40
1-2 Usa 'ain ka Diosan Job kakëxa: 'Ëx kana Dios kamabi kushiñu a 'ain; usa 'aínbi kamina 'ëbë kuëbikanantisa tan. Usa 'ain kamina ëbë kuëbikanantisa tankin min bërí 'ë kati 'ain.Jobnën Dios ká bana
3-4 ¿'Ëx kana ñu 'unánma 'ain usa 'ixun karana uisakin mi kati 'ain?
Usa 'ain sapi kana mi uisakinbi katima 'ain.
5 'Ëx kana 'itsai banan,
usa 'ain ka 'ëx amiribishi a banatëkënti 'aíma 'ikën.
Diosan ubíokin katëkënun kixun Job ka bana
6 Diosan ka amiribishi suñúan chaiira bëkikë anuxun Job katëkëankëxa.
7 Mix asérabi kushi sinánñu 'ixun kamina rakuëkimaishi,
mi ñukákë banakama 'ë kati 'ain.
8 ¿Min kaina 'ëx isana an upíokin ñu 'akëma 'ai kixun 'uchoisatankin,
mix ismina upí sinánñu 'ai kixun sinanin?
9 ¿Mix kaina 'ësaribi kushiira kushi 'ain?
¿Mixmi banakëx kara 'ën banasaribi 'aish kanákamë 'ëo banakë usaribi 'inunmi banakë 'iti 'ik?
10 Usa 'ain kamina mix kushiira 'ianan 'apuira 'ixun 'akësokin atun pañukë chupa pañuti 'ain,
usakinmi 'akëbë ka unikamax mix kamina upí uni 'ianan bëtsi unikamasamaira 'ai kiax kiti 'ikën.
11 Axa 'ëx kana uni itsisamaira 'ai kixun sinani rabiakakë unikama a kamina:
mix atumi nishkin min kushínbi uisa kaina oisatani usakin 'ati 'ain.
12 Usakin 'akin kamina mix kushi 'ixun axa rabiakakë unikama a min kushínbi,
uinu kara 'ia anuabi barixun 'anan sinan 'atimañu unikamaribi 'atima okin masóti 'ain.
13 Usokin ñumitankëxun kamina uni anu maínti 'akë anu maínti 'ain,
usokinmi 'akëx ka ñukë unikamaxa ñu 'atima 'akë unikama sipunu 'ikë usaribi 'iti 'ikën.
14 Usokinmi 'aia kana 'ënbi mix kushiira 'ixun,
kamina usakin 'ai kixun mi 'unánti 'ain.
15 Min kamina chaiira ñuina bakainu a sinánti 'ain,
'ën kana mi 'akësaribi okin uniokën:
an ka vaca bënëkaman 'akësaribi okin basi pia;
16 usa 'aish ka kamabi aín namikamanu,
aín kushi 'ianan aín kisi kamanubi aín kushi 'ikën.
17 Aín inax ka kunxan isaribi iru 'ikën,
'ianan ka ain taënu 'ikë ain punukamax bëxkuñusabu 'aish rëxkë rëxkëabu 'ikën.
18 'Ianan ka aín xokamax manë sëbía naxabañu chabu iskësaribi 'ikën.
19 A kana 'ën bëtsi ñuinakama 'akësokinma upíira 'itánun uniokën;
usa 'ixun kana 'ëx kuëënkin 'ëinshi bamanun a 'imiti 'ain.
20 An ka ninua, anuaxa ñuina raëkëmakama kuaikë anua ni pëi basi akama pia.
21 Usa 'ain ka taxankaru bakanu bukukë tëmú tanti rakanan,
tutish noruax a mëu unëti 'ian kiankë anu rakatia.
22 'Ianan ka i tapun chinan an tupë́onkë anuribi 'ia,
'imainun ka i xëxá kuëbí nikë tapunakëkë an bëararakë mëu anuribi rakatia.
23 Usa 'aish ka baka 'ikuatsinkëbëbi, ami rakuë́tima;
'ianan ka bakan mapurukin aín rëkin mapurukëxi bënëtima asábi 'ia.
24 ¿Uin kara ñatankin bixun aín bëru rabë́ ëchiananbi,
mëxin tëkërëkati 'ik?