JOB
Diosan Job kakë uni bëtsi bëtsi ñu 'inúti ñuñuma 'inun 'imia ñuikë bana
1
Anu ka achúshi uni Job kakin anëkë 'iakëxa, ax ka Us kakë me anu tsóakëxa, usa 'ixun ka uisa ñu 'atimabi 'ati sinánkëma 'ianan, Dios kuëënkësabi okinshi aín nuitu upí 'ixun ñu 'akin bëtsi uni 'atima oti sinánkëma 'iakëxa. 2 Job ax ka mapai achúshi 'imainun rabë́ bakë bëchikë bëbuñu 'ianan rabë́ 'imainun achúshi 'ini bëchikë xanuñu 'iakëxa, 3 'imainun ka ax siete mil ovejakama 'ianan tres mil camello, 'imainun a ñu mëëmikë vaca bënë rabë́, rabë́ ax quinientas 'iakëxa, 'imainun ka burro aín xanu kamañuribi 'iakëxa. 'Ianan ka an ñu mëëxunkë unikama 'imainun xanukama an ñu 'axunkë kamañuribi 'iakëxa. Usa 'aish ka ax ñuñuira uni a menu 'iakëxa.4 Usa 'ain ka Jobnën bakë bëchikëkaman fiesta 'akin 'axëkë 'ixun timë́xun bëtsin pain 'akin sënë́onkëbëtan bëtsínribi aín xubunuxun atun 'akësokinbi pikin 'axëkë 'ixun, atun chirabakë rabë́ 'imainun achúshiribi atubëtan pinux timë́nun kixun kuëankëxa. 5 Usakin 'akian anun timë́xun piti nëtë inuti sënëni sënë́nkëbëtan ka Jobnën aín bakë bëchikë bëbukama kuënxun, uinuxun kara 'ati 'ikë anu kuëënxun pë́karakëma 'aínshi nirutankëxun ñuina xarokin aín bëchikë achúshi achúshinëxa aín 'ucha mëníokanun 'axuankëxa. Ësokin ka Jobnën 'akëxa, 'ën bëchikë bëbukamax sapika, 'atimakin Diosmi sinani 'uchaxa kixun sinánkin 'akëxa.
6 Achúshi nëtën ka an ñu 'axunkë aín ángel kamabë usaibi 'ikë 'aish Diosbë timë́ti nëtë 'ain, axa paránankë ángel axribi atubë timë́akëxa. 7 Usai anu ukë ka Diosan ñukákëxa:
—¿Uinuax kaina mix aín?
Kixuan ñukákëxun ka axa paránankë ñunshin 'atimanën kakëxa:
—'Ëx kana kamabi mekama oi kuaínbëkini nitsin.
8 Kakëxun ka Diosan kakëxa:
—¿Uisa uni kara 'ën uni Job 'ikë kixun kaina 'unan? Asaribi uni ka ënë menu 'aíma 'ikën, an ka 'ën kuëënkësabi okin 'akin ñu upíshi 'ai tsókin ñu 'atima 'ati sinanan, uibi 'atimoti sinanima upí ñuishi 'ai tsotia.
9 Kixuan kakëxunbi ka ñunshin 'atimanënribi kakëxa:
—Jobnëa min kakësabiokin 'akë ax ka an sinánkësokishia 'akë 'ikën. 10 ¿Min kamina uínbia 'atima onun ënima 'ianan aín aintsi 'ibukamaxribia uisaibi 'iaxma 'inun ënima? Min kamina an 'akë ñukamaxa upí 'inun upíokin sinánxunin usa 'aish ka a unix an 'arakakë vaca axa kaikëbë anunbi ñuñuira 'i ënë menu 'ikë bëtsi unikamasamaira 'ikën. 11 'Aínbi kamina usai kara mimi 'atimokin sinani banaia isnuxun ain ñukama bikuanti 'ain.
