2 Anuxun Dios rabiti xubu Salomónnën 'amia ax ka 'iakëxa, veintisiete metro aín chaxkë́ 'imainun nueve metro aín naxba 'ianan ka trece metro 'imainun medio metro aín manámi okin tupunkë 'iakëxa. 3 'Imainun ka anuxun Dios rabiti xubu bëtánain anua uni niti 'akë ax nueve metro aín chaxkë́ tupunkë 'ianan, xubun naxbabëtan sënë́nbi 'akë, 'ianan ka ain naxba cuatro metro 'imainun medio metro 'iakëxa. 4 Salomónnën ka xubunuxun isti a manámi 'ikë 'ain kata itsi naxba 'amianan, aín ëman 'ikë manën xantsëkakinma anun isti axa xaban xabanbu 'itánun 'akë anun bëaramiakëxa. 5 Usakin 'anan ka anuxun Dios rabiti xubu kënëkin buinarakë amibi birukin xubu amo rabë́ 'anan 'ain kaxuribi 'akëxa, 'akin ka bëtsibëtan sënë́nbi 'akin aín kata anua sacerdotekaman mëëkë ñukama bukúnti 'amiakëxa. 6 Usa 'ain ka anuxun Dios rabiti xubu amibi bikian 'akë xubu ax aín mëu 'ikë rabë́ metro 'imainun veinticinco centímetro aín naxba 'ianan ka aín nëbëtsin 'ikë 'ain manámi 'akë ax rabë́ metro setenta centímetro 'imainun; aín maskuanuira 'ikë axribi tres metro quince centímetro aín naxba 'iakëxa; usa 'ain ka anuxun Dios rabiti xubu aín ëman 'akëa chaiira 'ikëbi nëriokin chukúma okëxa, xubu itsi 'akin ami aín 'irakankë i rakantisamabi 'itánun. 7 'Ianan ka anuxun Dios rabiti xubu 'akin an ramënioti unikaman upíokin ramëniokëshi maxax 'iakëxa, usa 'ain ka xubu 'akëbëtan uisa martillonënbi ñu mëia kuakëma 'ianan, manë ruën mëëkëbi kuatima 'ianan, uisa manë ñunbi ñu mëia kuama 'ikën. 8 Usa 'ain ka anu ñu bukúnti xubunu men atsínti aín xëkuë ax ka anuxun Dios rabiti xubu mëkeu 'akë 'iakëxa; 'imainun ka aín nëbë́tsin 'ikë aín kata itsi anu aín maskuannu anun kuaruti aín tapiti tëntuankin uarukin 'akë 'iakëxa. 9 'Amianan ka Salomónnën anuxun Dios rabiti xubu 'amikë unikaman i tukapakënën pain, an tupëonti 'atankëxun kunxan upíirabu 'itánun tukapakë rokë aribi i tukapakë ami bikin 'akëxa. 10 'Anan ka anuxun Dios rabiti xubu kënëkë rapasu anu ñukama bukúnti 'akë xubu ain manámi tupunkë ax rabë́ metro 'imainun veinticinco centímetro 'iakëxa, ax ka xubu cha anun kënëkë amibi nankin kunxan tukakë 'irakankë 'iakëxa.

11 Usakin 'axun sënë́onkë 'ain ka Diosan Salomón kakëxa: 12 Anuxun 'ë rabiti xubumi 'amikë ax ka 'ëx anu Israel unikamabë 'iti 'amikë 'ikën, usa 'ain kana mi kaisatanin, min 'ën kakësabiokin 'anan 'ëx usakin 'ati kuëënkë usakinbi 'akëbëtan kana 'ën min papa David usakin mi 'axunuxun ka usakinbi mi 'axúnti 'ain; 13 'aí kana Israel unikamanu 'iti 'ain; usai 'i kana Israel kama ënima anuxun 'ë rabiti xubunu 'iti 'ain.

14 Usakin 'axun ka Salomónnën 'amikë unikaman anuxun Dios rabiti xubu sënëonkëxa. 15 Sënë́onkë ka an 'akë unikama Salomónnën 'ain namë 'ukëmëu 'ikëa kunxan tukapakënën bëpankin kënënun 'amiakëxa. 'Amixun ka manámixun meu okin bëpákin 'anan, anun niti aín namë́nu 'ikë aribia pino kakë i tukapakënën 'anun 'amiakëxa. 16 'Anan ka manámixun meu okin kunxan tukapakënën anuxun Dios rabiti xubu aín tsipunu nueve metrobëtan sënën bëarakin kënëakëxa, ax ka ain kata upíira 'itia 'akë 'iakëxa. 17 'Imainun ka anuxun Dios rabiti xubu aín mëu kata upíira aín sënë́nkë anuxunbi tupúnkëx ka aín chaxkë́ dieciocho metro në́nkë 'iakëxa. 18 'Atankëxun ka anuxun Dios rabiti xubu aín 'ukëmëu 'ikë, kunxan upíokin tukapakë abi ñu uá 'imainun ñu bimi tankin anun upí 'itánun nabánkë 'iakëxa. Akamax ka kunxan ishi 'akë 'iakëxa.

