1 Anua nueve baritia 'apu 'ikë 'aían mapai rabë́ nëtë décimo 'uxë ax 'ikëbë ka Nabucodonosor kakë 'apu ax aín suntárukamabë Jerusalén 'anuxun bëararati kuanuxun isi, anu 'iakëxa. Kuanx atun ëma 'urama a bëtánain basi pain 'ikin anun ëma kënëarakë a buinarakin anun 'irukianxun atu 'ati 'akëxa.

2 Usokin ëma bëararakë 'ain ka Sedequías mapai rabë́ 'imainun achúshi bari anun 'apu 'ikë 'iruakëxa. 3 Usokin bëararatankëxa Babilonianu 'ikë suntárukamax basipain anu 'ikëbë ka a piti këñuakëxa, usai 'ikëbëa bari rabë́ 'imainun rabë́ 'uxë 'irukë anun nueve nëtë 'ikëbë ka anun a piti ñu këñuakëxa usa 'ain ka numi chaiira a ëmanu 'iakëxa. 4 Usa 'ain ka a nëtënbi 'apu Sedequíasnën kamikëxun ain unikaman anun ëma kënëara kënë anun chikiti kini achúshi 'akëxa, anun ka 'apu Sedequías a imë́ abánëakëxa. Babilonia kama atu 'urama 'aínbi, usai abáti ka amo rabë́bi kënëkian xëkuëokë anun kuani 'apun xubu 'urama ñu 'apákë a ratanbiani kuankin bai bibiani Jordán kakë baka me sapan 'ikë ami kikiani kuankëxa.

5 Kuaniabi ka Babilonianu 'ikë suntárukaman 'apu Sedequías nuibianxun Jericónu 'ikë me sapan anua nukúkin ñatankin bikankëxa. Bitsia ka kamaxunbi aín suntárukaman abati abískin ëankëxa. 6 Usokin ñatanbiankin ka Babilonianu 'ikë suntárukaman 'apu Sedequías 'imainun aín bakë bëchikëma Babilonia menu buánkin. 'Apu Riblá ëma, Hamat menua 'ikë anu buánkëxa.

Anuxun ka 'apu Nabucodonosornën Sedequías ka sipuakë 'iti 'ikën kixun bana nankëxa, 7 usakin 'akin ka an ismainunbi aín bakë bëchikë bëbukama rëtënun 'amiakëxa. 'Amianan ka Sedequías aín bëru rabë́ ëchitankëxuan manë risin tëkërë kabiankin Babilonianu buánun 'amiakëxa.

8 Nabucodonosornën ka aín suntárunën kushi comandante Nebuzaradán a Jerusalénnu xuakëxa, xukëx kuanx ka mapai achúshi 'uxë 'irukë anua mapai achúshi 'imainun rabë́ nëtë 'ikëbë bëbakëxa, a baria Nabucodonosor dieciocho baritia 'apu 'itankëxa anun diecinueve baritia 'apu 'ikë a barin ka usakin 'amiakëxa, 9 usakin xukëx kuanxun ka anuxun Dios rabiti xubu akëñun anua 'apu tsókë aín xubu a 'anan kamabi uni ñu 'unánkë a ëmanu 'ikë xubukamaribi nëankëxa, 10 usakin 'amainun ka abëa kuankë Babilonianu 'ikë suntárukaman, anun buinarakin Jerusalén ëma kënëara kënë a rurupakëxa.

11 Usokin 'atankëxun ka Nebuzaradánën aín suntárukamabëtan Jerusalénnu bërúkë uni raíri 'imainun, axa Babilonianu 'ikë 'apumi rakuë́ti anu kuankë akamakëñun an ñu 'ati 'unánkë akamaribi uankëxa. 12 Usakin uanan ka uni ñuñumairakama ashi, naëoxun uvas 'apáxun mënioi 'inun ënkankëxa. 13 Usonan ka Babilonianu 'ikë suntárukaman anuxun Dios rabiti xubunu 'ikë manë panshian 'akë ñukama tukapakëxa: 'anan ka ami xubu 'ati nitsínkë akëñun ami birukin 'akë aín tapun akamakëñunbi chaiira 'inua ami 'umpax nanti 'akë akamabi rurupanan kamabi manë panshian raíri Babilonia ëmanu buánkëxa. 14 Buanan ka amia chimapu bikë tasunsa chukúmabu, a 'imainun anun ñu mëëti manë pará, 'imainun manë paná kuënukin 'akë, a 'ianan tasunkama, cuchara chabu a 'imainun, anun Dios rabikin xëati, manë panshian 'akë anuxun Dios rabiti xubunua nankë akama uankëxa. 15 Usaribi okin ka suntárunën kushi Nebuzaradán an ka kamabi ñu kuri 'akë 'imainun manë uxua 'akë ñu akamabi biakëxa: bianan ka amia tsi ëxku ënxaira bikë tasun chaiirabu a bianan chukúmabu akamaribi biakëxa.