12 Ësokin kakëxun ka Diosan ñunshin 'atima a kakëxa:
—Asabi ka. Usa 'ain kamina uisokin kaina 'aisatani usakin Jobnën ñukama 'ati 'ain, 'aínbi kamina aín 'ibu a uisabi otima 'ain.
Usakian kakëx ka ñunshin 'atima anuaxa Diosbë banakë anuax uinu kara Job 'ikë anu kuankëxa.
13 Achúshi nëtën ka Jobnën bakë bëchikë bëbukama 'imainun 'ain 'ini bëchikëkama atun fiesta akin piti upíokin 'axun pianan xëai aín xukë́n apanën xubunu timëkë 'iakëxa, 14 usa 'aínbi ka an ñu mëëmikë uni achúshinëx aín xubunu bëbakin Job usaía ñu 'inúkë a ñuikin ësokin kakëxa:
—Nukaman kananuna naënuxun vaca bënë manë paránën me tukami 'ian, 'imainun ka burro ain xanukaman pasto pí nu 'urama 'iabaxa; 15 usai 'iabakëbëbi ka nun usakin sinánkë 'aímabi sabeo unikama rikuatsinkin vaca mëkamanan unikamaribi manë sani kuënukë anun 'axun rëtëaxa. Usokin 'akëbë kana 'ëxëshi mi kai unux abán.
16 Ësokin kakian sënë́onkë 'aímabi axribi ukin ka an ñu mëëxunkë uni itsínribi anu bëbakin Job kakëxa:
—Kaná anubi 'ibúti kushiira banakin ka an ñuina bërúankë unikama 'imainun ovejakama këñukin rëtëaxa. Usokin atu 'akëbë kana 'ëxëshi mi kai unux abán.
17 Ësokin kaia a uni sënë́nkë 'aímabi ukin ka bëtsi uniribi anu bëbakin kakëxa:
—Rabë́ 'imainun achúshi caldeo unikama amami amamiax ai mërakin ka camellokama mëkamanan nubëa 'ikë unikama raíri manë sani kuënukënën 'akin rëtëaxa. Usokin 'akëbë kana 'ëxëshi mi kai unux abán.
18 Ësokin kaia a unix sënë́nkë 'aímabi axribi ukin ka an ñu mëmikë unin ami bëbakin kakëxa:
—Min bakë bëchikë bëbukama 'imainun xanukaman ka ain xukë́n apanën xubunuxun timë́xun fiesta 'akin pianan xëai 'iaxa, 19 usakin 'akëbëbi anu uni 'ikëma memiax bënëtishi anu bëëki 'ibúkin ka suñuanën amami amamixun bëkakin xubu nipakin min bakë bëchikëkama bukukë anuabi chakamiaxa. Usokëx ka kamaxi atux bamaxa. Usokin 'akëbë kana 'ëxëshi mi kai unux abán.
20 Usakian kakëx ka Job anua 'ikë anuax ratuti 'itsaira a bana kuati anun paëi niruakëxa, niruxun ka aín tari nitë́xëkin tukakëxa, usokin 'anan ka ain bu tëai maxkutankëx Dios rabia 'ikësabi masá nuituti memi bëtiki 'iakëxa. 21 Usai 'ika ësai kiakëxa:
—Ñuñu kana ënë menu 'ëx bakë́anma 'ain, usa 'ain kana ñukin ënë menu 'ikë 'ën ñukama uantima 'ain, usa 'ain kana ënë menubi 'ën ñukama ëbiani ñuti 'ain, Diosan ka kamabi 'ën ñukama 'ë 'inánkëxa, usa 'ixun ka anbi 'ën ñukama kamabi 'ë bikuantëkëanxa; ¡Nukën 'Ibu Dios ax ka 'upiokin rabikë 'iti 'ikën!
22 Usa 'ain ka usa ñukama inuti tëmëraibi Job, Diosmi 'atimai banai 'uchama 'ikën.