19 Usakin 'akë 'ain ka Salomónnën xubu a mëu kata upíira anu 'ati a mëníokëxa, ax ka anu Diosan bunántisa okin 'akë achúshi ñu mëníokë a nanti 'iakëxa. 20 Kata upíira a 'ukëmëu 'ikë aín chaxkë́ ka nueve metro 'ianan, aín naxba nueve metroribi 'ianan ka manámi 'ikë axribi nueve metro 'iakëxa. Upíira kakë a bëtánain ka Salomónnën, 'anan anuxun ro xaroti kunxan 'amitankëxun upíira 'itánun kurin ronun 'amiakëxa. 21 'Anan ka aín namëkëñun kata upíira aribia kurin 'anun 'amiakëxa, 'atankëxun ka kurin ronkë risi aribi anun atsínti a bëtánain tëkërë kanun 'amiakëxa. 22 Usakin 'akin ka kamabi anuxun Dios rabiti xubu aín 'ukëmëu 'ikë kurin upíokin 'anan anuxun ñuina xaroti 'akë kata upíira a bëtánain 'ikë aribi 'akëxa.

23 'Anan ka rabë́ querubin tankin olivos kakë i abi 'amitankëxun aín kata upíira anu nitsíankëxa. Usakin 'amikë a achúshi achúshinëx ka cuatro metro 'imainun medio metro aín chaxkë́ 'iakëxa, 24 'ianan ka ain pëchi achúshi achúshinëx rabë́ metro 'imainun veinticinco centímetro 'iakëxa. Usa 'ain ka bëtsin rëbu 'ikë anuxunbi bëtsin rëbumiokin tupúnkëx, i 'akë ain pëchi cuatro metro 'imainun medio metro 'akë 'aish bëtsibëtan sënë́nbi 'iakëxa. 25 I querubin rabë́ tankin 'akë ax ka bëtsibëtan sënë́nbi 'ianan; bëtsi iskësabi 'itánun 'akë 'iakëxa. 26 'Ianan ka aín chaxkë́ribi cuatro metro 'imainun medio metro 'iakëxa. 27 Usa 'ikë ka Salomónën aín kata upíira anu nitsínun 'amiakëxa. Querubin tankin 'akë a ka ain pëchi pëchakin nitsíankëxa, usa 'ain ka bëtsi pëchia amo 'ikë anun chikënkëmi pëtíkimainun bëtsíxribi amo 'ikëmi pëtíkikë 'iakëxa, 'ianan ka amo 'ikë rabë́ axribi bëtsibë pëtikanankë kata upíira anubi 'iakëxa. 28 Usakin nitsintankëxun ka Salomónnën aín unikama kurin querubin tankin 'akë a upí 'itánun 'anun 'amiakëxa, 29 'amitankëxun ka anuxun Dios rabiti xubu chikënkëkama aín ëman 'ikë 'imainun 'ukëmëu 'ikë anuribi querubin tankin 'anan, xëbin 'imainun ñu uá tankinribia 'anun 'amiakëxa. 30 'Anan ka anuxun Dios rabiti xubu ain 'ukëmëu 'imainun aín ëman 'ikë anu niti aribi kurin upí 'itánun 'amiakëxa. 31 Usakin 'anan ka anun kata upíira anu atsínti ain xëkuë anun, xëputi olivos kakë i tukapakë 'amiakëxa, 'imainun ka ami bikin xëputi nitsínti ax mapai achúshi 'itanun upíokin pará 'inun tukakë anu ñu tankin 'akë 'iakëxa. 32 Aín xëputi rabë́ ax ka olivos kakë i tukakë 'iakëxa, anu ka querubin tankin rabë́ 'anan, xëbinsa okin 'anan ñu uasa okin 'akëxa; 'axun ka ñukama tankian 'akë a upí 'itánun kurin 'amiakëxa. 33 'Anan ka anuinra Dios rabiti xubunu atsínti aín xëputi nëbë́tsin 'ikë, amiokin 'aruti a olivos kakë i nitsínkë, ax ka rabë́ 'imainun rabë́ okin pará 'itánun tukakë 'iakëxa. 34 Aín xëputi rabë́ ax ka pino kakë i tukakë 'akë 'iakëxa, usa 'ain ka xëputi rabë́ ax xëókakëx abi xëpúakakë 'iakëxa. 35 A xëpútinu ka querubin tankin 'anan, xëbin këñun ñu uá tankin 'akëxa, 'axun ka ñu tankin 'akëkama a kuri parókin 'akë anun ratakakakëxa. 36 Usokin a kamapain 'atankëxun ka ëman anu niti me aribi rabë́ 'imainun achúshi okin bëtsimi bëtsimi 'arukin maxá ramëniokë puruakëxa, 'axun ka kunxan tukapakë a buinarakin a manámi 'akë 'iakëxa.

37 Rabë́ 'imainun rabë́ baritia ax 'apu 'ikë 'ain ka Salomónnën Ziv, kakë 'uxë 'ikëbëtan anuxun Dios rabiti xubu 'akin ami puruti kamapain 'akëxa; 38 usokin 'axun ka axa 'apu 'ikë mapai rabë́ 'imainun achúshi bari 'ikë anua mapai achúshi 'imainun rabë́ 'imainun achúshi 'uxë Bul kakë anun ka xubu 'akë a kamabi mëníokin sënëonkëxa. Usakin 'akin ka mapai achúshi 'imainun rabë́ baritia Salomónnën atu ñu mëëmikin sënëónkin 'amiakëxa.