Job 'itsama baritia ka uni tsotia kia ñuikë bana
14
Kamabi uni aín tita bakënkë ax ka'itsama baritia 'imi tsotia, usai 'i ka bëtsi bëtsi ñu inuti 'itsaira tëmëraia.
2 Usai 'i ka ñu uá pëókintankë́xa barin 'akëx núkakësa usaribiti 'ia;
'ianan ka ñun tupënaxa bënëtishi nëtë́kësa usaribiti 'ia.
3 ¿'Ëmi 'atimakin sinánkin kaina min 'ë 'uchoisa tanin,
'imainun kaina 'ëmi nishkin min 'ë 'atima oti kuëënin?
4 Uínbi ka bëtsi uni asérabi upí 'inun 'atima ñunua mënioima,
usa 'ain ka kamabi unix aín titan tuákë 'ikën.
5 Min kamina an uni uiti baritia kara tsóti 'ikë atishi tsónun 'imikë a 'ain,
usa 'ixun kamina uiti bari kara tsóti 'ikë atishia 'inun 'imin,
6 usa 'ain kamina atuxia upiti bukunun ubiokinma ënti 'ain;
¡usokëxun ka atúnbi tëxun kuríki bitankëx anun ñu maruxun upíokin pi tsóti 'ikën!
7 Achúshi unían i rëraxun rakankëxi ka aín burunuax
kótëkëni uínsarabi anuax i koi nëtë́tima.
8 Usa 'ain ka aín tapúmiax xanankë 'ianan aín i rakákë
ax menu rakataxbi chë́kikëma 'aish asábi 'ia,
9 usai 'i ka 'umpaxan chabókëxun amiribishi paxaira 'inun kótëkënia;
usai 'i ka bërí 'apákëx koi i 'ikësai pëñanakëti 'itëkënia.
10 Usa 'aínbi ka unix usai 'ima ashiti ñuia;
usai 'i kara ñukiani uni, ¿uinu kuanin?
11 parúmpapa 'umpax 'imainun bakakamax ka kuabutibi
aín 'umpax chitëti ë́skia;
12 usa 'aínbi ka unix naíkamë 'ëo këñutisama pan 'ain,
anu ñuia maínkë anuax nirutëkëntima pain 'ikën,
usai 'i ka uni 'uxax bësukëma usaribiti ñukë 'aish 'iti 'ikën.
13 ¡'Ën kana kuëënti 'ain minmi anu uni ñuia maínkë
anumi 'ë unëti mixmi 'ëmi nishkë a sënë́ntamainun,
usakin 'atankëxun kamina uiti nëtë karana anu 'iti 'ai kixun 'ë kati 'ain, a nëtë sënë́nkëbë kamina 'ëmi sinántëkënti 'ain!
14 Usa 'ain kara achúshi uni ñukë ax, ¿amiribishi baískitëkëntankëx tsóti 'ik?
Usai 'iti 'ain kana 'ën uiti nëtë karana anu uni ñukë anu 'iti 'ai a nëtë kamabi sënë́mi anu 'iti 'ain.
Usa 'ain kana anuxun uínsaran kaina 'ëx tëmërai masá nuitukë a asábi 'inun 'imi kaínti 'ain.
15 Min unio 'ikëmi 'ëbë banatisatankin kuënkëxun kana 'ënribi kakëxun mi kati 'ain;
min iskin kamina upí 'ikë 'ë istsian min 'ë unio 'ixun.
16 Usa 'ain kamina bërí uiti oí karana 'ëx 'ucha atiokinbi 'ë 'atima onuxun tupuntima 'ain,
usokin 'akinma kamina uinu kuani karana nitsi anuabi 'ë buánti 'ain;
17 unin ñu pishanu 'aruxun nikë usaribi okin kamina min 'ën 'atima ñu 'akëkama mëníoti 'ain,
usakin 'akin kamina a ñukama 'ë manumiti 'ain.
18 Asérabi ka ikamax usai ka 'iti 'ikë kixun sinánkë 'aímabi me pankabuti bëukubutia,
'imainun ka xaxun pobu a kamaribi usai ka 'ia kixun unin sinánkë 'aímabi anua rakákë anuax taramëkëti 'uri kuania.
19 Kamabi unix ka upitax tsóti kuëënia 'aínbi kamina min baka kushiira xobukian maxá këñupakësa usakin 'anan,
'uñe 'ibúkian me putu chukakin chinankësa
usaribi okin min unin tsóti 'aisama 'imin.
20 Usa 'ain kamina mix kushiira 'ixun aín menuax chikínun 'imin,
usakin 'akëx ka uni ñui ain nami chë́ki nëtë́tia.
21 Usa 'ixun ka uni ñukë an uisa kara unin aín bakë bëchikëkama oia kixunbi kuatima 'ianan;
uisa ñu kara 'inutia kixunbi 'unannima;
22 usa 'ain ka uni ñunuxun ain nami paë pain tantankëx ñuia,
usai 'i ka aín nami paëia tani tëmërakë anunbi ñuia.