Salomónnën 'apu Hiram Tiro ëmanu 'ikë abëtan upitax tsónuxun mënio ñuikë bana
(2 Cr 2.1-18)
5
Usa 'ain ka Tiro ëmanu 'ikë 'apu Hiram an bërámabi Salomónnën papa David a 'unánkë 'iakëxa. Usa 'ixun ka Salomón ka Israel unikaman aín papa 'asaribiokin atun 'apu 'inun 'imiaxa kixun ñuikania kuakëxa, kuaxun ka aín unikama anu kuanxua Israel unikaman bërí anëkë 'apu istánun kixun xuakëxa. 2 Xukë ka ësokian 'apu Hiram kaxuntanun kixun kamiakëxa. 3 Minbi kamina 'unan 'ën papa Davidnëx ka axa ami nishkë unikamabëshi 'akanankin atumi mëkaxun anuxun Dios rabiti achúshi xubu 'aisatankinbi 'ama 'ikën. Usai 'iaka Diosanbi axa aminishkë unikama 'akian kupitanuma 'anun 'amiakëxa. 4 Usai 'ikin 'aiama okin ka bërí nun Diosan nukamaxnu 'akananima axa nu 'urama tsókë unikamabë upitaxëshi bukunun 'imiaxa, usa 'ain kananuna ax numi nishkin nu 'akatsikixun ubioti 'aíma 'ain upitax bërí bukuin. 5 Usa 'ain kana anuxun nun Dios rabiti xubu achúshi 'amiti sinan, an ka bërámabi 'ën papa David ësokin kakëxa, min bakë bëchikë a 'ën 'apu 'inun 'imiti an ka aín unikama anuxun 'ë rabiti xubu achúshi 'anun 'amiti 'ikën. 6 Usa 'ain kamina min unikama Líbano menua 'ikë kunxan upíirabu a 'ë tëaxunun 'amiti 'ain. Min 'amikëbëtan kana an 'ë ñu mëëxunkë unikama 'aia atu 'akinun xuti 'ain, usakin 'aia kana an mi ñu mëëxunkë unikamami kupíonun uiti kuríki kaina 'ë ñukatin atibi mi 'inánti 'ain, minbi kamina 'unan Israel unikaman ka uínbi i tëati 'unanima, Sidonio kakë ëmanu tsókë unikaman 'akësokin.7 Usokian kakëx ka Tironuaxa ukë unikamax atun ëmanubi rikiankëxa, rikianxun ka Salomónnëa kamikë banakama 'apu Hiram ñuixuankëxa. Ñuixunkëxun kuati ka 'itsaira kuëëankëxa kuëëni ka, munuma banai kiakëxa: ¡Nukën 'Ibu Dios ax ka bërí upíokin rabikë 'iti 'ikën, an ka David aín bakë bëchikë achúshi 'inánkëxa, kanitankëxuan a tuakëx sinánñuira 'ixun aín aintsikamabi ax 'apu 'ixun 'akinun 'imiakëxa! 8 Usa 'ain ka nëtë itsin Hiramnën amiribishi aín unikama Salomón kaxuntanun kixun xutëkëankëxa: Xukin ka ësokin kamiakëxa, minmi 'ë kamikë banakama ka 'ën unikaman 'ë kaxa usa 'ain kana añu 'axúnti kaina kuëëni a mi 'axúnti ka asábi 'ikën, usa 'ain kana min ñukákësabi okin kunxankama 'amianan pino kakë i akamaribi mi 'amixunti 'ain. 9 An 'ë ñu mëëxunkë unikaman ka Líbano kakë ni anuxun buánpaxun parúmpapa anu sënën mi i buánxun bukunxunti 'ikën, anuxun kana tapusokin 'atankëxun tapukama a bakan buántanun xuti 'ain xukëx kuabutia kamina ikama biti 'ain, uinu sënën buánxunun kaina 'ë kai anubia mi buánxunun kana 'amiti 'ain. Anuxua tapankama a bakan buántanun xutia kamina kuabutia ikama a biti 'ain. Min kamina axa 'ën xubu chaiira anu 'ikë unikaman pitishi 'inánkin anun 'ë kupíoti 'ain.
10 Usa 'ain ka Hiramnën an ñukákësabi okin Salomón kunxan, pino kakë i akamabi aín unikama 'amixun 'inánkëxa, 11 'inánkëxun ka Salomónnënribi Hiram an ñukákësabi okin aín xubunu 'ikë unikaman piti xuxuankëxa: cuatro millones cuatrocientos mil litro trigo 'imainun cuatro mil cuatrocientos litro olivo bimi 'akë xëni akama Salomónnën 'apu Hiram baritia tibi buámiakëxa. 12 Usa 'ain ka Diosan an kásabiokin Salomón, sinánñuira uni 'inun 'akiankëxa. Usakian 'imikë 'ain ka Salomónnën 'apu Hirambë mënionankëxa usakin 'an ka unikamax 'akánanti sinanima upitax tsókankëxa.
13 Usa 'ain ka 'apu Salomónnën kamabi Israel menu 'ikë unikamax ka achúshi ñu mëëti 'ati kamáxbi timë́kanti 'ikë kixun bana piküakëxa, usokin 'an ka axa tëëti unikamax timëkëx treinta mil uni sënën 'iakëxa, 14 usokin timëxun ka Salomónnën Líbano menu xukin diez mil uni axa achúshi 'uxë 'imikin ñumënun xuakëxa, xukëx kuanxa tëia ka ax pain kuankë unikama a ain xubunu bëanan axa kuankëma kama aribi achúshi 'uxë 'imia atúxribi tëëkanun kixun xuakëxa. Usokin xukëx ka ñu mëëi a unikamax achúshi 'uxë 'imi Líbano menu 'ikankëxa 'imainun ka tanti uax atux xubunu rabë́ 'uxë 'imishi 'iakëxa. An atu bërúanxun ñu mëëmiti ka Adoniram kakë Israel uni achúshi anëkë 'iakëxa. 15 'Imainun ka anua tëkankë ni anu raíri unikamax ciento cincuenta mil an Salomón ñu mëëxunkëkama ax 'iakëxa ochenta mil ka uni an maxax upíokin tukapakin ramëniokëkama 'iakëxa, 'imainun ka setenta mil unikama axribi an raíri ñukama papiti nankë 'iakëxa, 16 'imainun ka an tëia unikama bërúantia anëkë tres mil trescientos uniñuribi Salomón 'iakëxa. 17 Usa 'ain ka 'apu Salomónnën aín unikaman maxax chaiirabu bianan kupíikëira akamaishia anuxun Dios rabiti xubu 'akin ami birukin 'ati a 'imainun, maxax tukapakin mëníokë akama binun kixun kakëxa. 18 Usa 'ain ka Salomón an ñu mëëxunkë an xubu 'ati 'unáinra unikamañu 'imainun ka an Hiram ñu mëëxunkë unikama 'imainun. Guebal kakë ëmanua tsókë unikamanribi i bianan maxaxribi tukapakin ramëniokin anuxun Dios rabiti xubu 'ati bitsia atu 'akiankëxa.