamina, mix Israelkaman Dios 'aíshmi kia bana axa 'ën papa David min uni ami, kásabi oia 'inun asérabi 'imiti 'ain.

27 'Aínbi kara ¿asérabi Dios ënë menu tsóti 'ik? Naíkamë 'ëo axbi ka chaiira 'aíshi mibë sënë́nma 'ikën, ¡usa 'aínbi kana 'ën unikama anuxun mi rabiti achúshi xubu 'axunun 'amian! 28 Usa 'ain kamina akama këñunbi mi ñukákëxun kuakin; mix Nun Dios 'ixun mi ñukamainun bërí 'ën bana kuakin min uni 'ikë 'ë 'akinti 'ain. 29 Min kamina nëtën 'imainun imë́ribi uisa ñu kara anuxun mi rabiti xubu ënuax 'ia akamabi isti 'ain, mix kamina anu ismina 'iti 'ai kiax kian. Ënuxun 'ëx min uni 'ixun mi ñukamainun kamina 'ën bana kuati 'ain. 30 Usa 'ain kamina 'ën ñukákëxun kuanan min unikama Israel atúnribi anuxun mi rabiti xubu ënëmia iskin mi ñukákëxun atun bana kuati 'ain. Kuakin kamina anumi 'ikë naíkamë 'ëo anuxunbi, 'atima ñu 'aínu 'uchakë akama nu mëníoxunti 'ain.

31 Uin kara aín 'unánkë unimi 'atimati ami banaxunbi anuxun mi ñuina xaroxunti 'akë ënuxun mëníokatsi kixun sinánxun min xubu 'ikë ënu aia, 32 a kamina naíkamë 'ëo anumi 'ikë anuxunbi istankëxun min uisakin kara 'ati 'ikë a mëníonun 'amiti 'ain usokin kamina; min uni 'ikëbi 'ati 'ain. Uin pain kara bëtsi 'aisama oxa a 'atimokin, 'axa usai 'ikë kupí an 'akë ñu istankëxun, 'anan kamina an bëtsi 'atima okëma uni ashi uisabi okima ënti 'ain.

33 Uínsaran kara min uni Israelkama mimi 'uchaia, anúan min usakin 'anun 'amikëxun axa ami nishkë unikaman abë 'akanankin 'atankëxun ñatanbiankin buánkëx tëmërakian, amiribishi mimi sinanakin mi rabianan ñukákin anuxun mi rabiti 'akë xubu ënëmi sinania, 34 kuakin kamina anumi 'ikë naíkamë 'ëo anuxunbi atúxa 'uchakëkama tërënxunti 'ain, usokin 'axun kamina anu tsónumi nun chaitiokëkama 'inan me ënubi amiribishi bëtëkënti 'ain.

35 Uínsaran kara min uni Israelkamax mimi 'uchaia, iskin sapikamina 'uí 'ibúkëbëma me ëskinun 'imiti 'ain, usakin 'imikëbëtanma ka anuxun mi rabiti xubu ënë mi sinánkin amiribishi mi ñukánan mi barikin atux 'uchakëkama chikinamikin 'anë rabiti 'ikën, 36 usokin 'akëxun atun bana kuakin kamina min kaisa Israel kama atúxa mimi 'uchakë a anumi 'ikë naíkamë 'ëo anuxunbi kuakin atun 'ucha tërënxunti 'ain, usakin 'axun kamina añu 'ai kara atux tsóti 'ikë kixun 'unámianan, uisai kara bukukanti 'ikë kixunribi 'unánmiti 'ain. Usokin 'axun kamina amiribishi ënë menu 'uí 'ibumitëkënti 'ain, atun papakama kia bana 'aia atun bakë bëchikë min unikama atux tsónun.

37 Uínsaran kara min uni Israelkamax mimi 'uchaia a 'unánkin atu 'atimokin a piti ñu 'aíma 'aia panáni 'ianan barin xarokëx nikama chushimainun, 'aisama 'insín 'imainun an ñu 'apákë këñuti champu unimianan 'aisamaira 'ixuan xënan ñu 'apákëkama xarokin chushiminun 'imianan; uínsaran kara axa numi nishkë unikaman nun ëmakama bëarabuinxun nu 'aisatania, 'ianan kara bëtsi ñu kamanribi nu 'amainun 'insin kushinribi nukama këñuti 'ikën, 38-39 usai ñu 'ikëbë tëmërakin Israel unikaman Diosan ka nux ami 'uchakë 'ikë ësokin nu tëmëramia kixun sinánkin manámi mëshpakin anuxun mi rabiti xubu au bësui nixun ñukákëxun kuankin kamina. Anumi 'ikë naíkamë 'ëo anuxunbi atun bana kuakin; uisa ñu 'atima kara 'akanxa kixun min 'unánkin asérabi mimi katamëkian mi ñuixunkëxun atun 'akë ñukama mëníoxunti 'ain, minshi kamina aín nuitunëan unin sinánkë a 'unanin. 40 Usokinmi 'akëxun ka añu 'anun kaina atu kai usokinbi ami nun chaitiokëkama 'inan me ënu pain tsókë 'ixun min kakësabiokin 'akánti 'ikën.

