Job kana uisa ñubi 'ai 'uchakëma 'ai kia bana
31
Usakin pain an 'unánkë uni rabë́ 'imainun achúshi a katankëx sënë́an ka Job axribi banai ësai kiakëxa. 'Ënbi kana sinánkë bënëñu xanukama 'imainun kanabënëñuma xanu uisa 'ixunbi kuëëanma 'ain kixun kana sinánkën.
2 ¿Uisa ñuira kara kamabi kushiñuira Dios an naí mananxunbi,
achúshi achúshi uni ñu 'inánti ax 'iti 'ik?
3 ¿An 'atima ñu 'ai 'uchakë unikama 'imainun 'atima unikama ainama kara
'atimañu inuti tëmërati 'ax 'ik?
4 ¿'Ianan kara Diosan 'ën 'akë ñukama iskin 'unanima 'ianan,
'ëx nikë kamabi 'unanima 'iti 'ik?
5 'Ëx kana asérabi kian uínsaranbi kana ñu 'atima 'anan uni kana,
paránti 'ai kixun sinánxun paránkëma 'ain.
6 ¡Usama 'ikë ka Diosan anun unin ñu 'ëñë tupúnti 'akë anu 'ën 'atima ñu 'akëkama tupunkin uisa kara oisatania usokin 'ati 'ikën,
usakin 'axun ka 'ën karana ñu 'atima 'akë 'ai kixun 'unánti 'ikën!
7 'Ën karana ñu upí 'ati 'unanxunbi a ënkin ñu 'atima 'an,
'anan karana usai 'ikin bëtsi unin ñu kuëëan,
'ianan kara bëtsi unin aín ñu mëkamakë 'ënua mëraxa,
8 usakin 'ën 'akë 'ikë ka bëtsi unikaman 'ën 'apákë ñukama bixun piínun Diosan 'amiti 'ikën,
'imainun ka 'ën 'apá ñukamaribi aín tapun këñunbia bëtsi unikaman ëchinun 'amiti 'ikën.
9 'Ën karana xanu bënuñu 'ën xanu 'ikëmabi këmëkësakin uisai kara 'ia kixun isanan,
'ë rapasu 'ikë unin xanu aratsushi 'ikë 'utunkin isan,
10 usakin 'ën 'akë 'ain ka 'ën xanu bëtsi uni ñu mëëxunkë 'ianan,
uni 'unánkëma kamanribi aín nami 'ati 'ikën.
11 Usakin 'ën xanu 'akë ka rabintanun;
uisai kara uni 'ia an mëníokë 'apukaman 'ë 'atima okë 'itsíanxa.
12 Usa 'ain ka 'ën ñu 'atima 'akë 'ain tsi rëkirukin ñu nënkësokëx,
kamabi 'ën ñukamax këñutsianxa.
13 An 'ë ñu mëëxunkë unikama 'imainun xanukamañu pain 'ixun kana añu 'axúnun kara 'ë kaia,
usakinbi 'axuankën.
14 ¿Uisokinra karana 'ën Dios 'ëa 'atima oisatankëxun kati 'ain?
¿Uisokin karana usakin 'ën 'akë ñukama ñukákëxun asérabi këmëkinma kati 'ain?
15 An nukama nun titan puku 'ukëmëu uninun 'imia Dios anbi ka
aturibi 'ë 'akësaribiokin anun tsóti 'inánkëxa.
16 Uisaxunbi kana 'ën uni ñuñuma an kuëënkë ñu 'inanima 'iama 'ain,
'imainun kana kasunamëkë xanukamaribi pitiñuma 'aísh numin 'i tsotia isëshiama 'ain.
17 Uinsaranbi kana 'ën pikë ñu a
papañuma 'imainun titañuma tuákama 'inánkinma 'ëbi piama 'ain.
18 Usa 'ixun kana 'ibuñumakë tuákama unían aín bakë bëchikë 'ibu 'akësokin nuibakën;
'imainun kana kasunamëkë xanukamaribi 'itsaira 'akiankën.
19 'Ën kana uix kara chupañuma 'ikëa matsin 'akëx ñutisa tania iskin chupa 'inánkën,
ñuñuma uni aribi anúan rakuti chupañuma iskin aribi nuibakin anua rakuti chupa 'inánkën,
20 'ën 'arakakë carnero aín ranibi bitankëxun chupa 'axun kana amia xananun 'inánkën,
anun xanai 'ikin ka 'ën 'unánkë uni an asábi ka kixun 'ë upíokin kakëxa.
