Diosan Job ká bana
38
Usa 'ain ka ax kikë banakama ñuikin suñúan chaiira 'ikuatsini bëkikë anuxun Diosan Job kakëxa:Diosan Job kakëxa
2 ¿Mix añuira 'aish kaina 'ën 'akë
ñukama ñui 'atimatishi banai ñu 'unánma uníxa banakësai banai kian?
3 Bërí kamina 'ë asérabi rakuëma 'ixun,
'ën mi ñukákë banakama ñuikin 'ë kati 'ain:
4 ¿Uinu kaina mix 'ën me uniotabakëbë 'iakën?
¡Asérabi upíokin min ënë banakama 'unánkë 'ixun kamina 'ë kati 'ain!
5 ¿Min kamina 'unanin uin kara uiti cha 'ati kara kixun sinántankëxun tupuankëxa,
'ianan kara uisakin 'ati 'unánkë ira 'ixun 'akëx?
6 ¿Añu ñuiranu nankin 'a kara ami birukin akama ax 'ik?
¿Uin ira ami 'iti maxá chaiira namainun kara,
7 ángelkamax kuëënmainun 'ispakamanribi xabá 'itánun pë́kakëbë kantakëx?
8 Parúmpapa 'umpax menuax chikíkëbëtan kara,
¿uin nunkurui 'ikëbëtan an bëarati aín xëpútikama nankëx?
9 'Ën kana parúmpapa chupa achúshi 'inankësa okin kuin 'inánkën,
'ianan kana kuru nëtë aín chupasa 'aísha anuax nirunun 'inánkën.
10 'Ën kana parúmpapa 'umpax me mapuruima uinu kara sënënia anuishi rakanun 'imianan,
kana xëpúti chaiiran 'akësa okin anun xëpuakën.
11 Usokin 'axun kana parúmpapa kakën: Ënu sënë́inshi kuëpukan kanan kamina;
urikuankin me mapurutima 'ain;
anu sënë́inshi bëchunti 'ën kakë anuishi sënëni kamina bëchunti 'ain.
12 ¿Min kaina uínsaran nëtënbi nëtë 'ixun nëtë xabatia iskin
barin ka urukin upíira 'inun pë́kati 'ikë káma 'ain?
13 ¿'Ianan kaina barin urukin mekama pë́kakëbë ka
uni 'atima sinánñukama unë́ti 'ikë kixun kakën?
14 Usa 'ain ka barin urukin menu pëkakë
an kamabi ni pë́kabëtsinkë ax chupa pukukësa 'inun mërati 'ikën;
15 usai 'ikëbëtan ka ñu 'atima atishi sinánkë unikaman nëtë xabákëbëtan,
uni 'atima oti sinánkëkama a 'aima.
16 ¿Min kaina nanë́kiani kuanxun anuaxira
parúmpapa 'umpax chikíkë a isan?
17 ¿'Ianan kaina min uinuira kara uni ñukëkama ax kuania kixun
anúan kuankë aín xëputi a isan?
18 ¿Min sinánkëx kara uiti naxbaira me 'ikë kixun kaina sinanin?
¡Min asérabi kamabi 'unánkë 'ixun kamina 'ë kati 'ain!
19 ¿Uinuaxira kara nëtë xabá 'imainun
imë́ bëánkibukë ax unin ñu nankësa 'aish aín?
20 ¿Min kaina uinu kara me sënë́ankëxa anu buánxun, nëtë xabá 'imainun imë́ bëánkibukë
anua 'ikë aín xubunua uni ukësa Kuatsinia anubi bëtëkënti 'unán?
21 ¡Min kamina 'itsa baritia tsókë 'ixun akama 'unánkë 'iisa 'ain,
usa 'ain sapi kamina akamax 'iisama pain 'ain bakë́ama 'ain!
22 ¿Min kaina anu kuanxun anua matsin tita 'ikë,
a 'imainun anua matsi bëruñu 'ikë aribi anu kuanxun isan,
23 'ën anun uni atúxbi 'akanankë nëtë 'anan anúan,
tëmërakë nëtë xuti a isan?
24 ¿Min kaina uimiu kikiani kara kaná mëriti ichukë ax kuania kixun 'unanin?
¿Uisai 'ikiani kara amiaxa bari urukëmiaxa bëkikë suñu ax mekama oi bëkin?
25 ¿Uin kara uñe 'ibútia anu 'umpax xururukë ax chikiti me naëkë anua ampë́nkikë,
usaribi 'imianan, kaná mëríkëbë nëtë masá kuatsintankëx 'uí 'ibúkian,
26 anu uni 'ikëma menua 'ibúnun 'imianan anu uíxbi 'ikëma me anuribi 'ibúkian,
27 me ëskikë chabókëbëa anuax ñankáishi 'aíshbi ñu koónun 'imiax?
28 ¿Uix kara 'uí 'imainun kuénkuru aín papa 'ik?
29 ¿Uix kara matsi iru aín tita 'ianan
nibí 'ibúkë aín 'Ibu 'ik?
30 ¿Uin kara parúmpapa 'umpax mapara 'ikësai iruira 'ikëbëa 'umpax bërakati 'inun 'imin?
31 ¿Min kaina 'ispa këñurui timë́kë
axa 'ispón Orión kakë abëira 'ima a 'uri 'inun 'imin?
32 ¿Mix kaina an pëkarakuatsinia nëtë xabakuantsinkëbëa 'ispón cha ax pëkinun 'imikë a 'ain?
¿Min kaina 'ispakama këñurukëbëtan anua Osa chakama 'imainun Osa chukúma anu mëranun 'imin?
33 ¿Min kaina axa naínu 'ikë ñukama an usai kamina 'iti 'ai kixun 'unánmikë a 'unanin?
¿Usa 'ixun kaina min a tanti bana ax kikësabiokin ënë menuxunribi usakinbi 'ain?
34 ¿Min kaina nëtë kuin,
anuax 'uí 'itsaira 'ibúkian 'umpax me mapuminun kati 'ain?
35 Minmi kaná mëríkë a amanu kamina kuanti 'ai kixun kakëx kara,
¿an mi ënu kana 'ai: Min kakësabi oi kana 'iti 'ai kixun mi kati 'ik?
36 ¿Uin kara Ibis kakë ñuina pëchiu
'imainun 'aoripa aín bënë añu kara 'ati 'ikë kixun 'unánun 'imiakëx?
37 ¿Uin kara ñu 'unánkëira 'ixun uiti kuin kara axa kixun 'unánti 'ik?
¿Uin kara nëtë kuin anuax 'uí 'ibúkin,
38 me kupúkë axa chabáti chua 'inun tsëtsërui 'ikë
axa ëski birananun 'imiti 'ik?
39 ¿Mix kaina an paru 'inúan ain titan,
piti bixunkëxun puchákin pitankëxa,
40 aín kininu unëananbi i bëukukë kamanan rakáxun ñuina aín piti aia binuxun kaínun 'imin?
41 ¿Uin kara nónshiansa pëchiu ñuinakama,
aín tuákamaxa nánuax pikatsi
sharákëbëtan abá pimiti baria na piminun ñu 'inanin?