41 Usaribitia Israel unibu nukën ëmanu tsókëma atuxribi, min kamina kushiira 'ixun ñu 'ai kixun ñuikania kuabëtsini 'ura men tsókë unikamax utankëxun, 42 anuxun mi rabiti 'akë xubu ënë kupin mi ñukákëxun kamina, min anë chaiira a 'imainun min kushi a ñui kia kuati 'ain. 43 Usa 'ain kamina anumi 'ikë naíkamë 'ëo anuxunbi kuakin, añu kara mi ñukákania akamabi 'akinti 'ain, usakinmi 'aia kuakin ka bëtsi bëtsi menu tsókë unikamanribi min uni Israelkaman 'akësaribi okin mi 'axunkin, 'ën mi 'axunkë xubu ënëx ka anuxun asérabi a rabiti 'akë 'ikë kixun atúnribi 'unánti 'ikën.

44 Uínsaran kara min uni Israelkamax axa atumi nishkë unikamabë 'akananux min xukëx uinu kaina xuti anu kuania, anuxua mibë banakin min nu kaisuan ëma ënëmiokin isanan 'ën unikama anuxun mi rabiti 'amia xubu, 45 amiokin iskin ñukákëxun kamina naínuxunbi atun bana kuakin añu kara mi ñukatia a 'akianan, uisai kara 'ia anuabi 'akinti 'ain.

46 'Imainun kamina kamabi menu 'ikë unix 'ikësaribitia mimi 'uchaia atumi xuamati nishkin axa atubë nishanankë unikaman ñusma oxun 'atankëxua raíri bitankëxun atux anu 'ikë ëma 'ura buananbi urairama ëmanu buánkëxuan, 47 anua buankankë me anuax tëmërakin mimi sinanakin 'akinun kixun mi 'aisama ñu 'ai kananuna ami 'ucha kixun ñukákin kakëxun kamina, 48 asérabi amiribishi atun Dios 'ikë mi kuëënkin këmëkinma mimi sinanakian, anua ami nishkë unikaman ñatanbiankin atu buánkë me anuxun mi ñukákin, nun chaitiokë kamami 'inan me ënëmi sinánkin 'anan minbimi atu 'inan ëma ënë 'imainun anuxun mi rabiti xubu 'amikë ënëmi okin iskin ñukákëxun kamina, 49 atun bana kuakin anumi 'ikë naíkamë 'ëo anuxunbi atuan mi ñukákësabiokin 'akinti 'ain. 50 'Akianan kamina min kaisa unikama atúxa mimi 'uchakë 'ikëbi mëníoxunkin bana kuakëma unibu 'ikëbi atux 'uchakëkama tërënxunti 'ain. Usakin 'anan kamina axa atumi nishkë unikama atúan nuibakin 'akinun sinánmiti 'ain. 51 A unikamax ka min kaisa unibu 'aish min unibi 'ikën; minbi kamina Egipto menuaxa tsi ënxaira anu ñu xuiti 'akë anuax 'ikësaira 'inua ñu mëi tëmëraiabi atu chikiankën.

52 Usa 'ain kamina min unikaman ñukákëxun kuakin min kaisa Israel unikama munuma banakin mi ñukákëxun kuati 'ain. ¡Mix Dios 'ixun kamina nun bana kuati 'ain! 53 Minbi kamina atun Dios 'ixun 'akinuxun min kaískë unia 'ikanun bëtsi bëtsi menu 'ikë ëmakamanua minanbi 'inun atu bikin, min uni Moisés kai nun chaitiokëkama Egipto menua chikíntankëx kiakën.”