16 A mi xubu puruti nitsínkë rabë́ 'ianan ami 'umpax nanti chaiira a 'imainun ami tapuakin anuxun Dios rabiti xubu 'atia Salomónnën 'amia akamax ka uiti 'ëñë kara kixun uínbi tupuntisamaira 'iakëxa. 17 Usa 'ain ka ami xubu 'ati nitsínkë rabë́ ax aín chaxkë́ ocho metro inumikin 'akë 'iakëxa, usa 'aish ka amiribishi manámi okin tupuntëkënkin akë ax rabë́ metro 'inúmikin tupunkë 'iakëxa, anu ka ñu kuënëoti 'unánkë unikaman kaxorisa 'itánun buinarakin manë panshian risi tankin 'akëxa. Usakin 'akë 'aish ka sënë́nbi a rabë́ 'iakëxa.

18 Nebuzaradán comandante suntárunën kushi an ka Seraías sacerdotekaman kushi a 'imainun sacerdote Sofonías an Seraíasnën kakësabiokin ñu 'akë rabë́ 'imainun achúshi uni an xëkuë bërúankë aribi ñatankin biakëxa. 19 Bianan ka sacerdote unibuma Jerusalénnu 'ikë unikama, bianan ka suntárunën kushi an aín suntáru nikinkë aribi bianan mapai achúshi sënën uni anbia 'apu bana ñuixunkë a bianan, an uni 'akananuxa suntáruti bikë ain kushi a 'imainun sesenta uni ñu 'unanbu a ëmanu 'ikë akamaribi biakëxa. 20 Usakin bitankëxun ka suntárunën kushi Nebuzaradán an atu ain suntárukamabëtan, Babilonianu 'ikë 'apu axa Hamat kakë menua 'ikë ëma Riblá kakë anu 'ain.

21 Anuxun ka Babilonianu 'ikë 'apu Nabucodonosor an Hamat kakë me anuxun aín suntárukaman atu rëtënun 'amiakëxa. Usokin ka atu Judá menua bëkë a unikama 'amiakëxa. 'Anan ka unikama raíri Judá menua bëkë a, atun menu buánkëxa.

22 Usokin pain atu 'amitankëxun ka Nabucodonosor Babilonianu 'ikë 'apu an, achúshi Israel uni Guedalías Ahicamnën bakë bëchikë 'imainun Safánnën xuta ax atun 'apu 'ixuan Judá menu an ëbëtsinkë unikama bërúanun anëakëxa.

23 Anëkë kuabiani ka suntárunën kushikama Judá menua Babilonia suntárukaman ñatankëma akamax Mispá kakë ëma anu Guedalías 'apu anëkë kuabiani abë banai kuankëxa. Aín kushikama ax ka 'iakëxa, Ismael, Netanías kakë uni aín bakë bëchikë; Johanán, Caréah kakë uni aín bakë bëchikë; Seraías, Tanhúmet 'ain bakë bëchikë ax ka Netofá kakë ëma anu tsókë uni 'iakëxa 'imainun ka Jaazanías ax achúshi uni Maacá kakë ëma anu tsókë uni aín bakë bëchikë 'iakëxa. Akamax ka ain suntárukamabë kuankëxa. 24 Kuankë ka Guedalíasnën aín suntárukama këñunbi, katëkënxuma ashikin usai ka 'itsíanxa kixun ñuixunkin kakëxa, mitsux kamina Babilonianu 'ikë suntárunën kushikama anunu 'ikë ënë menu bërúkëbë atu ñu mëëxuntimi rakuë́tsiama, usokëx ka asábi 'itsíanxa.

25 Usakin kakia atu sinanamikë 'ixunbi ka, Ismael Netanías aín bakë bëchikë Elisamá ain xuta Judá menu 'ikë, 'apukaman aintsi ax Mispánu mapai rabë́ unikamabë bëbaxun mapai achúshi 'imainun rabë́ 'uxë këñuti kuankë anun ka Guedalías 'imainun 'ain suntárunën kushikama 'ianan, Judá menu 'ikë raíri unikama 'imainun Babilonianu 'ikë uni atubëa 'ikë akamakëñunbi 'akëxa. 26 Usokian 'an ka kamabi suntárunën kushikama Judá menua 'ikë uni ñuñuma 'imainun ñuñu unikama atux Babilonianu 'ikë unikaman 'atimi rakuë́ti Egipto menu abákankëxa.

27 Usa 'ain ka Joaquín kakë Judá menua 'ikë a bitankëxun Babilonianu 'ikë 'apun treinta 'imainun siete baritia sipuakëxa. Sipua 'aínbi veinticinco nëtë anun febrero 'uxë këñuax marzo 'uxë 'iruti nëtë anun ka achúshi uni Evil-merodac kakë ax 'apu 'ikin pëuax 'apu 'ixun an 'itsaira nuibakëxa, nuibakin ka bëtsi 'apun sipua 'ikëbi an Joaquín chikíankëxa. 28 Usa 'ixun ka upiti abë banakin abëa 'ikë 'apukaman ñatanbiankin buánkë 'apukama a 'akësamaira okin Babilonianu 'ikë 'apun nuibakin abëa 'inun 'imiakëxa. 29 'Imikin ka Joaquín sipunu 'ixuan pañukë aín chupa pëmianan bëtsi chupa pañumiakëxa, usakian pañumikëxun ka 'apubëtan aín ñuti nëtë 'itámainun anu 'ixun 'apun xubunuxun piakëxa. 30 Usakin 'akë ka Joaquín aín ñuti nëtë 'itámainun, Babilonianu 'ikë 'apun nëtëtibi anúan aín kuëënkë ñu maruti kuríki 'inánkëxa.