3 Usa 'ain ka Salomónnën Dios nuibati ami katamëkin ax kikësabi oi 'iti aín banakama tankin, aín papa Davidtan 'asaribiokin Diosan kakësabiokin 'akëxa, 'akin ka anbi bashinu anuxun xaroti 'atankëxun ñuina rëtankëxun 'aímai këñuti xarátia sanutanun, 'anan sanuira rokëñun xaroxuankëxa, 4 usakin 'anan ka Gabaón kakë ëma anuribi ñuina rëtankëxun anuxun xaroxuni kuankëxa, anu ka anuxuinra ñuina xaroti manan upíokin 'akë 'iakëxa. Usa 'ain ka manan kuaxun anuxun ñuina rëxun mil okin Dios xaroxuankëxa.

5 Achúshi ñantan ka Gabaón ëmanuxun, 'uxkë namámikin Diosan Salomón kakëxa: Añu ñu kaina kuëënkin 'ë ñukáti akana mi 'inánti 'ai kixun ka Diosan kakëxa.

6 Usakian kakëxun ka Salomónnën kakëxa: “Min kamina 'ën papa David min uni 'ikë, 'itsaira nuibakin 'akiankën, an ka minmi 'akinkëxun upíokin ñu 'anan, aín nuitunënbi sinani mimi katamëkin upíokin ñu 'akëxa. Usakin 'aia 'ën papa 'itsaira nuiba 'ixun kamina aín bakë bëchikë 'ikë, ax 'iásaribiti 'apu 'inun bërí 'ë 'imian. 7 Dios mix 'ën 'Ibu 'ixun kamina, 'ën papa David 'iásaribiti 'apu 'inun 'ë 'imian, 'aínbi kana 'ëx achúshi uni bëná pain 'ixun uisakin ñu 'ati kara kixun 'unairakëma 'ain. 8 Usa 'aínbi kana min uni 'inunmi kaisa unikama 'akinti 'ain: 'Aisamaira 'inun 'uakamë 'ëoi ëma chaiira, 'ianan ka tupuntisamaira 'ikë uiti kara kixunbi 'unántisama atux 'ikën. 9 Usa 'ain kamina upíokin sinánkin atun 'apu 'ixun min kaisa unikama 'akinun 'ë sinánmiti 'ain, sinánmianan kamina uisa ñu kara upí 'ikë, uisa ñux kara 'atima 'ikë akamabi 'unánun 'ë 'akinti 'ain; usakin min 'akëbëma kara, ¿min unikama an tupuntisamaira 'inun 'aisamairai 'uakamë 'ëokë 'ain uix atun 'apu 'iisa uni 'ik?”

10 Ësokian abë banakin 'akinun kixun ñukákëx kuëënkin ka Diosan Salomón, 11 kakëxa: Min kamina mi 'akinun 'ë ñukákin 'itsaira baritia tsóti ñukánan ñuñuira 'iti ñukánan mimi nishkë unikama bamaminun 'ë ñukákima uisakin kaina 'ën unikaman 'apu 'ixun atu 'akinti 'ai kixun 'ë ñukan, usa 'ain ka ax asábi 'ikën, 12 usa 'ain kana 'ëmi bërí ñukákësabi okin mi 'axúnti 'ain: 'Axunkin kana ñu 'unánkëira uni 'inun mi 'imianan kamabi ñu upíokin 'anun upí sinánñuira mi 'imiti 'ain, uinu 'ikë unibi kana bëráma mi, 'akëmapan 'ixun usakin 'ama 'ain, 'aínbi kana usakin mi 'atankëxun bëtsi uniribi misaribi 'inun 'imitima 'ain. 13 'Imainun kana, ñuñuirami 'inun mi 'imikin 'ëmi ñukákë ñukama mi 'inánti 'ain, 'aínbi ka mixmi ñukëma 'aish tsókëpa 'ain misaribi 'apu itsi ënë menu 'aíma 'iti 'ikën. 14 Minmi 'ëx kuëënkësabi okin 'anan, ax kikësabi oi 'iti 'ëx kia banakama 'imainun a tanti banakama, min papa Davidtan 'asaribiokin 'akëbëtan, kana xënibutimi tsónun mi 'imiti 'ain.

15 Usakian, kakëx bësukin ka Salomónnën namákin kana ënë banakama kua kixun sinánkëxa. Usakin namábiani Gabaón ëmanua kuanx Jerusalén ëmanu bëbax anua Dios bunántisa okin axun kë kurin ratakakakë nankë 'ikë anu kuanxun ka, anuxun atun ñu 'aisama 'akëkama mëníokanun unikama 'imikin Salomónnën ñuina rëxun Dios xaroxuankëxa. Usokin 'atankëxun ka aín piti ñukama chookin 'amitankëxun aín unikamabëtan piakëxa.

