—¿Uinuax kaina mix aín? Kixuan kakëxun ka ñunshin 'atimanën kakëxa:

—'Ëx kana kamabi mekama oi kuaínbëkini nitsin.

3 Usakin kakëxun ka Diosan kakëxa:

—¿Uisa kara 'ën uni Job 'ikë kixun kaina 'unán? Asaribi uni ka ënë menu 'aíma 'ikën, an ka 'ën kuëënkësabi okinshi 'akin ñu upíshi 'ai tsókin ñu 'atima 'ati sinanan uisakinbi uni 'atimoti sinanima upiti bërúankatia. Usa 'ain ka minmi uisa ñu 'atima 'akëmabi a 'atima oti sinánxun 'ë karaishikin katankëxun ñu 'atima, 'amikëxunbi ka uisa ñu 'atimabi mi 'axuntima 'ikën.

4 Kixun kakëxunbi ka ñunshin 'atimanën Dios kakëxa:

—Uínbia aín naminu 'atimokin paëokëma 'aish ka uni asábi nitsia. 'Aínbi ka unix upí tsótisa tani uisa ñu kara inutia abi inutibi tënëax 'iti 'ikën. 5 Usa 'aínbi ka minmi 'insinun 'imikëxun tani tëmërakin min bëmánanubi 'atimakin mi ñui banati 'ikën.

6 Ësai kia ka Diosan ñunshin 'atima kakëxa:

—Asabi ka usa 'ain kamina uisa kaina oisatani usakin 'akinbi, kamina ñutannuira 'atima 'ain.

7 Ësokian Diosan kakëx ka anuaxa abë banakë anuax ñunshin 'atima kuankëxa, kuanxun ka Job aín taëmiaxi chanku 'insinan 'ia aín nami kamanubi 'ianan aín maxkánubi 'irunun 'imiakëxa. 8 Usakian chanku 'insinan bikëx ka Job anua nibu pukëx tsamakë anu kuanx kuanx tsóakëxa, anuax ka chumu tukikë aín paná achúshi bitankëx aín naminu 'ikë an paëira okëxun tani anun raxuamëakëxa. 9 Usai anu tsotia ka aín xanun anu kuanxun kakëxa:

—¿Ësai 'insíanx tëmëraibi kaina mix ñunshinakëti Diosmi katamëtin? ¡Dios 'atimokin ñuianan kamina ñuti 'ain!

10 Ësakian kakëxun ka Jobnën aín xanu kakëxa:

—¡'Ën xanu usai kamina 'atimai banatima 'ain! Kamabi ñunu Diosan 'inánkëxun bikë ax ka asábi 'ikën, ¿usaribi okin karanuna nua kamabi ñu 'atima inúnun 'imikëx inúkin tënëtima 'ain? Usai kamabi ñu inutibi ka Job 'uchanan achúshi banabi Dios ñui 'atimati ami banama 'ikën.

11 Job ax ka rabë́ 'imainun achúshi uni an 'unánkëñu 'iakëxa: Ax ka Elifaz kakë, 'aish Temán, menu tsókë uni 'iakëxa 'imainun ka Bildad axribi Súah kakë menu tsókë 'iakëxa 'imainun ka Sofar axribi Naamat kakë menu tsókë uni 'iakëxa. A unikaman ka atun 'unánkë uni Job axa usai ñu 'atima inuti nuibakatia kuakëxa, kuabiani ka kanankiani nun 'unánkë uni Job ka 'aisamaira tëmëraia usa 'ain kananuna aín masá nuitukë a sinanatánun kanan isi kuanti 'ai kiax kanankëxa. 12 Kanankiani anua 'ikë anu bëbai kuankinbi ka 'uranxunshi anu Job tsókë iskinbi ax ka a 'ikë kixun 'unani ka munuma kuënkëni a kamaxi iankëxa, usai 'i 'itsaira atúxribi masá nuituti atun tari tukakin a kamaxunbi manámi mësukin me putu puti anunbi matakakikankëxa. 13 Usai 'itankëx ka atúxribi menu tsóti mapai achúshi 'imainun rabë́ nëtë 'ianan mapai achúshi 'imainun rabë́ imë́ribi uisa banabi abë kananima a 'urama abë 'iakëxa, usai 'ia 'aisamaira paë tani tëmëraiabi ka atun Job uisa banabi káma 'ikën.