21 Uinsaranbi kana papañuma titañuma tuákama 'apukamami kuaikësa 'inun
mi kana usokin 'ati 'ai kixun káma 'ain.
22 Ësokin asérabi 'axmabi 'ëx këmëi kikë 'ain ka
'ën pëñan rabë́ ënë tsasikanti 'ikën;
usokin 'anan ka 'ën tëkënpata aribi 'ë pë́nchicanti 'ikën.
23 Usa 'ain kana Diosan 'ë 'atimokin tëmëramiti anun rakuëakën;
¡usa 'ain kana ax 'apu kushiira 'ixuan uisakin kara 'akëxun 'ën tënëama 'itsían!
24 Uinsaranbi kana kuriñu 'ianan kuríkiñu
'aíshbi 'ëx ami katamëama 'ain.
25 Uinsaranbi kana kuríkiñu 'ianan 'aisamaira ñuñu 'aishi,
anun rabiakati usa kana 'ëx 'ai kiama 'ain.
26 'Ën kana barin pë́kabëtsinia isanan,
'uxën imë́ pë́kakë aribi isan,
27 'aínbi kana uínsaranbi unëxun rabianan,
'ën mëkën bëtsuku kakin tanxuama 'ain.
28 Ësokin 'ai 'ëx ami 'uchaia ka Diosan 'ë 'atimo 'itsíanxa;
¡usakin 'ën ñu 'akë ax ka Dios ka naínuma 'ikë kixun sinánkin 'ën 'akë 'iti 'iaxa!
29 Uinsaranbi kana axa 'ëmi nishkë uníxa ñu 'atima inuti tëmërakëbë ami kuai kuëëni 'iama 'ain;
'ianan kana unían 'atima okin ñuikëbëbi a kuati kuëëanma 'ain.
30 Uinsaranbi kana axa 'ëmi nishkë uni ka 'atima ñu inuti 'ikë kixun sinánxuanan
ax ka ñuti 'ikë kiaxbi kiama 'ain.
31 'Ëx abë 'ikë uni achúshinën
bëtsi menu 'ikë uni mërakin kuai oisatania kana,
32 ëman kamina 'uxti 'ai kixun káma 'ain.
Usakin 'akinma kana 'ën xubu xëókaxun bëtsi menuax ukë unikama anu atsímiakën.
33 Uinsaranbi kana 'ën 'akë ñukama bëtsi unikaman 'akësokin unëama 'ain,
'imainun kana 'ën ñu unëxun 'akëmasa 'inuxun 'ama 'ain
34 unikamami rakuë́kin.
'Ianan kana uínsaranbi banaima 'ën xubunu xëpuax ñuitsimarua,
uni këmëi banakë kamami rakuë́ti 'iama 'ain.
35 ¡Uin kara 'ëx kia kuati 'ikën!
Usa 'ain ka 'ëx kikë bana ënë;
¡Dios kamabi kushiñuira an 'ën bana kuakin 'ë kati 'ikën!
Usa 'ain ka mix kamina usai 'ia kakin kirikanu kuënëoxun ismikin 'ë kati 'ikën,
36 usakin 'akëxunbi kana mënin sinánñuishi 'ixun
'ën nuitunën sinánkin unia aín maiti maxkánu 'akësokin 'ën 'imiti 'ain.
37 Usa 'ain kana uisai karana 'ia a kamabi ñuikin Dios kati 'ain,
usakin kai kana ñu 'atima 'akëma 'ë isnun uinu kara Dios 'ikë anuaxbi abë banati 'ain.
38 Usa 'ain kana, 'ën mekamax ka 'ëmi 'atimai banakin naínuabi Dios kaikikëma 'ikë,
usa 'ain axribia tantinun ëan.
39 'Ëx kana ësai asérabi kin 'ën bëtsi unin ñu 'apákëkama mëkamanan,
an ñu 'apákë unikama kupíokinma atun ñu bikë 'ain ka
40 ¡'ën menu 'apákëxbi trigo 'iruima muxa 'iruti 'ikën,
'ianan ka cebada 'apákëxi 'iruima xubi 'atima 'iruti 'ikën!
Ësai kikin ka Jobnënribi aín 'unánkë unikama kakin sënëonkëxa.