16 Achúshi nëtën ka bëtsi bëtsi unin aín nami 'akë xanu rabë́ anua 'ikë aín xubunuax 'apubë banai kuankëxa. Kuanx anu atsínxun, 17 ka xanu rabë́ kuankë a achúshinën kakëxa:

—¡Mixmi 'apu 'ikë kana ësokin mi kain! Ënë xanubë kana 'ëx achúshi xubunu 'in, 'ëx kana abë 'aish anuax 'ën tuá bakë́an. 18 Anun 'ëx bakënkë rabë́ 'imainun achúshi nëtë 'aínbi ka ënë xanuribi aín tuá nachikiaxa. Uisa uni 'unánkëmabi ka a xubunu nubë 'ima. Nu rabëtaxëshi kananuna anu 'in. 19 Usainu anu 'ikëbëbi ka achúshi imë́ ënë xanun tuá aín titanbia 'uxun rëtsë́kakëx ñuaxa. 20 Usakin aín tuá 'axun imë́ naëx bësuxun, 'ëx 'uxkë 'ain 'ë rapasu 'uxmikë 'ikëbi 'ën tuá bianan, aín tuá ñukë a 'ë rapasu nanxa. 21 Pëkarakëma 'aínshi bësui nirukin xuma 'aminuxun 'ën iskëxbi ka 'ën tuá rëtëkë 'iaxa. 'Aínbi kana 'aimaia xabati pëkarakëbëtan ñachakin iskëxbi ka 'ëx bakënkë 'ën tuá ama 'iaxa.

22 Ësaia kikëbëbi ka xanu itsi axribi ësai kiakëxa:

—Usama ka bamakëma tuá ënëx ka 'ën tuábi 'ikën, bamakë tuá ënëx ka min tuá 'ikë kixun ka xanu itsi an bëtsi kakëxa. Ësakin kakëxunbi ka ax pain aín tuá bamakë ñui kikë an bëtsi kakëxa:

—Usama ka axa ñukë tuá ënëx ka min tuá 'ikën, usa 'ain ka bamakëma asábi ënëx 'ën tuá 'ikën. Ësai kánani ka a xanu rabëtabi 'apun kuamainunbi kuëbikanani kanankëxa.

23 Usai kanania a xanu rabë́ kuëbikanania kuakin ka 'apun sinánkëxa. Ënë xanux ka ñukëma asábi ax isa aín tuá 'ikë, kia kianan ka bamakë ax isa xanu itsi aín tuá 'ikë kia; ¡'aínbi ka bëtsix aín tuá ñui asérabisa 'ain tuá rëtëkëma 'ikë kia! 24 Usai kanania kuakin ka 'apun 'ain suntárunën kushi kakëxa:

—¡'Ë kamina manë xëtokë achúshi bëxúnti 'ain! Usakin kakëxuan manë xëtokë uania ka 'apun aín suntárunën kushi achúshi kakëxa: 25 Tuá ñukëma ënë kamina nëbë́tsi tuurabë́ oxun, amo 'ikë bëtsi xanu 'inánan amo 'ikëribi bëtsi 'inánti 'ain.

26 'Usakin 'anun 'apu kikëbë ka tuá ñukëma aín tita ax, 'itsaira ratuti 'apu kai kiakëxa:

—¡Mix 'apu 'ixun kamina ñukëma tuá a min suntárunën usakin 'anun 'amitima 'ain! ¡Ënë xanu kamina tuá ënë 'inánti 'ain! Kiax xanuitsi ax kikëbëbi ka bëtsíxribi 'apu kai kiakëxa:

—Tuá ënëx ka 'ënan 'ianan minanribi 'itima 'ikën. ¡Usa 'ain ka nëbë́tsi tuurabë́ okë 'iti 'ikën!

27 Usai a rabëtax kikëbëtan ka 'apun sinanatëkënkin ësokian 'anun kakëxa:

—Tuá ñukëma a kamina uisabi okima 'ain tita 'inánti 'ain. Ax ka asérabi aín tita 'ikën.

28 Usakian 'apun xanu rabë́ nishanankë mëníoxunkë ka kamabi Israel unibunën kuakëxa, kuati ka 'apumi rakuë́ti Diosan ka a 'apu sinánñuira 'inun 'imianan 'upíokia ñu 'anun 'imiaxa kiax kikankëxa.