'Insíanx nuibakatia ain 'unánkë unikaman Job ká bana
(Job 4–14)
Elifaz
4
1-2 Ësakin ka Elifaznën an 'unánkë uni 'ikë Job kakëxa, 'ën sinánkëx sapi kamina bëtsi unin mi nuibakin bana ñuixunti kuëënima nishti 'ain, 'aínbi kana 'ën mi bana ñuixukin kaima 'ixun upíokin sinántima 'ain.3 Min kamina an bana 'unánkëma uni bana ñuixunkin uisai kara tsóti 'ikë kixun 'unánmiakën,
'imainun kamina an munu sinánkë unikamaribi 'akiankën;
4 min kamina upiti tsótibia ax 'atimati tsókë unikama atux 'ikësabi upiti tsónun kixun kakën,
min kamina upiti tsókinbia an 'atimati tsóti sinánkë unikama a usai 'iama 'inun kakin sinanamiakën,
5 ¿usa 'aínbi kaina bërí 'insiax tëmërai nuibakatia 'ën 'akësabi okin kana,
'ati 'ai kixun kushiokin sinanima usai 'in?
6 Mix kamina achúshi uni an Dios kuëënkësabi okin ñu 'akë a 'ain,
'imainun kamina mix achúshi uni an Diosan kakësabiokin 'akin upíokin ñu 'akë 'ain,
¿usa 'aíshbi kaina mix Diosmi kushiti sinanima manutisa tanin?
7 Min kamina 'ë katima 'ain achúshi uni ñu 'atima 'akëma ax kara,
Diosan 'atima okëxa 'ikë 'iti 'ikë kixun.
8 'Ën kana 'itsa baritia tsókë 'ixun uisa ñukama karana 'akën a 'unan,
'imainun ka uin kara 'atima ñuira 'akin a tanti bana 'ianan, ñu 'atimaira ñunshinakëkin 'ai 'axëkë 'ikë,
a unix ka uin kara ñu 'apáxun uiti 'itsa kara 'apáxa
ati 'itsabi aín bimi bitsia usaribiti anunbi 'atimati tëmërai nuibakatia.
9 Usa 'ain ka Diosan atún ñu 'atima 'akëbë atumi xuamati nishkin,
asérabi masókin suñuanën kushiira bëëkai anu 'ibúkin ñu masókë usaribi okin 'aia.
10 Usa 'ain ka uni 'atimakama an bëtsi unikamami 'atimaira banai atumi nishi paru inuán në́ti kuëëkësari 'iabi Diosan,
ain paka tsasipakin nëtë́miti 'ikën.
11 Usakin 'akëx ka uni 'atimakama ax paru 'inúanëx ain paka tsasikë 'ixun pima chumínbuax bamakësa usaribi 'iti 'ikën,
usai 'ikëbë ka atun bakë bëchikë bëbu 'imainun xanux, ain tita bamakëbëa paru 'inúanën tuákamax abisi tsuákikë usaribi 'iti 'ikën.
12 Banaimaishi uax 'ënu bëbakin unin kakësa 'itánun ka 'ë baxëxkin kakëxa,
'aínbi kana kuaisamara 'itanun munura banai kiabi aín bana kuakën.
13 Achúshi imë́ kana kamabi uníxa 'uxkënan bikëx 'uxan 'ëxribi 'uxunbi,
'atimakin namáx a sinani masáti 'uxima 'iakën.
14 Usai 'ikana 'ë rakuëtan bikëx 'aisamaira rakuë́ti;
'ën xo kamabi bërërui 'iakën.
15 Usai 'ikin kana 'ën bëmánan suñun bëkakëxun tankësa
tani rakuë́ti 'ën namikama raxuturui 'iakën.
16 Usai 'ikin kana uix kara anu 'ikë kixun sinánkën,
'aínbi ka aín bëmánan istisama 'iakëxa.
Usa 'aish ka ui kara kixun 'unántisama 'iakëxa.
Usai 'ikëbëa kamáxbi paskësarua 'inun 'uxi nëtë́këbëtan kana ësai kia achúshi bana kuakën:
17 “¿Uix kara an upí ñuishi Diosan iskëxun akë uni 'iti 'ik?
¿'Ianan kara an unio 'ixuan Diosan iskëx uni an ñu 'atima 'akëma uni 'ati 'ik?
18 Usa 'ain ka Diosan aín nëtënuxun ñu 'axunkë aín ángel kamamibi atux ka ñu 'atima 'akëma 'ikë kixun atumi sinanima.
Usa 'ixun ka Diosan aín ángel kamanribia ñu upiokin ñu 'aiama isia,
19 ¡usa 'ain ka unix ñu 'atima 'akë anunbi kushima 'aish,
xubu 'akin me bachunu nitsinkin 'akë usaribi 'ikën,
usa 'ikëa suñun nipakësa usaribi 'aish ka bisa chakakësa okinshi chakakë 'iti 'ikën!
20 Usa 'aish ka uni ënë nëtënu tsótax uínsaran kara aín bamati nëtë 'ikëbë bamai nëtë́tia;
usai 'ika istëkëntima oi ashiti usakin sinánkë 'aímabi bamaia.
21 Usa 'ain ka unin tsótinëx bënëtishi nëtë́ti ñuman të́kakë usashi 'ikën;
usa 'ain ka uni kamabi ñu 'unanmaxi bamaia kiax ka Elifaz kiakëxa.”