NEHEMÍAS
Nehemíasnën aín aintsi Jerusalénnu 'ikë Dios ñukáxuan ñuikë bana
1
Ënëx ka Nehemías Hacalías kakë uni aín bakë bëchikë usai 'ia ñuikë bana 'ikën. Veinte baritia Artajerjes 'apu 'ikë anúan noviembre 'uxë këñuti diciembre 'uxë 'irukë anun kana Nehemías 'aish 'ëx, Susa kakë ëma anu 'iakën, 2 anu 'aínbi ka 'ën xukë́n Hananí ax uni raíri Judánuax ukëbë abë uax ënu bëbakëxa. Bëbakë kana uisa kara Jerusalén 'ikë kixun ñukánan anu 'ikë Judíos unikama axa Babilonianu kuanima bërúkëkama atúxribi kara uisa 'ikë kixun ñukákën. 3 Ñukákëxunbi ka ësokin 'ë kakëxa: “Axa Babilonianu kuanima Jerusalén ëmanubi bërúkë unikama ax ka bërí bëtsi bëtsi ñu inuti 'aisamaira tëmërai ñuñuma 'ain atumi uni kuaikëbë rabinkë 'ikën. Usaia atux 'imainun ka Jerusalén ëma anun kënëa axribi rurupakë 'imainun aín xëpútikama axribi në́nkëxuan tsin këñukëx rurukubua 'ikën.”4 Ësokin 'ë kakëxun a banakama kuatankëx kana tsótax iankën uiti nëtë 'itsaira masánuituti 'iakën, usai 'i pikëmëanan abë banakin kana naínu 'ikë Nukën 'Ibu Dios ñukákën. 5 Ñukákin kana ësokin kakën: “Nun 'Ibu Dios naínu 'ikë mix kamina chaiira 'ianan ax rakuënmianankë a 'ain, usa 'ixun kamina mix kia bana kikësabiokin 'anan uin kara min bana kikësabiokin 'aia akama nuibatin; 6 'ën mi ñukákëxun kamina bërí kuati 'ain, imë́ 'imainun nëtën kana min uni Israel unikama mi ñukáxunin. 'Ënbi kana 'unanin Israel uni nukamax kananuna mimi 'uchan; ¡'ën aintsi 'ibu kamabëbi kana 'ëxribi mimi 'uchakën! 7 Nukaman kananuna min ismainunbi ñu 'atimaira 'akën; 'akin kananuna a tanti banakama 'imainun ax kikësa okin 'ati banakama, min uni Moisésmi 'inan min bana ax kikësabiokin 'akëma 'ain. 8 Usa 'ain kamina bërí sinánti 'ain, min uni Moisés mi ësokin ka bana a, 'uchaia kana mitsu bëtsi bëtsi menu kuani abístanun xuti 'ai kixun; 9 'aínbi kamina ësokinribi kakën, mitsun mi 'ëmi sinanakin 'ën bana kikësabiokin 'atëkënkin a tania kana uinu 'ikë menu kara bëtsi unikaman buánkëxa anuabi mi timë́nun 'imitëkënkin, uinu karana anuxun 'ë rabiti xubu 'ati 'ën kaisakë anubi mitsu bëtëkënti 'ain. 10 Nukamax kananuna min kaisa 'aish min uni 'ain, usa 'ikë kamina atu min kushínbi chikínbëtsinkin Egipto menua bëakën. 11 Dios 'ën mi ñukákëxun kamina kuati 'ain, 'imainun kamina min unikaman ñukákëxunribi kuati 'ain, usa 'ain kamina an mishi rabitisa tankë unikaman ñukákëxun kuati 'ain. 'Imainun kana ësokinribi mi ñukatin 'apuan 'ën kakëxun 'ëmi upíokin sinánkin 'akinun kamina sinánmiti 'ain.”