39
¿Min kaina uínsaran kara raëkëma cabrakamax aín tuá bakënia kixun 'unán?¿Min kaina uisai kara carnero xanux aín tuá bakënia kixun isan?
2 ¿Min kaina uiti 'uxë 'ikëbë kara aín tuá
bakënia kixun 'unanin?
3 Aín tuákën paëokëx ka anuax bakënux,
rakabutankëx uisaibi 'ima aín tuá bakënia.
4 Usai 'itankëx ka aín tuákama ax kani kushikin tankin ninua ñu pi,
'ura kuankin aín tita ëntankëx amiribishi aín titanu utëkënima.
5 ¿Uin kara raëkëma ñuina asno kakë a atuxi nitsia uisaibi 'iaxma 'inun ëankëx?
¿Uin kara uinu kuani kara nisatania anu kuania ninun ëankëx?
6 'Ën kana anua atux bukunun uinu kara 'iti 'ikë istankëxun,
anu uni 'ikëma me sapan bashiñu 'itsaira anu tashi 'aia anu ñu kókëma anu 'inun ëankën.
7 Usa 'ain ka a ñuinakamax ëmanuaxa 'aisamaira ñu banakë 'ain a 'ura 'ia,
usa 'ixun ka atun caballonuxun an 'arakakë ñuinakama buánkin kuënkëonkin kakë unikama aín banabi kuatima 'ia.
8 Usa 'aish ka atun piti bari matá me anubi kuankin pasto barianan,
xubi kookë a pinuxun bari nitsia.
9 ¿Min sinánkëx kara vaca bënë raëkëma në́kë ax mi ñu mëëxun baiti
min anu ñuina 'uxti 'akë xubunu imë́ 'uxi kuanti 'ik?
10 ¿Min kaina vaca bënë raëkëma anúan me tukabianti imi manë pará tëkërëkaxun ubíokin 'amikëxuan me,
tukananbi mi kaxú kuankin i saniribi punun 'amiti 'ain?
11 ¿Min kaina ax kushiira 'ixun ka
'ën tëtikama 'ë 'axunti 'ikë kixun sinánkin an mi 'axúnun ënti 'ain?
12 ¿Min sinánkëxun kara an mi 'akinkin min 'apákë ñu naënua bitsia bitsínkin
anuxunmi tákati me mëníokë anu bëxun mi bukunxunti 'ik?
13 Anu ka avestrus kakë ñuina pëchiñu ax 'ikën: ax ka kuëëni aín pëchi shaíkai pëpëkia,
cigüeña kakë ñuina pëchiñunën pëchisa 'aish 'ia,
14 'imainun ka masinu batsioxun anuaxa,
barin xanokëx axi uninun ain batsi ënia.
15 Usokin ënkin ka unin ka chakati 'ikë kixun sinanan,
ñuinakan ka ami kikin amáti 'ikë kixunbi sinánkimaishi ënia.
16 Usa 'ixun ka abia kanitanun aín tuamasa 'ikë aín tuá rakania,
'imainun ka tëmërakin kana batsio kixun sinanan bërúankëxma kara 'ën tuá uisai 'iti 'ikë kixunbi sinanima.
17 Usaia 'ikë ax ka usokin kamina ñu 'ati 'ai kixun sinánun 'ën 'imiama 'ikën;
usakin 'akin kana upíokin sinánkin ñu 'anun 'amiama 'ain.
18 Usa 'aíshbi ka anua tsókë anuax nirui nikiani kuankin,
caballokama 'imainun an nikinkë unikama abi ëbiani munu kuanima kuania.
19 ¿Min kaina caballo kushi 'inánan,
aín tëxanu an upí 'imiti buñu 'inun 'imiakën?
20 ¿Min kaina champu 'ikësai churuni banai aín rëkin rëshin kikin,
uni rakuëminun 'imiakën?
21 Usa 'ixun ka ain taën me basai,
rakuë́timaishi anuax 'akanankë anu uix kara 'irutisa tania axa anu 'iruax 'akananun kuania.
22 Usai ka uisa ñu kara ax inutia ax 'aisamaira 'aínbi ami rakuë́ti bëruankakiani amotan kuanima,
manë xëtokë unin tuinkë amibi kikiani kuania,
23 kuani ka an caballo nikinkë unin aín manë xëtokë anu 'aruti aín xaká a banamianan,
atun pia nikëx kukísh kikiani kuankëbë rakuë́tima.
24 Usai 'i ka 'itsaira abati uínbi nitsinaisama kiani kuani, uinu kara kuainsatania anu kuania,
kuani ka uin kara aín manë banañu banoia a kuati an nikinkë unin bëruainsama 'inun 'ura kuani nitsia,
nitsi ka ubitimama 'ima shaíkia.
25 Usa 'ain ka 'akanankin pëukia manë banañu banoia kuati aribi munuma 'uranxunbi tani munuma banaia, usai 'ikin ka 'akania kixun tania;
usa 'ain ka 'uranxunbi suntárukama 'imainun aín caballokama aín 'isha xëtia,
xëanan ka suntárunën kushikaman aín suntáru, amia nishkë unikama 'akin munuma banakin kakë aribi tania.
26 ¿Mix an kamabi ñu 'unánkë 'ixun kaina usai kamina nuanti 'ai kixun an tëtë 'unánmikë a 'ain 'ianan kaina,
manainra kuania baka rëbumiu ki kuani nuanun 'unánmiakën?
27 ¿Mix karamina an tëtëkamë 'ëo in papa pëñan
anu batsioxun aín na 'anun kakë a 'ain?
28 Ax ka nëtë 'imainun 'imë́bi bashinua 'ikë xaxun pobu kini anu 'ia,
'imainun ka anua uínbi ubiotimanu bashi rëbunu aín na 'aia.
29 Usa 'ain ka anuxunbi
uinua kara ain piti biti 'ikë kixun 'uranxunbi istankëxun bitsia.
30 Usa 'ain ka aín tuákama ñuina imi xëamia;
'imainun ka uinua kara ñu bamakëkama mëraia anu bukubukë unin isia.