54 Ësai abë banakin Dios ñukátankëxun sënën oin ka Salomón aín rabuxunën menu rantinpuruni tsóbuxun anuxun ñuina xarotia 'akë bëmánon auxun aín mëkën rabë́ manámi oi mëshpati tsóxun ñukákëxa, 55 usokin 'atankëx nirukin ka kamabi Israel unikama timë́kë a upíokin sinánxuni munuma banai ësai kiakëxa: 56 ¡Nukën 'Ibu Dios ax ka upíokin rabikë 'iti 'ikën, an ka aín unibu Israelkama añu 'akinux kara kiakëxa akamabi asérabi upiti bukunun 'akiankëxa! Usa 'ixun ka an 'akatsi kia ñukama achirabi 'aíma 'ikima kamabi ñu aín uni Moisés kásabiokin 'akëxa. 57 Usa 'ain ka Nukën 'Ibu Dios bërí nubëribi 'iti 'ikën, nun chaitiokëkamabë 'iásaribiti. Usa 'ixun ka nukama ënkinma 'akinti 'ikën, 58 'akianan ka asérabi nux ami sinánkin kamabi ñu 'anun nuribi sinámianan ax kikësabi oi 'iti bana 'imainun a tanti banakama nun chaitiokëkama 'inan aribi nun 'unánun nuribi sinánmiti 'ikën. 59 Usa 'ain kana 'ën kuëënin, Nukën 'Ibu Diosan ka ñantan 'imainunbi nëtënbi 'ën ñukákë ñukama sinánkin añu karanuna kuëëni akamabi aín unibu Israel 'ixun nun rabikëxun añu kara nëtë kamabi 'inántisa tania a nu 'inánti 'ikën, 60 usakin nu 'akinia ka bëtsi menu tsókë unikaman Israel unikama an 'akinkë Dios usaribi bëtsi Dios ka 'aíma 'ikë kixun 'unánti 'ikën. 61 Usa 'ain kamina mitsun këmëkinma Nukën 'Ibu Diosan bana kikësabi oi 'ikin a tanti banakama 'imainun ax kikësabi oi 'iti banami bërí 'akankësa ësabiokin 'akánti 'ain.

62 Ësokin atu kai sënë́ntankëxun ka 'apu Salomónnën kamabi Israel unikama timë́kë akamabëtan ñuina rëtankëxun Dios xaroxuankëxa. 63 Usakin Dios ñuina xaroxunkin ka Salomónnën veintidós mil vaca bënë 'imainun ciento veinte mil ovejakama atun 'ucha kupín xarokëxa, usakin 'akin ka 'apu Salomón 'imainun kamabi Israelkaman anuxun Dios rabiti xubu 'akë a upí 'inun mëníokëxa.

64 A nëtënbi ka 'apu Salomónnën anuxun Dios rabiti xubu 'ukëmëua 'ikë me mëníonx ënëx ka anuxun Dios rabiti xubu 'ikë kian timë́kamë 'ëoxun pikankëxa, usokin 'atankëxun ka anuxun Dios ñuinakama xaroxuanan, a nanxuinshiti ñu akamaribi 'akëxa, 'imainun ka atun 'uchakama kupían xarokë ñuina aín xëni akamaribi xëkuë bëmánon anuxun ñuina xaroti manë 'akë axa chukúma 'ain, kamabi a ñukama anuxun xaroisama 'aish sënë́nkëbëtama, ñuina xaroti nankëkama 'imainun a nanxuinshiti ñukama 'ianan atun 'ucha kupí xarokian aín xëni bikë akama timë́xun xarokëxa. 65 Usakin ka Salomónnën kamabi Israelkama axa anu timë́kamë 'ëokë unikama 'imainun Hamat kakë ëmanuaxa rikuatsinkë 'ianan, anua Egipto me sënënakëkë anuaxribia rikuatsimainun Israelkama anua 'ikankë menuax uxun 'uta 'ax 'iti fiesta anun Dios rabikin 'akankëxa, 'anan ka bëtsi fiestaribi anuxunbi mapai achúshi 'imainun rabë́ nëtë sënë́nmikin 'akankëxa, usakin a fiesta rabë́ 'akin ka catorce nëtë sënë́nmikin 'akankëxa. 66 Usakin fiesta ónkë a pëkaran ka 'apu Salomónnën kamabi unikama atun 'ikënu kuantanun kixun kakëxa, kakëx kuanuxun ka atúnribi kana kuani kixun kabiani atun 'ikënu rikiani 'itsaira kuëëni Diosan aín uni David 'akianan anbia kaisa Israelkama 'akian akama sinani kuëënkiani kuankankëxa.