Job tëmërai anuan bakë́an nëtë ñui kia bana
3
1-2 Usai 'itsaira paë tani tëmërai nuibakati ka uisa bananbi banaima 'itankëx ka Job, anúan bakë́an nëtë ñui 'atimati banai ësai kiakëxa.Job
3 ¡'Atima okë ka anun 'ën titanuax tuá 'inux 'ëx unikë a imë́ 'iti 'iakëxa!
¡'Atima okë ka anúan 'ën titan 'ë bëbu tuá okë nëtë axribi 'iti 'iakëxa!
4 ¡'Uisati kara 'ën titan 'ë tuá imë́
Diosan nëtë xabá a 'inun pë́karatima 'imë́ 'inun 'imiama 'ikën!
5 ¡Uisati kara bëánkibukë këxtuira an 'ibúkin a nëtë mapumainun,
kuin tunan 'ibúkin anribi mapukë 'inun 'imianan,
'imëa nëtë bëankikëbë ami rakuë́kë usaribi 'itánun maputi 'iakëxa!
6 ¡Uisati kara anúan 'ën tita 'ë tuá imë́ ax bëánkibukëmi 'i nëtë́ama 'ikën,
usai 'ia 'ain ka uínbi nëtë 'uxë
baritia akama tupuntima 'iakëxa!
7 ¡'Uisati kara a imë́ 'ën titax tuakëma xanusa 'iama 'ikën,
usa 'ain ka uíxbi a imë́ishi an ka tuaia kixun 'unani munuma sharáma 'itsíanxa!
8 ¡Uisati kara ñubë́ unikaman ax kushiñu 'ixuan
Leviatán kakë ñuina an kushi 'inánkëxun an imë́ a 'atima okin sinánxuanma 'ikën!
9 ¡'Uisati kara pë́karakuatsinkëbë 'ispónkama ax pëkima 'ianan,
nëtëribi xabá kuatsinkëbëtan barin urukin pë́kabëtsinkëbë xabá 'itima ka 'iakëxa,
usa 'ain ka unin pë́karatia nëtë upíira 'ikë isama 'itsíanxa!
10 ¡'Atima okë ka ën titan anun 'ë tuá imë́ ax 'iti 'iakëxa,
usa 'ain kana ënë menuax tëmëranux bakë́ama 'itsían!
11 ¿Uisa 'aish karana 'ën titan puku mëuküax
bamanan 'ën titan naachi kikin 'ë rëmumëkëishi chikíama 'ik?
12 ¿Uisati kara 'ën titan aín kisinu rakanxun
kaniokin 'ë ain xuma 'amikin kaniokëx?
13 Usokin 'akëx ñua 'aish kana 'ëx,
bëríbi upitax tsóti tëmëraima asábi 'itsían,
14 usai 'i kana 'ëx 'apukama 'imainun an ñu 'axunkë aín kushikamabëtan
xubu chaiirabu 'ikëbia an rurupa 'ikëa 'atëkënkë unikamabë 'itsían,
15 'imainun kana bana mëníokë 'apukama
aín xubunu kuri 'imainun kuríki bukúnkë anu 'itsían.
16 ¿Uisoti kara xanu aín nachikiti 'uxë sënë́nkë 'aímabi aín tuá nanipakëkë usaribi okin 'anan,
aín titan pukumëuküaxbi tuá ñukë 'akësaribi okin 'ë mainkama 'ik?
17 Ñukë mainkëxun ka an ñu 'atima 'akë unikaman ñu 'atima 'atëkëanan bëtsi unikamaribi 'atima otëkënima,
'imainun ka axa tëmërai tsóti atsánkë unikamax ñutankëx atsanx 'ianan tëmërai 'itëkënima asábi tani tsotia;
18 usaribiti ka bëtsi unikama ñatanxun tëmëramikë unikaman ñukin anuxun chuámarua tani kuëënia,
usai 'ikin ka an ñu mëëia bërúankë unikaman munuma banakin kakëxun kuati atsánkë akama nëtëtia;
19 anu ka uni ñu 'unanbu 'imainun uni ñu 'unánkëmabu akamaxbi sënën 'ikën,
'imainun ka an ñu tëmërakin mëëkë unikama anbi an ñu mëëxunkë unikama ñu mëëxuntëkënima.
20 ¿Uisa 'ixun kara Diosan ënë nëtënu tsotia tëmëranux bakënun uni 'imin?
¿Uisa 'ixun kara Diosan axa 'itsaira tëmërakë uni a basi pain tsónun 'imia,
21 usa 'ain ka an ñuti barikë uni ax bënëtishi ñuima,
usa 'ain ka ñu upíira 'aish kupíikëira 'akësaribi okin aín ñuti baribi uni ax 'ishtun ñutima 'ik?
22 Usa 'ain ka unix aín ñuti nëtë 'ikëbë
ñuia maínkëx kuni kuëënti 'ikën.
23 Usa 'ain ka Diosan uni bëxuñusa 'aish uisa ñu kara 'iti 'ikë kixunbi 'unánimabi 'inun 'imia,
usakin ka amia kuainti 'aimasa 'itánun unin niti bëarakësa 'inun 'imia.
24 'Ianan kana 'ën pitimibi sinanima 'ëx masá nuituti inin;
usai 'ikana ñu xëaima 'ëx tëmërai bënëtin.
25 Kamabi ñumi 'ëx rakuëa an ka
'itsaira rakuënun 'ë 'imiakëxa,
a ñukama kana bërí inutin.
26 Usa 'ain ka añu ñunbi 'ë tantinun 'imiman;
'ëx kana bërí upíma 'ain, 'itsaira bënëtin kiax ka Job kiakëxa.