Davidtan aín bakë bëchikë Salomón ax ñukëbëa usai 'iti banakama ñuixunkin ka bana
2
Ax ñuti nëtë 'urama 'ikë 'unánkin ka Davidtan, aín bakë bëchikë Salomón kuënxun ësokin kakëxa: 2 Kamabi uni axa ënë menu tsókë unikamax ka aín nëtë 'ikëbë ñuia, usa 'ain kana 'itsama nëtë́ishi 'itankëx ñuti 'ain. Usai 'ëx 'ikëbëbi kamina mix kushi sinánñu 'aish añubimi rakuëma 'iti 'ain. 3 Usai 'ikin kamina añu 'anun kara Dios kiakëxa ax kiásabiokin 'anan Moisésnën Diosan 'amikëxun kuënëo banakama kikësabiokin 'ati 'ain, usokinmi 'akëbëtan ka Diosan kamabi min 'akë ñukamaxa uinu kaina kuani anuxunmi 'akëxbi upí 'inun 'imiti 'ikën. 4 Usokin 'akëbëtan ka Diosan 'ëbëtan achúshi ñu 'ásabiokin nun rëbúnkikamaribi añu 'anun kara Diosan atu kaia usakinshi aín sinan upí 'ixun 'ati 'ikën, usakin 'aia ka uínsaranbi nun aintsikamaxëshia Israel unibunën 'apu 'ixun 'akinun 'imiti 'ikën.5 “Minbi kamina 'unan uisokin kara Joab Seruiánën tuá an 'ë 'akëxa kixun, an ka Israel unibunën suntárunën kushi rabë́: Nernën bakë bëchikë Abner a 'imainun Amasá Itránën bakë bëchikë aribi, aín imi 'apamikin 'akëxa, usakin 'atankëx ka unikaman isa 'akanankënuxun axa kia këmënuxun 'akëxa, 'aínbi ka a nëtëkaman uni 'akanantëkënima asabi pain tsókë 'iakëxa, usa 'ain kamina an ka usokin 'akëxa, usa 'ain kaina uisa oisatani usakin 'atimoti 'ain. 6 Usa 'ain kamina uisoxun 'ati kara kixun istankëxun 'akin, abia xënibuti tsótankëx ñunu ëntima 'ain.
7 'Imainun kamina Barzilainën, bakë bëchikëkama Galaad menua bukukë akamabëshi, nuibanani tsókin atu kuëntankëxun min xubunuxun pikinti 'ain, a unikaman ka 'ë min xukë́n Absalónnën 'ati rabanan ami rakuë́ti abatiabi 'ë 'akiankëxa.
8 'Ianan kamina, anu kara Simí kakë uni Guerá aín bakë bëchikë Benjamín aín rëbúnkinën ñaká axa Bahurim ëmanu tsókë a 'ikë kixun kuati 'ain. An ka 'ëx anun Mahanaim kakë ëmanu kuanti nëtën kuaniabi 'aisamaira banakin 'ë 'ichábiankin ñukákëxa. Usokin 'axunbi ka Jordán kakë baka anu kuania aín 'apu 'akësokin 'ë upíokin biakëxa, usokëxun kana Diosan anën 'ën kana mi 'atima 'ai kixun kakën. 9 Usa 'ain kamina abë mëníonanti sinánkima. Min kamina uisokin kara ñu 'ati 'ikë kixun upíokin 'unan usa 'ixun, kamina uisa kaina a uni oti 'ai kixun istankëxun usakin 'ati 'ain. 'Akin kamina bënëtishia ñunun 'imiti 'ain.”
David ñua ñuikë bana
(1 Cr 29.26-30)
10 Usai ñukë ka David anua aín aintsikama maínkan me anua tsóa ëma Jerusalén anubi David maínkankëxa. 11 Usa 'ain ka tsókëpan 'aish cuarenta baritia sënën Israel unikaman 'apu 'iakëxa, ax ka mapai achúshi 'imainun rabë́ baritia sënën Hebrón ëmanu 'apu 'iakëxa 'itankëx ka treinta 'imainun tres baritia 'imi Jerusalén ëmanuribi 'apu 'iakëxa. 12 Usokian aín papa Davidnën 'apu 'ixun aín aintsikama 'akian 'ain ka aín bakë bëchikë Salomón axribi atun 'apu 'ixun kamabi Israel unikama 'itsa baritia 'akiankëxa.