5
Job uin kara munuma kuënkëni banaia kuakin mi kaia 'unánti kamina kiti 'ain.¿Uinu 'ikë ángel a kaina mia 'akinun kixun ñukáti 'ain?
2 An 'unántisa 'ikëbi ñu 'unánkëma uni ax ka Diosmi 'atimati sinánkë kupí ñuia,
'imainun ka bëtsi unin paránkin kakëxunbia an usama ka kixun kakinma asábi ka kixun kakë axribi bamaia.
3 'Ën kana ñu 'unántisa 'ikëbi 'unánkëma uníxa bënëtishi ñuñuira 'ia isan,
'aínbi ka bënëtishi aín xubunu 'ikë ñukama 'atimakëbë ñuñuma 'iaxa.
4 Usa 'ain ka aín bakë bëchikëkama an 'akinti 'aíma 'ikën;
usa 'ikë ka anuxun bana mëníokë anuxuan ñu 'atima
'akëmabi atun kuëënkësa okin 'akania,
usa 'aínbi ka axa anun rabanan në́ti banati 'aíma 'ikën.
5 'Imainun ka atun ñu 'apakëkamaribi pitiñuma axa numin 'i bukukë unikaman aín inuabi bixun pikania,
usakin 'amainun ka an bëtsin ñuishi kuëënkë unikama atux ñuñuira 'ikëbë ami nutsia.
6 Unixa 'atima onanti sinánkë ax ka menuax ñu 'apákë 'ikësai koima;
uníxa uisa ñubi kara inuti tëmërakë ax ka menuax xubi 'ikësai unikëma 'ikën:
7 kamabi tsi rëkirukënuax ka aín ëxku saraki abisi 'ia,
usaribiti ka an uni tëmëramiti 'atima ñukama axribi aín sinánnuaxbi chikitia.
8 Mix 'ikësai tëmërai 'ikë 'ixun kana
'ën ira Diosan 'ëx tëmërakë 'ë 'akinun min 'akëbëtanmabi ñukátsian.
9 ¡An ka 'itsaira ñu 'akin unin iskëma chaiirabu ñu 'aia,
usakin 'aia ka uínbi a ñukama uisakin kara 'aia kixun 'unántima 'ikën!
10 An ka 'uí 'ibúkin me chabónun 'imia,
usakin 'imikëx 'ibúkin ka menu ñu 'apákë koonun chabóia.
11 An ka mënin sinánñu unikama atúxribia raíri unikamasaribi 'inun 'imia,
'imianan ka axa tëmërai masá sinani bukukë akamaribi upí 'inun 'imia;
12 'imianan ka an uni paránti 'unairakë uni an usakin uni 'ati sinánkë 'ikëbi
an sinánkësa okían 'anun 'amima.
13 Usa 'ixun ka an bëtsi 'atimoti sinánxun 'aisataniabi uni Diosan atun sinánkëa 'axuma 'anun 'amima,
usakin 'akin ka atun ñu 'atima 'ati sinánxua 'akë ax ñankáishi 'inun 'imia:
14 ¡usa 'aish ka uin kara bëtsi unikama 'atima oti sinania
a unikamax nëtë xabánu nitsibi imë́ bëánkibukënu nikësa 'ikën!
15 Diosan ka ñuñuma uni 'imainun
bëtsi unikaman 'atimaira okë abi ië́miti 'ikën;
16 ax ka an uni ñuumara ka kixun bëtsi unin iskëkama a 'akinkë a 'ikën,
¡'ianan ka uni 'atima sinánñuirakama bëtsi 'atima onux bananun 'imima!
17 Usa 'ain ka chuámarua 'iti 'ikë ui uni kara Diosan 'unánmisatankin 'atima ñu inúnun 'imia ax;
usai 'ikinbi ka Dios kushiira 'ixuan usai 'iti 'imikëxunbi ami 'atimakin sinánkinma abi tënëkë uni ax 'iti 'ikën.
18 An mi 'insinun 'imitankëxunbi ka amiribishi anbi mi pëxkutëkënti 'ikën;
'imianan ka tëmëranun 'imitankëxunbi anbi mi kuëëmitëkënti 'ikën.
19 Uínsaran kaina ñu 'atima inuti 'ai anun ka achúshira okin 'akintankëxun ënkinma mi 'akinti 'ikën,
'ianan ka uisa ñu inuti kaina tëmërati 'ai usabi mi tsónun mi 'imitima 'ikën.
20 Anuan numi 'iti nëtë 'ikëbëtanbi ka numin bamanun mi ëntima 'ikën,
'ianan ka anúan 'akánanti nëtë 'ikëbë 'akanankinbia suntárukaman 'anun mi ëntima 'ikën.
21 Uin kara mi 'atimakin ñui këmëi banaia anuabi ka mi ënkinma 'akinti 'ikën,
usakin 'akëxbi kamina rakuë́tima 'ain, an ka uin kara mi ñuia ax këmëi banai kikëbëtanbi anuabi mi 'akinti 'ikën.
22 Usa 'ain kamina numi 'ianan bëtsi bëtsi ñu inuti tëmëraibi ami kuai kuëënti 'ain,
'ianan kamina raëkëma ñuina kamami rakuë́tima 'ain.
23 Min naëoti menu ka mënioisama 'itánun 'itsaira maxá 'itima 'ikën,
'imainun ka raëkëma pianankë ñuinakama ax min 'unánkë unisa 'ixun mi uisabi otima 'ikën.
24 Usa 'ain ka min xubunua mibë 'ikë min aintsikamax ñuñuira 'iti 'ikën,
'imainun ka min 'arakakë vacakama 'uakamë 'ëoi kamabi kara kixun tupúnkëx bëtsix nëtë́këma 'iti 'ikën.
25 'Imainun ka min rëbúnki kamaxribi bakë
bëchipati 'uakamë 'ëoi 'aisamaira 'aish naënua xubi kókësaira 'iti 'ikën.
26 'Ianan kamina min kaniakëti nëtë 'ikëbë xënibutibi samabuirakëma kushi pain 'iti 'ain,
usai 'i kamina ñu bimi 'apá pëkëtia bikëxa upí 'ikë usaribi 'iti 'ain.
27 Nux bëtsi bëtsi ñu inúkë an ka nu 'unánmia usa 'ain kamina ënë bana kuakin usa ka kixun sinánti 'ain;
usa 'ain kamina ënë bana kuakin minbi uisaira kara kixun mix inúkë ñukama tanti 'ain, kixun ka Elifaznën Job kakëxa.