Jobnën aín 'unánkë Bildad amiribishi katëkëan ñuikë bana
19
1-2 Usa 'ain ka Jobnën aín 'unánkë uni Bildad a kakëxa, ¿Uínsaran ira kaina 'aisamaira banakinmi 'ë atsamikë a ënti 'ain?3 Achúshira okin 'akinma kamina 'itsaira okin 'ë ñuikanin;
¿usakin 'atimakin 'ë ñuikë anun kaina rabinkaniman?
4 'Ëx inúkë ñukama ax 'ënanshi 'ain ka
an 'ë 'atima otsianxa.
5 Mitsux sapi kamina 'ësamaira 'iisa tankanin,
usa 'ixun kamina 'ëx 'inúkë ñukama ñuikinshi mitsun 'ë kain.
6 Usa 'aínbi kamina mitsun upíokin pain Diosan ka 'ë tëmëramia kixun 'unánti 'ain,
an ka usai 'inun 'imikin 'ë anu pakëti nankënua ñuina pakëkësaribi 'inun 'imiaxa.
7 'Ëx kana munuma kuënkëni kin: “¡'Ë ka rëtëkania!” 'aínbi ka uínbi 'ë kaima;
'ianan kana 'ë 'akinun kixun ñukatin, 'aínbi ka uínbi 'ënun rabanan në́kin 'ë 'akinsama tania.
8 Diosan ka tëmëramikin 'ën 'ati ñukama ëmikin unin anun niti bai bëarakësa usaribi 'itánun 'ën 'ati ñukama 'ë ëmiaxa;
'ianan ka 'ën 'ati ñukama bëánkibukënën bai mapukësa 'inun 'imiaxa.
9 An ka kamabi ñukama 'ë bikuanxa;
'ën mañuti bixun nikësa 'itánun, 'ë nuibakinma usakin 'axa.
10 Usokin 'akin ka 'ë 'aisamaira ñunu pakëmikin xubu 'ibuan aín itáishi nitánun tënkapakësa usaribi 'itánun 'ë 'imiaxa;
¡'imikin ka 'ën anua ñu bitëkënti 'aíma 'itánun i aín tapunkama këñunbi ëchikësa usaribi 'itánun 'ë 'imiaxa!
11 Usa 'ain ka 'ëmi 'itsaira nishkin,
an abë nishanankë uni 'akësaira okin 'ë 'axa.
12 Usa 'ain ka 'ë tëmëramikin suntárunën bëarabuinkësa 'itánun 'ë 'imiakëxa;
usai 'ikin ka aín suntárukamax 'ë 'anux 'urama,
kuatsinkin bëarakësa 'inun 'iëmiakëxa.
13 Usa 'ain ka Diosanbi 'ën xukë́nkama 'imainun 'ën 'unánkë unikamanbi,
bëtsi menu 'ikë uni 'akësokin 'ë 'anun 'amiaxa.
14-15 'Imainun ka 'ën 'aintsikama 'ianan 'ën 'unánkë unikama 'ëmi manuaxa;
manumainun ka axa 'ë isi kuanx 'ën xubunu 'ia unikamanbi 'ë manuaxa.
'Ianan ka an 'ë ñu 'axunkë xanukaman 'unánkëma uni 'akësa okinshi 'akin;
ax ka an nu ñu mëëmikë uni a 'ikë kixun sinánkin 'ë 'unanima.
16 'Ën ñu mëmikë uni ñu 'axúnun kakëxunbi ka kuashikin 'ë ñu 'axunima,
'imainun ka 'itsokin ñu 'axúnun kixun karaishikëxunbi 'aisama tania.
17 'Imainun ka 'urama okaskëxunbi 'ën xanun 'ë timaia;
'imainun ka 'ën xukë́n 'ibukamanbi 'ë istisama tania.
18 'Ianan ka tuáxu kamáxbi 'ë isi 'ëmi kuaia;
usa 'ain ka anu 'ëx tsókë anuax nirukëma 'aínshi 'ëmi 'atimati banaia.
19 Abë 'ëx nuibanairakë 'ën 'unánkë unikamanbi ka 'ë istisamatankania;
'imainun ka 'ëbë nuibanankëira unikama 'ianan 'ën aintsikamanbi 'ë banoisama tania.
20 Usa 'ain kana 'ën xokama mërakë 'itánun 'aímai raënkëax,
nëtë́ishi kiani ñutisara 'aíshbi usabi masánuitutibi tsotin.
21 Usa 'ain kamina 'ën 'unánkë unikama mitsun 'ë nuibati 'ain.
Diosanbia usai 'inun 'ë 'imikëx kana ësaira 'i tëmërain.
22 ¿Uisakaskin kaina mitsun Diosan 'akësaribi okin 'ë 'aisatani 'ëmi nishkanin? ¿Mitsun kaina 'aisamaira 'ëmi banakin 'ë 'atimokanin?